Dha. 7 - Bhaibheri Rakachena muChindau

Chioniso chaDhanieri cheZvikara Zvirongomuna

¹ Mugore rokutanga raBherishaza mambo weBhabhuroni, Dhanieri wakarota hope, nezvioniso zvesoro rake padera pomubhedhi wake. Zvino wakanyora hope, akaronza ndaa yeshe.

² Dhanieri wakaereketa akati: “Ndakaona muchioniso changu usiku, ringira, madutu marongomuna omudenga echivhuvhuta paruandhle rukuru.

³ Zvikara zvirongomuna zvikuru zvakabuda kubva muruandhle, zvakasiyana chimwe kunechimweni.

⁴ Chokutanga chaiya chakadai ngemhondoro, chinemaphaphiro egodzi. Zvino ndakaringira, maphaphiro acho akatapurwa, nacho chakamirudzwa kubva pamavhu, chakaemeswa ngetsoka mbiri kudai ngomunhu, nomwoyo womunhu wakapuwa kwechiri.

⁵ Ringira, chikara chimweni, chechipiri, chakadai ngebere, chakamirudzwa ngorutii rumwe, nenhii nhatu dzaiya mumuromo wacho pakati pemazino acho; navo vakaereketa ichi kwechiri vechiti, ‘Miruka, udye nyama yakawanda.’

⁶ “Ngesure kweizvi, apo ndakaringira, ringira, chimweni chakadai ngekhamba, chinemaphaphiro marongomuna eshiri pamushana wacho, nechikara chaiya nemasoro marongomuna; nokutonga kwakapuwa kwechiri.

⁷ Ngesure kweizvi ndakaona muzvioniso zvousiku, ringira, chikara chechirongomuna, chinotyisa, chakagwinya kakurutu. Chaiya nemazino makuru esimbi; chakadya kupwanya kuita zvigurwa, nokutsikatsika zvakasara ngetsoka dzacho. Nacho chaiya chakasiyana nezvikara zveshe zvakatanga pamberi pacho; chaiya nenyanga gumi.

⁸ Ndakaringisisa nyanga, ringira, rwakabuda pakati padzo runyanga rumwe rudoko; pamberi parwo nhatu dzeidzo nyanga dzokutanga dzakabviswa ngenzinde. Ringira, mukati mworunyanga urwu mwaiya nemadziso akadai ngemadziso omunhu, nomuromo unoereketa kudzikudza.

Chioniso choUwo Umwe Uwo Waiya Echipona Mhera naRiini

⁹ “Naapo ndakaringira metsa madendemaro akaiswa mundau dzawo pashi, noumwe Uwo waiya Musharuka wekaretu wakagara padendemaro rake. Zvokusimira zvake zvaiya zvakachena kudai ngechando, nebvudzi resoro rake raiya rakadai ngemamviri akachena; dendemaro rake raiya rakadai ngemirazvu yomuriro, nemavhiri aro akadai ngomuriro unobaka.

¹⁰ Chinyuka chomuriro chakabuda chechibva pamberi pake. Makumi emazana emakumi emazana akamushandira, makumi emazana gumi akapetwa kagumi akaema pamberi pake. Kutongwa kwakatanga, nemabhuku akabeurwa.

¹¹ “Ndakaringira zvino ngendaa yebope remazwi makuru okudzikudza aiereketwa ngorunyanga. Naapo ndakaringira, chikara chakaurawa, nomuiri wacho wakaparadzwa, nacho chakapirwa kupishwa ngomuriro unobaka.

¹² Asi zvimweni zvikara, kutonga kwazvo kwakaduswa, asi kupona kwazvo kwakarebeswa nguva yakatikuti.

¹³ Naapo ndakaringira muzvioniso zvousiku, ringira, wakauya nemakore omudenga umwe wakadai ngomukororo womunhu, naye wakauya kuMusharuka weMazuva, vakamukwedzedza pamberi pake.

¹⁴ Kwakapuwa kwaari kutonga, nouthende, noumambo, kuti vanhu veshe, madzinza nendimi vamushandire. Kutonga kwake kutonga mhera nariini, akuzopindi, noumambo hwake huri husikazoparadzwi.

Zvioniso Zvinodudzirwa

¹⁵ “Asi inini Dhanieri, mweya wangu waitambudzika mukati mwomuiri wangu, nezvioniso zvesoro rangu zvakandityisa kakurutu.

¹⁶ Ndakakwedzera paneumwe waavo vakaema pasinde, ndikamubvunza gwinyiso reizvi zveshe. Ndizvo wakati, unozondiziisa dudziro yazvo:

¹⁷ ‘Izvi zvikara zvikuru zvirongomuna, zviri madzimambo marongomuna, anozomiruka kubva kunyika.

¹⁸ Asi vakacheneswa voUwo-Uri-padera-pazveshe vanozoashira umambo, vagare nahwo mhera nariini nariini.’

¹⁹ Zvino ndakada kuzia gwinyiso ngechikara chechirongomuna, chaiya chakasiyana nezvimweni zveshe, chinotyisa kakurutu, ngemazino acho esimbi nendwara dzacho dzethusi; icho chakadya nokupwanya kuita zvigurwa, nokutsikatsika zvakasara ngetsoka dzacho;

²⁰ nangendaa yenyanga gumi, idzo dzaiya pasoro racho, nendaa yenyanga imweni iyo yakabuda, kupa ndau iyo yedzakawa ndiyo nhatu; runyanga urwo rwaiya nemadziso, nomuromo uwo wakaereketa zvikuru kudzikudza, urwo kuringirika kwarwo kwaiya kwakapinda kukura kunevangani varwo.

²¹ Ndakaringira, runyanga rurirwo rwakarwa nevakacheneswa, rukavanyisa,

²² metsa Musharuka weMazuva wakauya; zvino kutonga kwakapuwa kwevari vakacheneswa voUwo-Uri-padera-pazveshe, nomukuwo wakauya kuti vakacheneswa vatore nhaka.

²³ “Izvi ndizvo zvaakaronza kuti, ‘Ngendaa yechikara chechirongomuna, hunozoapo umambo hwechirongomuna padera penyika, uhwo hunozosiyana noumambo hweshe, nahwo hunozopedza nyika yeshe, nokuitsikatsika pashi, nokuipwanya kuita zvigurwa.

²⁴ Ngendaa yenyanga gumi, kubva kuumambo uhwu anozomiruka madzimambo gumi, noumweni unozomiruka ngesure kwavo. Uyu unozoita wakasiyana nevokutanga, unozonyisa madzimambo matatu.

²⁵ Unozoereketa mazwi akakura okurwisa uwo Uri-padera-pazveshe, unozopedza vakacheneswa voUri-padera-pazveshe, unozopinimidza kutsandudza mikuwo yakachena nemipango; navo vanozopuwa munyara mwake kwomukuwo, nemikuwo miiri, norupande rwomukuwo.

²⁶ Zvino kutonga kunozogara kugura ndaa, kutonga kwake kunozoduswa, kupedza nokuhuparadza, metsa pakupera.

²⁷ Umambo noutongi noukuru hwoumambo pashi pedenga reshe zvinozopuwa kuvanhu vakacheneswa voUri-padera-pazveshe, uwo umambo hwavo huri umambo hwemhera nariini, noutongi hweshe hunozovashandira nokuvapurutana.’

²⁸ “Pano ndipo panoperera ndaa. Asi inini Dhanieri, mipinimidzo yangu yakandityisa kakurutu, nehope yangu yakatsanduka; asi ndakangwarira ndaa yeshe mumwoyo mwangu.”