Dha. 6 - Bhaibheri Rakachena muChindau

Dhanieri muRindi reMhondoro

¹ Zvakadakadza Dhariusi kuemesa padera poumambo nduna dziri zana nemakumi mairi (120), kuti dzitonge padera poumambo hweshe,

² nepadera paava, nduna huru nhatu, umwe wadzo waiya Dhanieri; kuti idzo nduna dzipinze ndaa dzeshe kwevari, kuti mambo asazoneswa.

³ Ngokukasira Dhanieri uyu wakaremeredzwa kupinda nduna huru nenduna doko, ngokuti mweya wakanakisisa waiya mukati mwake, namambo wakapinimidza kumuemesa padera poumambo hweshe.

⁴ Ndizvo nduna huru nenduna doko dzakatsvaka kuti dzaone ndaa kunaDhanieri ngezvoumambo. Asi adzizi kuona ndaa nokuti chaakashaisha, ngokuti waiya unogondeka, kwaiya kusikazi kuoneka kushaisha nokuti ndaa kwaari.

⁵ Vamuna vakati, “Atizooni ndaa munaDhanieri uyu, kwega kuti tiione kwaari ngomupango waMwari wake.”

⁶ Ndizvo idzi nduna huru nedoko dzaungana kunamambo, dzakaronza izvi kwaari, “Mambo Dhariusi, pona mhera nariini!

⁷ Dzeshe nduna huru nedoko dzoumambo, nhumwa, makota, nevakuru, vakapangana kuemesa mutemo wamambo nokuita mupango wakagwinya, kuti kunyazwi ndiani uwo unozokumbira mukumbiro kunaMwari nokuti chimwari, nokuti kumunhu, mumazuva makumi matatu, kwega kwouri mambo, unozokandirwa murindi remhondoro.

⁸ Zvino, O mambo, emesa mupango, uise zina rako pezvakanyorwa, kuti zvisazotsandurwa, kudai ngomupango wevaMedhe navaPhesia, uwo usikatsandurwi.”

⁹ Ndizvo mambo Dhariusi wakaisa zina rake pewakanyorwa mutemo.

¹⁰ Kunyazwi Dhanieri azia kuti zvakanyorwa zvakaiswa zina, wakaangira kupotera mumhatso mwake, iyo yaiya nemafasitera akabeuka mukamera rake romuturika, akaringirana neJerusarema; naye wakagwadama ngemabvi ake katatu ngezuva kukumbira kuna Mwari wake nokumukudza, kudai ngezvaaiita nguva dzeshe.

¹¹ Zvino vamuna ava vakauya, vakaona Dhanieri echikumbira nokupota pamberi paMwari wake.

¹² Zvino vakakwedzera kuuya pamberi pamambo, vakati ngendaa yomupango wamambo, “O mambo, auzi kuisa zina rako here kumutemo, kuti vanhu veshe vanozoita mukumbiro kunaMwari nokuti chimwari, nokuti munhu mumazuva makumi matatu, kwega kwouri, mambo, vanozokandirwa murindi remhondoro?” Mambo wakapingura, akati, “Zvine gwinyiso, ngomutemo wevaMedhe nevaPhesia, usikapinduki.”

¹³ Zvino vakaereketa, vakati pamberi pamambo, “Uwo Dhanieri, umwe wevana voubatwa hwaJudha, aapinimidzi ndiwe, O mambo, nokuti ngomutemo wowakaisa zina, asi unoita mikumbiro yake katatu ngezuva.”

¹⁴ Naapo mambo azwa aya mazwi, wakaneswa kakurutu, akaemesa mwoyo wake kunaDhanieri kumununura; akashanda metsa pakupota kwezuva kumurwira.

¹⁵ Zvino vamuna ava vakaungana kunamambo, vakati kwaari, “Zia, O mambo, kuti mutemo wevaMedhe navaPhesia kuti akuna mutemo nokuti chiemeso chaanogwinyisa mambo chingatsandurwa.”

¹⁶ Zvino mambo wakapanga, navo vakaunza Dhanieri, vakamukandira murindi remhondoro. Zvino mambo wakaereketa, akati kunaDhanieri, “Mwari wako wounogara wechidira ngokugondeka ngaakununure.”

¹⁷ Nebuwe rakaunzwa, rikaradzikwa pamuromo werindi; namambo wakarinamira echipfanya ngendandazi yake, nendandazi yemakurukota ake, kuti chakaemeswa ngendaa yaDhanieri chisazotsandurwa.

¹⁸ Zvino mambo wakaenda kungome yake, usikuhwo aazi kudya; akuna kudya kwakaunzwa kwaari, nehope dzake dzakamutiza.

¹⁹ Naapo kwoedza mambo wakafumira, akaenda ngokukasira kurindi remhondoro.

²⁰ Naapo aguma pasinde perindi, wakadaidzira kunaDhanieri ngeizwi rokusvipo mwoyo; namambo wakaereketa, akati kunaDhanieri, “O Dhanieri, muranda waMwari unopona, Mwari wako, wounogara wechidira, unesimba here rokukununura kumhondoro?”

²¹ Dhanieri zvino wakati kunamambo, “O mambo, pona mhera nariini!

²² Mwari wangu wakatuma ngirosi yake, nokukonya miromo yemhondoro, nadzo adzizi kundiremadza, ngokuti ndakaoneka ndisina ndaa pamberi pake; nepamberi pakowo, O mambo, andizi kuita chakashata.”

²³ Zvino mambo wakadakara kakurutu, akapanga kuti vakwidze Dhanieri kubva murindi. Ndizvo Dhanieri wakakwidzwa kubva murindi, akuna nokuremadzwa kwakaoneka kwaari, ngokuti wakagonda munaMwari wake.

²⁴ Mambo wakapanga, naavo vamuna vakaitira ndaa Dhanieri, vakaunzwa vakavakandira murindi remhondoro, ivo, vana vavo nevakadzi vavo. Vasati vaguma pashi murindi, mhondoro dzakavanyisa, dzikapwanya eshe magodo avo kuita zvigurwa.

²⁵ Zvino mambo Dhariusi wakanyora kuvanhu veshe, kumadzinza nendimi, avo vakagara munyika mweshe, kuti. “Kunyarara ngakuwanzwe kwomuri!

²⁶ Ndinoemesa chiemeso, kuti mukutonga kweshe kwoumambo hwangu vanhu ngavahute nokutya pamberi paMwari waDhanieri: “Ngokuti ndiMwari unopona, naye wakagwinya mhera nariini. Umambo hwake ndihwo husikaparadzwi, nokutonga kwake akuna magumo.

²⁷ Unonunura nokurwira, naye unoita zvioniso nemishamiso mudenga nomunyika; ngokuti wanunura Dhanieri kubva kusimba remhondoro.”

²⁸ Ndizvo uyu Dhanieri wakabudirira mukutonga kwaDhariusi nomukutonga kwaSairusi muPhesia.