Dhuto. 10 - Bhaibheri Rakachena muChindau

Mosi Unoashirazve Mipango

¹ Ngouwo mukuwo Mambo Mwari wakati kwendiri, “Dzitsetserezve marusamba mairi emapuwe akadai ngeokutanga, ukwire mumutunhu, udzinasirire bhokisi romuti.

² Ndinozonyora padera pemarusamba mazwi aiya pamarusamba okutanga, owakaputsa, newe unozoaisa mubhokisi.”

³ Ndakanasira bhokisi romuti womuakasiya, ndakatsetsa marusamba mairi emapuwe kudai ngeokutanga, ndakakwira mumutunhu ndinemarusamba mairi munyara yangu.

⁴ Zvino wakanyora pamarusamba kudai ngokunyora kwaakaita kutanga, mipango iri gumi, yaakaereketa kwomuri Mambo Mwari mumutunhu kubva pakati pomuriro ngezuva romushongano; naMambo Mwari wakaapa kwendiri.

⁵ Ndakakunukuka ngokwangu kudzaka mutunhu, ndakaisa marusamba mairi mubhokisi rechitenderano rendakanasira; noumwo ndimwo mwaari, kudai ngezvaakandipanga Mambo Mwari.

⁶ (VaIsuraeri vakahamba muhambo wavo kubva Bheerothi revana vaJaakani metsa kuguma Mosera, paakafira Aroni, naye wakatsirwa apo; naEreaza mukororo wake wakaita mushando woupristi pandau pake.

⁷ Kubvapo vakahamba kuenda Gudhigodha; nokubva Gudhigodha vakaguma Jotibhatha, nyika inendwizi dzemvura.

⁸ Ngouwo mukuwo Mambo Mwari wakaparadzanisa dzinza revaRevhi, kuti vatware bhokisi rechitenderano chaMambo Mwari, kuti vaeme pamberi paMambo Mwari nokumushandira, nokudakadzisa ngezina rake, metsa nanyamashi.

⁹ Ndizvo Revhi aana chikoaniswa nokuti nhaka pakati pevakoma vake; Mambo Mwari uri nhaka yake, kudai ngezvaakamugondisa Mambo Mwari, Mwari wenyu.)

¹⁰ Neni ndakagara mumutunhu kudai ngokutanga, mazuva makumi marongomuna nousiku makumi marongomuna; naMambo Mwari wakandizwazve ngouwo mukuwo, naMambo Mwari aazi kumupedza.

¹¹ Mambo Mwari wakati kwendiri, “Miruka utungamire ava vanhu, kuti vapotere umwo vagare nhaka yenyika yendakapika ndiyo kunemadzibaba avo kupa kwavari.”

Zvaanoda Mwari

¹² Nazvino, imwimwi vaIsuraeri, Mambo Mwari, Mwari wenyu unodenyi kwomuri, kwega kuti mumutye Mambo Mwari, Mwari wenyu, kuhamba munjira dzake dzeshe, nokumuda, nokumushandira Mambo Mwari, Mwari wenyu, ngomwoyo wenyu weshe, nomweya wenyu weshe,

¹³ mungwarire mipango yaMambo Mwari, nezviemeso zvake, zvendinomupanga nyamashi kuita kunaka kwenyu?

¹⁴ Kunyazwi denga nedenga rematenga riri raMambo Mwari, Mwari wenyu, nyikazve, nazvo zveshe zvirimwo,

¹⁵ asi Mambo Mwari waiya nokudakadzwa ngemadzibaba enyu kuvada, naye wakatsanangura rudzi rwavo runovateera ngesure kwavo, imwimwi, kupinda vanhu veshe, kudai ngezvezvadaro nyamashi.

¹⁶ Ndizvo chekai nyama yeganda romwoyo wenyu, kuti musachaita vanemitsipa yakakukutara.

¹⁷ Ngokuti Mambo Mwari, Mwari wenyu, ndiMwari padera pezvimwari, naMambo padera pemadzimambo, Mwari mukuru, unesimba nounotyisa, usikatsananguri vanhu, nousikatori chitengero.

¹⁸ Unotongera ndaa dzevasina baba neshirikadzi, unomuda mupara, ngokumupa zvokudya nezvokufuka.

¹⁹ Ndizvo idai vapara, ngokuti imwimwi mwaiya vapara munyika yeEgipite.

²⁰ Munozotya Mambo Mwari, Mwari wenyu; mumudire iye ega, nokwaari munozonamatira, nokupika ngezina rake.

²¹ Iye uri kukudzwa kwenyu; uri Mwari wenyu, uwo wakamuitira izvi zviro zvikuru nezvinotyisa, zvemwakaona ngemadziso enyu.

²² Madzibaba enyu vakadzaka Egipite vaiya vanhu vari makumi manomwe; nazvino Mambo Mwari, Mwari wenyu, wamuwanzisa kudai ngenyeredzi dzomudenga.