Dha. 9 - Bhaibheri Rakachena muChindau

Dhanieri Unokumbirira Vanhu Vake

¹ Mugore rokutanga raDhariusi mukororo waAhasuerusi, weverudzi rwevaMedhe, uwo wakaitwa mambo padera poumambo hwevaKharadhea;

² mugore rokutanga rokutonga kwake, inini Dhanieri ndakazwisisa kubva mubhuku uwandu hwemakore, kuti kudai ngeizwi raMambo Mwari rakauya kunaJeremia muprofeti, rinosisira kuti rizadzisike kuparadzwa kweJerusarema, anozoita makore makumi manomwe.

³ Zvino ndaringirisa hope yangu kwaari Mambo Mwari, Mwari, kutsvaka mupinguro ngokukumbira nokupota, pamwepo nokuera kudya nokupfeka machira emasaka nemarota.

⁴ Ndakakumbira kunaMambo Mwari, Mwari wangu, ndikatenda zvishaishi, ndikati, “A Mambo Mwari, Mwari mukuru unotyisa, uwo unongwarira chitenderano norudo runenyasha kwevari vanomuda, nokwevari vanongwarira mipango yake,

⁵ takashaisha, takapauka, tikaita zvakashata, takamukira, ngokusiya mipango yako nokubva kuzvitongero zvako.

⁶ Atizi kupurutana kuvaranda vako vaprofeti, avo vakaereketa ngezina rako kumadzimambo edu, vatongi vedu, nemadzibaba edu, nokwevari vanhu veshe venyika.

⁷ O Mambo Mwari, kururama kuri kwouri, asi kwetiri kutsveruka kwehope, kudai ngezviripo nyamashi, kwevari vanhu vaJudha nevagari vemuJerusarema, nokwevari vaIsuraeri veshe, avo vari pasinde, naavo vari kuretu, kunyika dzeshe kwowakavadzingira, ngendaa yokushaisha kwevakaita kwouri.

⁸ O Mambo Mwari, kutsveruka kwehope kuripo pamhene kunowira padera pedu, kumadzimambo edu, kuvatongi vedu, nokumadzibaba edu, ngokuti takashaisha kwouri.

⁹ KunaMambo Mwari, Mwari wedu, dziripo nyasha nokurekererwa, kunyazwi takamumukira;

¹⁰ nesu, atizi kupurutana izwi raMambo Mwari, Mwari wedu, ngokuhamba ngemipango yake yaakaisa pamberi pedu ngevaranda vake vaprofeti.

¹¹ VaIsuraeri veshe vakagura mupango wako, ngokupauka, vakaramba kuti vasazopurutana izwi rako. Ndizvo chituko chakadururwa padera pedu, nokupika ukwo kwakanyorwa mumipango yaMosi, muranda waMwari, ngokuti takamushaishira.

¹² Wakagwinyisa mazwi ake, aakatiereketera, nokuvatongi vedu, avo vakatitonga, ngokuunza padera pedu kushata kukurutu, kwaitirwa Jerusarema akuzi kumboitika nakamwe pashi pedenga reshe.

¹³ Kudai ngezvezvakanyorwa mumipango yaMosi, kweshe kushata uku kwauya padera pedu. Atizi kukumbira nyasha kunaMambo Mwari, Mwari wedu, kuti titenderuke kubva mukushata kwedu, tizwisise gwinyiso rako.

¹⁴ Ndizvo Mambo Mwari wakaramba akarinda zvakashata, metsa azviunza padera pedu. Ngegwinyiso Mambo Mwari, Mwari wedu, uri wakarurama mumishando yake yeshe yaanoita; ngokuti atizi kupurutana izwi rake.

¹⁵ “Nazvino, O Mambo Mwari, Mwari wedu, iwewe wakabudisa vanhu vako kubva munyika yeEgipite ngenyara inesimba, ukadzionera mbiri metsa nyamashi; takashaisha, tikaita zvakashata.

¹⁶ O Mambo Mwari, kudai ngokururama kwokuita kwako kweshe, kunyangadzwa kwako noushungu hwako, tinokumbira, ngazvipetudzwe kubva kudhorobha rako Jerusarema, mutunhu wako wakacheneswa; ngendaa yezvishaishi zvedu nokushata kwemadzibaba edu, Jerusarema nevanhu vako vaitwa chitsverudzo ndivo veshe vaakirwana vedu.

¹⁷ Zvino, O Mwari wedu, purutana mukumbiro womuranda wako nokupota kwake, ngendaa yako ita kuti hope yako ijeke padera pendau yako yakacheneswa iyo yakaita matongo.

¹⁸ O Mwari wangu, kotamisa nzee yako, uzwe. Beura madziso ako, uone matongo edu, nedhorobha rinodaidzwa ngezina rako. Atiunzi kupota kwedu pamberi pako ngendaa yokururama kwedu, asi ngendaa yenyasha dzako huru.

¹⁹ O Mambo Mwari, izwa; O Mambo Mwari, kungurira; O Mambo Mwari, purutana, uite, usanonoka! Ngendaa yako, O Mwari wangu, ngokuti dhorobha rako nevanhu vako vanodaidzwa ngezina rako.”

Gabhurieri Unodudzira Chiprofeti

²⁰ Naapo ndichaereketa nokukumbira, nokutenda kushaisha kwangu nokushaisha kwevanhu vangu Isuraeri, nokuisa kupota kwangu pamberi paMambo Mwari, Mwari wangu, ngendaa yomutunhu wakacheneswa waMwari wangu,

²¹ naapo, ndichaereketa mukukumbira, Gabhurieri emene, uwo wendakaona muchioniso chokutanga, echitumwa kumbururuka ngokukasira, wakandigwama kudai ngomukuwo wokupira mudiro wemadeekoni.

²² Wakauya akati kwendiri, “O Dhanieri, ndabuda zvino kukupa ungwaru nokuzwisisa.

²³ Pakutanga kwokupota kwako izwi rakabuda, neni ndauya kukuronzera, ngokuti unodikanwa kakurutu. Ndizvo pinimidza ngeizwi, uzwisise chioniso.

²⁴ “Mavhiki makumi manomwe akaemeswa ngomupango padera pevanhu vako nepadera pedhorobha rako rakacheneswa, kupedza ndaa, nokupedza zvishaishi, nokuunza kuiyanisa ngendaa yokushata, nokuunza kururama kusikaperi, nokukonya ngechinamiro zvioniso nokuprofeta, nokudzodza Uwo wakapindisisa kuchena.

²⁵ Ndizvo zia uzwisise: Kubvira pakubuda kwomupango wokunasira nokuaka Jerusarema, kuguma kumukuwo woWakadzodzwa, mutongi, kunozoita mavhiki manomwe; nemavhiki makumi matanhatu nemairi rinozoakwazve rinepato norukumbati, ngemikuwo yokutambudzika.

²⁶ Ngesure kwemavhiki makumi matanhatu nemairi Wakadzodzwa unozogurwa, aazoapo kwevari; nevanhu vomutongi uwo unozouya, vanozoparadza dhorobha nendau yakacheneswa. Nokupera kwazvo kunozodai ngendambi, nokurwisana kunozoapo metsa pakupera, nokuparadzwa kwakaemeswa.

²⁷ Unogwinyisa chitenderano nevazhinji vhiki rimwe, nepakati pevhiki unozoita kuti mubairo nomudiro zvirekwe; nomukuwo wouwandu hwezvinonyangadza kunozouya uwo unoparadza, metsa kugume zvakaperera, neizvo zvakaemeserwa, ushungu hunozodururwa padera pomuparadzi.”