Dha. 4 - Bhaibheri Rakachena muChindau

Kurota kwaNebhukhadhineza kweChipiri

¹ Nebhukhadhineza mambo, kwevari vanhu veshe, madzinza, nendimi vanogara munyika dzeshe: “Kunyarara ngakuwanzwe kwomuri.

² Zvioniso nemishamiso zvaakaita kwendiri Mwari Uri padera pazvo zveshe, ndinodakara kumuronzera.

³ “Kukuranyi kwezvioniso zvake! A, kugwinya kwemishamiso yake! Umambo hwake umambo hwemhera nariini, nokutonga kwake kunobvira kumubarirwana kuenda kumubarirwana.

⁴ “Inini Nebhukhadhineza ndaiya ndakazorora mumhatso yangu, ndechidakara ngokubudirira mungome yangu.

⁵ Ndakarota hope idzo dzakandityisa; mipinimidzo yangu pamubhedhi wangu nezvioniso zvesoro rangu zvakanditambudza.

⁶ Ndizvo ndakaemesa mutemo kuti vaunzwe veshe vanhu vakangwara veBhabhuroni pamberi pangu, kuti vandidudzire zvinoronza hope.

⁷ Zvino man'anga, vanomukirwa, vaKharadhea, nevafemberi vakapotera, neni ndakavaronzera hope pamberi pavo, asi avazi kundironzera zvedzaironza.

⁸ Pakupedzisira Dhanieri wakapotera pamberi pangu, uwo zina rake raizwi Bheriteshaza, wakadudzwa zina rechimwari changu nouwo unomweya wezvimwari zvakacheneswa; neni ndakamuronzera hope pamberi pake:

⁹ O Bheriteshaza, mukuru weman'anga, ndinozia kuti wakagarwa ngomweya wezvimwari zvakacheneswa mukati mwako, akunazve chakafishika chinokukonzera. Izwa hope dzangu dzendakarota, ndironzere zvedzinoronza.

¹⁰ “Ndiri pamubhedhi wangu izvi ndizvo zvendakaona: Ringira paiya nomuti pakati penyika, nourebu hwawo hwaiya hwakakura.

¹¹ Muti wakakura kuita mukuru nokugwinya, nourebu hwawo hwakaguma mudenga, nokuoneka kwawo kumagumo enyika dzeshe.

¹² Mashakani awo aiya akanaka, nemichero yawo yakawanda, wakabudisa kudya kweveshe. Mhuka dzeshango dzakaona bvute pashi pawo, shiri dzomudenga dzakagara mumatai awo, nezvinopona zveshe zvakadya kwouri.

¹³ “Ndakaangira kuringira muzvioniso zvesoro rangu padera pomubhedhi wangu, ringira, uwo unorinda nowakacheneswa wakadzaka kubva mudenga.

¹⁴ Wakadaidzira, akati, ‘Tema muti, ugure matai awo, zuwa mashakani awo, uparadze michero yawo. Mhuka ngadzibve pashi pawo, neshiri ngadzibve pamatai awo.

¹⁵ Asi siya guri nenzinde dzawo mumavhu, rinebhande resimbi nethusi, munduhwe yomushango. Ngaanyakatiswe ngebeto romudenga, nechikoaniswa chake ngachiapo nemhuka dzomushango mumwenje wenyika.

¹⁶ Mwoyo wake ngautsandudzwe kubva kwowomunhu, upuwe kwaari mwoyo wemhuka. Mikuwo minomwe ngaipinde padera pake.

¹⁷ Kugura uku kwaitwa ngomutemo wevarindi, nendaa yagurwa ngeizwi raavo vakacheneswa, kuitira kuti avo vanopona vazie kuti Uri-padera-pazveshe unotonga muumambo hwavanhu nokuupa kunouwo waanotsanangura, nokuemesera padera pahwo uwo uri pashi pavanhu.’

¹⁸ “Idzi ndidzo hope dzendakarota, inini mambo Nebhukhadhineza. Zvino iwewe, Bheriteshaza, dudzira zvedzinoronza, ngokuti vanhu veshe vakangwara voumambo hwangu avakoni kundidudzira zvedzinoronza. Iwewe unokona, ngokuti mweya wezvimwari zvakachena unogara mukati mwako.”

Dhanieri Unodudzira Hope

¹⁹ Zvino Dhanieri, uwo zina rake raizwi Bheriteshaza, wakashamiswa kwekamukuwo, nemipinimidzo yake yakamutyisa. Mambo wakati, “Bheriteshaza, hope nokuti kududzirwa kwadzo zvisakutyisa.” Bheriteshaza wakapingura, akati, “Mambo wangu, hope ngadziitike kwevari avo vanokunyenya, nokududzirwa kwadzo kumagaa ako.

²⁰ Muti wowakaona, uwo wakakura, wakagwinya, urebu hwawo hwakaguma mudenga, nokuoneka kwawo kumagumo enyika dzeshe,

²¹ uwo mashakani awo aiya akanaka, nemichero yawo yakawanda, nomukati mwawo munokudya kwaavo veshe; pashi pawo mhuka dzomushango dzakagara, nepadera pematai awo shiri dzomudenga dzaiya nendau dzadzo dzokugara,

²² iwewe, O mambo! Wakakura kuita mukuru nokugwinya. Ukuru hwako hwakakura, nahwo hwakaguma mudenga, nokutonga kwako kunoguma kunyika dzeshe.

²³ Naapo mambo echiona uwo unorinda wakachena echidzaka kubva mudenga echiti, ‘Tema muti uyu, uuparadze, asi usiye guri nenzinde dzawo mumavhu, rinebhande resimbi nethusi, munduhwe yeshango; ngaanyakatiswe ngebeto romudenga, nechikoaniswa chake ngachiyapo nemhuka dzomushango, metsa mikuwo minomwe ipinde padera pake.’

²⁴ “Uku ndikwo kududzirwa, O mambo, nacho chiri mutemo woUri-padera-pazveshe unoguma padera pamambo, tenzi wangu.

²⁵ Vanozokudzinga kubva kuvanhu, nougaro hwako hunozoita nemhuka dzomushango, newe unozopuwa mwenje kudya, kudai ngen'ombe, unozonyakatika ngebeto romudenga, nemikuwo minomwe inozopinda padera pako, metsa uzie kuti Uri-padera-pazveshe unotonga muumambo hwevanhu, nokuupa kunouwo waanotsanangura.

²⁶ Kudai ngezvekwakapangwa kusiya guri nenzinde dzomuti, umambo hwako hunozogwinyiswazve kwouri, kubvira pamukuwo pounozozia kuti denga rinotonga.

²⁷ Ndizvo, O mambo, tendera kupanga kwangu kuti kuashirike kwouri, urekere zvishaishi zvako ngokuita zvakarurama, nokushata kwako ngokuitira nyasha varombo; pamweni kungaapo kurebeswa kwokugarisika kwako.”

²⁸ Zveshe izvi zvakaitika kunamambo Nebhukhadhineza.

²⁹ Pakupera kwemwedzi gumi nemiiri iye echihamba padera pengome youmambo hweBhabhuroni,

³⁰ mambo wakati, “Iri andiro here Bhabhuroni guru rendakaaka kuita ugaro hwoumambo ngokugwinya kwesimba rangu, nokuita uthende hwoumambo hwangu?”

³¹ Apo mazwi achiri mumuromo wamambo, kwakazwika izwi rechibva mudenga rechiti, “O mambo Nebhukhadhineza, kunoronzwa kwouri kuti: Umambo hwabva kwouri.

³² Vanozokudzinga kubva kuvanhu, nougaro hwako hunozowa nemhuka dzomushango. Unozoitwa kuti udye mwenje kudai ngen'ombe, nemikuwo minomwe inozopinda padera pako, metsa uzie kuti Uri-padera-pazveshe unotonga muumambo hwevanhu, nokuupa kunouwo waanotsanangura.”

³³ Ngokukasira mazwi akazadzisika kunaNebhukhadhineza. Wakadzingwa kubva kuvanhu, akadya mwenje kudai ngen'ombe, nomuiri wake wakanyakatiswa ngebeto romudenga, metsa bvudzi rake rakakura kudai ngenhenga dzegodzi, nendwara dzake kudai ngendwara dzeshiri.

Nebhukhadhineza Unokudza Mwari

³⁴ Naapo mukuwo uwo wapera, inini Nebhukhadhineza ndakamirudza madziso angu mudenga, nokupinimidza kwangu kwakauyazve kwendiri. Ndakakudza Uri-padera-pazveshe, ndikairikidza nokuremeredza Umwe unopona mhera nariini, uwo kutonga kwake kuri kutonga kusikaperi, noumambo hwake hunobvira kumubarirwana kuenda kumubarirwana.

³⁵ Veshe vanogara munyika vanoerengwa kudai ngezvisipo, naye unoita kudai ngokuda kwake ngehondo yomudenga, napakati pavo vanogara munyika. Akuna naumwe ungarambidza nyara yake, nokuti kuronza kwaari kuti, “Unoitenyi?”

³⁶ Ngomukuwo uriwo kuzwisisa kwangu kwakauyazve kwendiri, kuirikidzwa kwoumambo hwangu, ukuru hwangu nouthende hwangu zvakauyazve kwendiri. Vapangi vangu, vakuru vangu vakanditsvaka; ndakaemeswazve muumambo hwangu, nokukura kwakanakisisa kwakatutsirwa kwendiri.

³⁷ Zvino, inini Nebhukhadhineza ndinoirikidza nokukurisa nokuremeredza Mambo womudenga, uwo mishando yake yeshe inegwinyiso, nenjira dzake ngedzokutonga kwakanaka; naavo vanohamba ngokudzikudza iye unesimba rokuvadzasa pashi.