Dha. 8 - Bhaibheri Rakachena muChindau

Chioniso chaDhanieri cheGondohwe neGotokoto

¹ Mugore rechitatu rokutonga kwamambo Bherishaza, chioniso chakaoneka kwendiri, inini Dhanieri, ngesure kwechimwe chakaoneka kwendiri pakutanga.

² Muchioniso ndairingira, ndikadziona pachangu muSusa dhorobha guru, munyika yaEramu; ndaiya parwizi runozwi Urai.

³ Naapo ndakaringira, neni ndakaona gondohwe rakaema pasinde porwizi raiya nenyanga mbiri. Nyanga dzeshe dzaiya dzakareba, imwe yaiya yakapinda kureba kune imweni, neiyo yaiya yakapinda kureba yakagumisira kubuda.

⁴ Ndakaona gondohwe rechihamba kuenda kumabirirazuva nedera nokubani. Zvikara zveshe zvaiya zvisina simba rokuriemera, apana naumwe waiya nesimba rokununura kubva kusimba raro; rakaita kudai ngokuda kwaro, naro rakakura.

⁵ Naapo ndichapinimidza, ringira, gotokoto rakauya kubva kumabirirazuva padera pehope yenyika yeshe, risikazi kugwama mavhu. Gotokoto raiya nenyanga pakati pemadziso aro.

⁶ Rakauya kunegondohwe raiya nenyanga mbiri, rendakaona rechiema pamberi porwizi, rakarumba kweriri ngoushungu hwesimba raro.

⁷ Ndakariona rechikwedzera kunegondohwe. Rakanyangadzwa ndiro, rakatunga gondohwe, rikagura nyanga dzaro mbiri. Gondohwe raiya risina simba rokuemesedzana negotokoto; rakakandira gondohwe pashi pamavhu, rikaritsikatsika; akuna naumwe waiya nesimba rokununura gondohwe kubva kusimba raro.

⁸ Zvino gotokoto rakaangirira kukura kakurutu kuita gurutu; asi paurebu hwesimba raro, runyanga rukuru rwakagurwa; pandau yarwo dzakabuda nyanga murongomuna dzinembiri kumadutu marongomuna omudenga.

⁹ Kubva kuneimwe yadzo murongomuna rwakabuda runyanga rudoko, urwo rwakaita rukuru kakurutu kubani, nokumabvazuva, nokunyika inouthende.

¹⁰ Rwakakura kureba metsa kuguma kunehondo yomudenga. Rwakakandira pashi pamavhu zvimweni zvehondo yomudenga nenyeredzi dzimweni, rukazvitsikatsika.

¹¹ Kunyazwi rakadzikudza kupinda mutongi wehondo yomudenga; nomubairo wokupisha wezuva rimwe ngarimwe wakabviswa ndiro kubva kwaari, nendau yake yakachena yakakandirwa pashi.

¹² N gendaa yokushaisha hondo yomudenga yakapirwa kweiri pamwepo nomubairo unopishwa zuva ngezuva; naro rakakandira pashi pamavhu gwinyiso, rikaangira kubudirira munezverakaita.

¹³ Zvino ndakazwa umwe wakacheneswa echiereketa, noumweni wakacheneswa wakati kwaari uwo wakaereketa, “Chioniso ichi chendaa yomubairo unopishwa zuva ngezuva, chinozogara mukuwo wakadini, nokushaisha kunoparadza, nokupira kwendau yakacheneswa nehondo kuti zvitsikwetsikwe pashi ngetsoka?”

¹⁴ Naye wakandipingura, “Chinozogara mazuva makumi emazana mairi nemazana matatu (2,300) mangwanani nemadeekoni; naapo ndau yakacheneswa inozopetudzwa pandau yayo yakasukika.”

Ngirosi Gabhurieri Unodudzira Chioniso

¹⁵ Naapo inini, Dhanieri, ndaona chioniso, ndakaedza kuzwisisa. Ringira, wakaema pamberi pangu muemo wakadai ngowomunhu,

¹⁶ neni ndakazwa izwi romunhu pakati pemahumbikumbi aUrai, rakadaidza rechiti, “Gabhurieri, ita kuti munhu uyu azwisise chioniso.”

¹⁷ Ndizvo wakakwedzera apo pendakaema; naapo akwedzera, ndakatya, ndikawa ngehope pashi. Asi wakati kwendiri, “Zwisisa, O mukororo womunhu, kuti chioniso chiri chomukuwo wokugumisira.”

¹⁸ Naapo achaereketa neni, ndaiya ndakaata hope dzemadzikirira, hope yangu iri pamavhu; zvino wakandigwama, akandimirudza akandiemesa ngetsoka dzangu.

¹⁹ Naye wakati, “Purutana, ndinozokuronzera zvinozoitika ngomukuwo wokugumisira woushungu; ngokuti zvinoronza mukuwo wakaemeswa wokugumisira.

²⁰ Gondohwe rowakaona rinenyanga mbiri, aya madzimambo eMedhe neePhesia.

²¹ Gotokoto rinemviri ndimambo weGirisi, norunyanga rukuru ruri pakati pemadziso aro, ndimambo wokutanga.

²² Ngendaa yenyanga rakagurwa, pandau yarwo apo pakabuda amweni marongomuna, umambo hurongomuna hunozobuda mudzinza iro, asi husina simba rake akadi.

²³ “Pamagumo outongi hwavo, apo kushaisha kwavo kwawanda, mambo unehope inotyisa, nounozwisisa zvakafishika, unozoema.

²⁴ Unozokura akagwinya musimba, unozoita kuparadzwa kunotyisa, unozobudirira munezvaanoita. Naye unozouraya vanesimba, nevanhu vakacheneswa.

²⁵ Ngourimbwi hwake unozoita kuti kuchengedzera kunyise munyara mwake; mukupinimidza kwake unozodzikudza. Pasina nyowedzo unozoparadza vakawanda, nokurwisa Mutongi wevatongi. Asi unozogurwa, haiwa ngenyara yomunhu.

²⁶ Chioniso chemadeekoni nechemangwanani, icho chakaronzwa, igwinyiso. Asi iwewe, fisha chioniso; ngokuti ngechemazuva mazhinji achauya.”

²⁷ Ndizvo inini, Dhanieri, ndakademera, ndakarwara mazuva akatikuti; ndorondomiruka, ndikaita mushando wamambo. Asi ndakashamiswa ngechioniso, andizi kuchizwisisa.