Dhuto. 1 - Bhaibheri Rakachena muChindau

Mazwi oKutanga

¹ Aya ndiwo mazwi aakaereketa Mosi kuvaIsuraeri veshe ngoruseri rweJorodhani vari mushango, mubani rakaringirirana neSufi, pakati pePharani neToferi, Rabhani, Hazerothi, neDhizahabhi.

² (Anoita mazuva gumi narimwe kuhamba kubva Horebhi, kuhamba ngenjira inoenda kuMutunhu weSeira, metsa kuguma Kadheshibharanea).

³ Kwakaitika ngegore remakumi marongomuna, ngomwedzi wegumi noumwe, ngezuva rokutanga romwedziwo, kuti Mosi wakaereketa kunevanhu vaIsuraeri, kudai ndizvo zveshe zvaakamupanga Mambo Mwari kuti aronze kwavari;

⁴ ngesure apo aiya auraya Sihoni mambo wevaAmori, waigara Heshibhoni, naOgi mambo weBhashani, waigara Ashitharothi muEdrei.

⁵ NaMosi wakatanga kududzira zvironzo ari munyika yeMoabhi, ngoruseri rweJorodhani, echiti.

⁶ “Mambo Mwari, Mwari wedu wakaereketa kwetiri, tiri paHorebhi echiti, ‘Mwagara nguva yakakwana pamutunhu uyu.

⁷ Kunukukai zvino muhambe kuenda kumutunhu wevaAmori nokundau dzeshe dziri pasinde, Arabha, nyika yezvimitunhu, Shefera, Negebhi, nokumhiri kworuandhle, kunyika yevaKhenani neRebhanoni, metsa kumukova mukuru, rwizi Yufratesi.

⁸ Wonai, ndaisa nyika pamberi penyu. Poterai kweiri mutore nhaka yenyika iyo yaakapika ndiyo Mambo Mwari kumadzibaba enyu, Abrahama, Isaka naJakobe, kupa kwavari nokunemibarirwana yavo ngesure kwavo.’ ”

Mosi Unoemesa Vatongi

⁹ Neni ndakaereketa kwomuri ngouwo mukuwo ndechiti, “Andina simba inini pachangu rokumutwara ndega.

¹⁰ Mambo Mwari, Mwari wenyu wakamuwanzisa, ndizvo nyamashi mwawanda kudai ngenyeredzi dzomudenga.

¹¹ Mambo Mwari, Mwari wemadzibaba enyu, ngaamuite kuti muwande ngemakumi emazana kupinda zvomuri, amufumise kudai ngezvaakamugondisa!

¹² Asi inini ndega ndingaita makonerei kutwara mitwaro yenyu inorema yehasha dzenyu?

¹³ Dzitsanangurirenyi vamuna vakangwara, vanokuzia, vanoziikanwa pakati pemadzinza enyu, ndinozovaita vatongi padera penyu.”

¹⁴ Nemwi mwakandipingura, mwechiti, “Chiro chewaereketa kwetiri chiri chakanaka kuti tichiite.”

¹⁵ Ndizvo ndakatora vakuru vemadzinza enyu, vamuna vakangwara, nevanoziikanwa, ndikavaita vakuru padera penyu, nduna dzepadera pemakumi emazana, nduna dzepadera pemazana, nduna dzepadera pemakumi mashanu nenduna dzepadera pemakumi, nenduna dzepadera pemadzinza enyu.

¹⁶ Neni ndakapanga vatongi venyu ngouwo mukuwo ndechiti, “Izwanyi ndaa dziri pakati pevakoma venyu, mudzitonge ngokururamisa pakati pomunhu umwe noumweni, kunyazwi nomupara waanaye.

¹⁷ Musazoita mutsananguro kuvanhu mukutonga kwenyu; asi munozozwa ndaa yomudoko kundodai ngeyomukuru; musazotya hope yomunhu, ngokuti kugura ndaa kuri kwaMwari. Ndaa yakanyanya kumukonzera, munozoiunza kwendiri, neni ndinozoizwa.”

¹⁸ Neni ndakamupanga ngouwo mukuwo ngeizvo zveshe zvomunozoita.

Vanengeri Vanotumwa Kubva Kadheshibharanea

¹⁹ Naapo takathutha kubva Horebhi, takahamba muiri shango rinotyisa remwakaona ngenjira inohamba ngemitunhu yevaAmori, kudai ngezvaakatipanga Mambo Mwari, Mwari wedu, metsa takaguma Kadheshibharanea.

²⁰ Ndakati kwomuri, “Mwaguma pamutunhu wevaAmori, waanozopa kwetiri Mambo Mwari, Mwari wedu.

²¹ Wonai, Mambo Mwari, Mwari wenyu waisa nyika pamberi penyu; kwirai muigare, kudai ngezvaakaronza Mambo Mwari, Mwari wemadzibaba enyu, wakamugondisa; musatya nokuti kupera simba.”

²² Mweshe mwakauya pasinde pangu, mwakati, “Tinozotuma vamuna pamberi pedu, vanozonengera nyika, nokutiunzira izwi ngenjira inosisira kuti tikwire ndiyo, nokuti ngaari madhorobha etinozopotera mwaari.”

²³ Icho chiro chakaoneka chakanaka kwendiri, neni ndakatsara vamuna gumi navairi, umwe kubva kudzinza rimwe ngarimwe.

²⁴ Navo vakakunukuka vakakwira kunyika yemitunhu, vakaguma muBani reEshikhori, vakarinengera,

²⁵ navo vakatora michero yenyika munyara dzavo, vakadzaka nayo kwetiri. Vakatiunzirazve izwi vechiti, “Inyika yakanaka iyo Mambo Mwari, Mwari wedu, yaanopa kwetiri.”

²⁶ Asi zvakanyadaro amuzi kuda kukwireyo. Mwakamukira mupango waMambo Mwari wenyu.

²⁷ Mwakagunun'una muri mumathende enyu mwechiti, “Ngokuti Mambo Mwari unotizonda, wakatibudisa kubva munyika yeEgipite, kuti atipire munyara dzevaAmori kuti vatiuraye.”

²⁸ Tinoenda kuri? Ngokuti hama dzedu dzatyisidzira mwoyo yedu, dzechiti, “Vanhu variyo magakanyara nokureba kupinda isisu; madhorobha makuru, akashosherwa ngemarukumbati akaguma mudenga! Takaona apo vakororo vaAnaki.”

²⁹ Naapo ndakati kwomuri, “Musaita maharura nokuti kuvatya.

³⁰ Mambo Mwari, Mwari wenyu uwo unohamba pamberi penyu, ndiye unozomurwira, kudai ndizvo zveshe zvaakamuitira munyika yeEgipite pamberi pokuona kwenyu,

³¹ nomushango, apo pemwakaona njira yaakamutwara ndiyo Mambo Mwari, Mwari wenyu, kudai ngomunhu womwamuna unopakata mukororo wake, mukati mwenjira dzeshe dzemwakahamba ndidzo, metsa mwakaguma kundau iyi.”

³² Kunyazwi zvaiya zvakadaro amuzi kugonda kunaMambo Mwari, Mwari wenyu,

³³ uwo wakamutungamirira munjira yenyu, kuti amutsvakire ndau yokuemesa mathende enyu, ngokumujekisira njira usiku ngomuriro nemasikati ngegore kumuonesa njira yomunosisira kuhamba ndiyo.

Mambo Mwari Unoorora Isuraeri

³⁴ Naapo Mambo Mwari azwa mazwi enyu, wakatseneka, akapika, echiti,

³⁵ “Ngegwinyiso akuna noumwe weiri dzinza risikazi kururama unozoona nyika yendakapika ndiyo kuti ndiipe kunemadzibaba enyu,

³⁶ kwega Kharebhu mukororo waJefune. Iye unozoiona, nokwaari ndinozopa nyika yaakahamba ngetsoka nokunevana vake, ngokuti iye wakateera Mambo Mwari ngokwakaperera.”

³⁷ Kunyazwi neni Mambo Mwari wakanditsenekera ngendaa yenyu echiti, “Newewo auzopoterimwo.

³⁸ Joshua mukororo waNuni, mudetseri wako, unozopoteremwo; mushingisenyi, ngokuti ndiye unozoita kuti vaIsuraeri vagare nhaka yayo.

³⁹ Vadoko venyu, vemwaiti, ‘Vanozoita vakachakatwa,’ vana venyu, avo nanyamashi avasati vazia kupaura pakati pezvakanaka nezvakashata, ndivo vanozopoteremwo; ndinozoipa kwavari, vanozogara nhaka yayo.

⁴⁰ Asi kwomuri kunukukai muhwirire mushango ngenjira yoRuandhle Rwakatsvuka.”

⁴¹ Zvino imwimwi mwakapingura mwechiti, “Takashaisha kunaMambo Mwari! Tadzinasirira kukwireyo tiambane, kudai ndizvo zveshe zvaakatipanga Mambo Mwari, Mwari wedu.” Ndizvo imwimwi mweshe mwapakatira munhu weshe zvokurwa zvenyu, mwanasirira kuti mukwire kunyika yemitunhu.

⁴² Mambo Mwari wakati kwendiri, “Varonzere kuti vasakwireyo, nokuti kurwa; ngokuti inini andisiri pakati penyu akadi kuti musazonyiswa ngemagaa enyu.”

⁴³ Kunyazwi ndakaereketa kwomuri, amuzi kundipurutana; asi mwakamukira chironzo chaMambo Mwari, mwakaita manyau mukakwira mutunhu.

⁴⁴ VaAmori vaigara munyika yemitunhu, vakabuda kurwa nemwi, vakamurumbirira, kudai ngezvedzinoita nyuchi.Vakamuparadza muSeira, metsa kuguma Horma.

⁴⁵ Naapo mwapetuka mwakachema pamberi paMambo Mwari, Mambo Mwari aazi kuzwa izwi renyu nokuti kumupurutana.

Makore omuShango

⁴⁶ Ndizvo imwimwi mwakagara muKadheshi mazuva kudai ngouwandu hwemazuva emwakagara apo.