Dha. 3 - Bhaibheri Rakachena muChindau

Nebhukhadhineza unopanga kuti Munhu Weshe Adire Muedzaniso woMukore

¹ Nebhukhadhineza mambo wakaita muedzaniso womukore, kureba kwawo kwaiita mamitha makumi mairi nemanomwe nemamitha matatu kupamhama; wakauemesa murubaya rweDhura, munyika yeBhabhuroni.

² Zvino Nebhukhadhineza mambo wakatuma kuunganidza pamwepo nduna, vakuru voumambo, vatongi venharaunda, vapangi, vangwariri vepfuma, vaiyanisi vendaa, vatongi vendaa, nevatongi veshe venyika, kuti vauye pakugadzikwa kwomuedzaniso waakaemesa mambo Nebhukhadhineza.

³ Ndizvo nduna, vakuru voumambo, vatongi venharaunda, vapangi, vangwariri vepfuma, vaiyanisi vendaa, vatongi vendaa, nevatongi veshe venyika, vakaunganidzwa pamwepo pakugadzikwa kwomuedzaniso waakaemesa mambo Nebhukadhineza. Naapo vakaema pamberi pomuedzaniso uwo waakaemesa Nebhukhadhineza,

⁴ mudaidziri akadaidzira ngesimba, “Munopangwa, O vanhu, madzinza nendimi,

⁵ kuti ngomukuwo womunozozwa kuridzwa kwegwama, munanzi, dimbwi, mbira, chimazambi, ngoma nembeu dzeshe dzokuridza, muwe pashi, mudire muedzaniso womukore waakaemesa mambo Nebhukhadhineza.

⁶ Kunyazwi ndiani usikawi pashi nokudira, ngokukasira unozokandirwa mukati mwechoto chikuru chinobaka ngomuriro.”

⁷ Ndizvo ngokukasira, apo vanhu veshe vakazwa kuridzwa kwegwama, munanzi, dimbwi, mbira, chimazambi, ngoma, nembeu dzeshe dzokuridza, vanhu veshe, madzinza nendimi, vakawa pashi, vakadira muedzaniso womukore waakaemesa mambo Nebhukhadhineza.

Vangani vaDhanieri Vatatu Vanoitirwa Ndaa yoKusikapurutana

⁸ Ndizvo ngouwo mukuwo vaKharadhea vamweni vakauya mberi, vakaitira ndaa vaJudha.

⁹ Vakati kunamambo Nebhukhadhineza, “O mambo, pona mhera nariini!

¹⁰ Iwewe, O mambo, wakaita mutemo, kuti vanhu veshe vechizozwa kuridzwa kwegwama, munanzi, dimbwi, mbira, chimazambi, ngoma, nembeu dzeshe dzokuridza, vanozowa pashi nokudira muedzaniso womukore.

¹¹ Kunyazwi ndiani usikawi pashi echidira, unozokandirwa mukati mwechoto chikuru chinobaka ngomuriro.

¹² Varipo vaJudha vamweni vowakaemesa padera pendaa dzenyika yeBhabhuroni, Shadhirakhi, Meshakhi naAbhedhinego; ava vamuna, O mambo, avazi kukupurutana. Avadiri zvimwari zvako, nokuti kudira muedzaniso womukore wowakaemesa.”

¹³ Zvino Nebhukhadhineza muushungu hwakashata wakapanga kuti vaunzwe, Shadhirakhi, Meshakhi naAbhedhinego; ndizvo vakaunza avo vanhu pamberi pamambo.

¹⁴ Nebhukhadhineza wakati kwevari, “Igwinyiso here, O Shadhirakhi, Meshakhi naAbhedhinego, kuti amutendi kushandira chimwari changu, nokuti kudira muedzaniso womukore wendakaemesa?

¹⁵ Zvino kuti mwakanasirira apo pomunozozwa kuridzwa kwegwama, munanzi, dimbwi, mbira, chimazambi, ngoma, nembeu dzeshe dzokuridza, mukawa pashi nokudira muedzaniso wendakaita, zvakanaka. Asi musikadiri, munozokandirwa ngokukasira mukati mwechoto chinobaka ngomuriro. Ndiani chimwari chinozomununura kubva munyara dzangu?”

¹⁶ Shadhirakhi, Meshakhi naAbhedhinego vakapingura mambo, “O Nebhukhadhineza, atitami kudzirwira muiyi ndaa.

¹⁷ Kuti zvikaitika, Mwari wedu wetinodira unesimba rokutinunura kubva muchoto chikuru chinobaka ngomuriro, naye unozotinunura munyara yako, mambo.

¹⁸ Asi kuti zvikakorera, ngakuziikanwe kwouri, O mambo, kuti atizotendi zvimwari zvako, nokuti kudira muedzaniso womukore wowakaemesa.”

Vangani vaDhanieri Vanotongerwa Rufu

¹⁹ Zvino Nebhukhadhineza wakazara ngoushungu, nomuemo wehope yake wakatsanduka kunaShadhirakhi, Meshakhi naAbhedhinego. Wakapanga kuti vabasire choto chikuru kanomwe kupinda kupisha kwechaisigara chechiita,

²⁰ wakapanga ngwazi dzimweni dzaiya muhondo yake kuti dzisunge Shadhirakhi, Meshakhi naAbhedhinego, nokuvakandira muchoto chikuru chinobaka ngomuriro.

²¹ Ndizvo vamuna avo vakasungwa vanemabhachi avo, nemabhuruku avo, nemachira avo amweni, vakakandirwa mukati mwechoto chikuru chaibaka ngomuriro.

²² Ngokuti kupanga kwamambo kwaida kukasa kuitika, nechoto chikuru chechibaka kakurutu, murazvu womuriro waikwira wakauraya vamuna avo vakabata Shadhirakhi, Meshakhi naAbhedhinego.

²³ Asi vamuna vatatu, Shadhirakhi, Meshakhi naAbhedhinego, vakawa pashi vakasungwa pakati pechoto chikuru chinobaka ngomuriro.

²⁴ Zvino Nebhukadhineza mambo wakashama, wakamiruka ngokukasira. Wakati kumakota ake, “Atizi kukandira vanhu vatatu vakasungwa pakati pomuriro here?” Vakapingura vechiti, “Igwinyiso, O mambo.”

²⁵ Wakaereketa akati, “Ringira, ndinoona vanhu varongomuna vakasunhurika, vanohamba pakati pomuriro, navo avaremadzwi; kuringirika kwowechirongomuna kwakadai ngomukororo wamwari?”

Vamuna Vatatu Vanosunhurwa noKukudzwa

²⁶ Naapo Nebhukhadhineza wakakwedzera pamusiwo wechoto chikuru chinobaka ngomuriro; wakaereketa akati, “Shadhirakhi, Meshakhi naAbhedhinego, imwimwi varanda vaMwari Uri padera pazveshe, budai kubva mumuriro, muuye pano!” Naapo Shadhirakhi, Meshakhi naAbhedhinego vakabuda kubva pakati pomuriro.

²⁷ Nenduna, vakuru voumambo, vatongi venharaunda, vapangi voumambo, vakaungana pamwepo, vakaona vamuna ava, kuti muriro waiya usina simba pamiiri yavo, nebvudzi resoro ravo arizi kubvurauka, nemabhachi avo aazi kutsanduka muemo wawo, negwema romuriro arizi kuapo kwevari.

²⁸ Nebhukhadhineza wakati, “Ngaakudzwe Mwari waShadhirakhi, Meshakhi naAbhedhinego, uwo wakatuma ngirosi yake, akanunura varanda vake avo vakagonda kwaari. Vakatsandudza izwi ramambo, vakapira miiri yavo, kuti vasazoshandira nokuti kudira zvimwari, asi ega Mwari wavo.

²⁹ Ndizvo ndinoemesa mutemo, kuti vanhu veshe, nemadzinza nendimi, avo vanoshaisha kuereketa ndiMwari waShadhiraki, Meshakhi naAbhedhinego, vanozotemwa kuita zvigurwa, nemhatso dzavo dzinozoita mirwi yematongo; ngokuti akuna Mwari umweni unesimba rokununura kudai.”

³⁰ Zvino mambo wakapinda kukudza vanaShadhirakhi, Meshaki naAbhedhinego, munyika yeBhabhuroni.