Dha. 2 - Bhaibheri Rakachena muChindau

Kurota kwaNebhukadhineza

¹ Mugore rechipiri rokutonga kwaNebhukhadhineza, Nebhukhadhineza wakarota hope; mweya wake wakatambudzwa nehope dzake dzakatiza.

² Ndizvo mambo wakapanga kuti kudaidzwe man'anga, vanomukirwa, vakambi, nevaKkaradhea, kuti varonzere mambo hope dzake. Naapo pevakauya, vakaema pamberi pamambo,

³ wakati kwevari, “Ndakarota hope, nomweya wangu unotambudzika ngokuda kuzwisisa hopedzo.”

⁴ VaKharadhea vakati kunamambo ngechiAramu vechiti, “O mambo, pona mhera nariini! Ronzerai varanda venyu hope, nesu tinozoonisa kududzirwa kwadzo.”

⁵ Mambo wakapingura vaKharadhea, akati, “Ndaemesa mwoyo wangu kuti, mwakorera kundironzera zveshe, hope nokududzirwa kwadzo, munozotemwa kuita zvigurwa, nemhatso dzenyu dzinozoita matongo.

⁶ Asi kuti mukandironzera hope nokududzirwa kwadzo, munozoashira zvipo nemithuso, nokuremeredzwa kwakakura. Ndizvo ndironzerenyi hope nokududzirwa kwadzo.”

⁷ Vakapingura kwechipiri, vakati, “Mambo ngavatange kuronzera varanda vake hope, zvino tinozoronza kududzirwa kwadzo.”

⁸ Mambo wakapingura, akati, “Ndinozia ngegwinyiso kuti munoda kuona mukuwo, ngokuti munoona kuti mutemo uyu waemeswa ndini.

⁹ Asi kuti musikandironzeri hope, chiripo chironzo chimwe kwomuri. Imwimwi mwatenda kuereketa mazwi okunyepa neanopaukisa pamberi pangu, metsa mukuwo upinde. Ndizvo ndironzerei hope, neni ndinozozia kuti munokona kundironzera nokududzirwa kwadzo.”

¹⁰ VaKharadhea vakapingura pamberi pamambo vechiti, “Akuna munhu naumwe padera penyika ungakona kuronza ndaa yamambo! Ngegwinyiso akuna mambo, kunyazwi mukuru nounesimba, wakambobvunza chiro chakadaro kubva kun'anga, nokuti uwo unomukirwa, nokuti muKharadhea.

¹¹ Chiro chaanobvunza mambo chakakonza kakurutu, akuna naumwe ungakona kuchironza pamberi pamambo, kwega zvimwari izvo ugaro hwazvo husiri pakati pevanhu.”

¹² Ngeiyi ndaa mambo wakanyangadzwa, akazadzwa ngoushungu hukurutu, akapanga kuti vanhu veshe vakangwara veBhabhuroni vaurawe.

¹³ Ndizvo mutemo wakabudiswa kuti vanhu vakangwara vaurawe, navo vakatsvaka Dhanieri nevangani vake kuvauraya.

Mwari Unoonisa Dhanieri Dudziro reHope

¹⁴ Zvino Dhanieri wakapingura ngokuzia nokungwara kunaAriokhi, nduna yevangwariri vamambo, iyo yakabuda koouraya vanhu vakangwara veBhabhuroni.

¹⁵ Wakabvunza Ariokhi nduna yamambo echiti, “Ngenyi mutemo wamambo wechida kuitika ngokukasira kudaro?” Zvino Ariokhi wakaziisa Dhanieri ndaa.

¹⁶ Ndizvo Dhanieri wakapotera, akakumbira kunamambo kuti amuemesere mukuwo, nokuti waizoronzera mambo dudziro.

¹⁷ Zvino Dhanieri wakaenda kumhatso yake, akaziisa vangani vake Hanania, Mishaeri naAzaria, nokuvaronzera

¹⁸ kuti vakumbire nyasha kubva kunaMwari womudenga ngendaa yeichi chakafishika, kuti Dhanieri nevangani vake, pamwepo nevamweni vangwaru veBhabhuroni vasafa.

¹⁹ Zvino chakafishika chakaoniswa kunaDhanieri muchioniso chousiku, naDhanieri wakakudza Mwari womudenga.

²⁰ Dhanieri wakati, “Ngarikudzwe zina raMwari mhera nariini nariini, ngokuti ungwaru nesimba ngezvake.

²¹ Unotsandudza mikuwo nenguva, unobvisa madzimambo, nokuemesa madzimambo; unopa ungwaru kunevakangwara nokuzia kwevari vanokuzwisisa.

²² Unobudisa zviro zvakadzama nezvakafishika; unozia zviri muchidima, nokujeka kunogara naye.

²³ O kweuri, Mwari wemadzibaba angu, ndinokubonga nokukukudza, ngokuti wandipa ungwaru nesimba, nazvino waonisa kwendiri icho chetakakumbira kwouri, ngokuti wakazvionisa kwetiri ndaa yezvaakapanga mambo.”

Dhanieri Unoronzera Mambo Kurota noKudzidudzira

²⁴ Ndizvo Dhanieri wakapotera kunaAriokhi, uwo waakaemesa mambo kuuraya vanhu vakangwara veBhabhuroni, akaronza izvi kwaari kuti, “Usauraya vanhu vakangwara veBhabhuroni; ndiunze pamberi pamambo, neni ndinozodudzira kunamambo zvedzinoronza.”

²⁵ Zvino Ariokhi wakapotedza Dhanieri pamberi pamambo ngokukasira, akati kwaari, “Ndaona munhu pakati pevakabatwa vanobva kwaJudha, munhu unokona kuronzera mambo kududzirwa kwehope.”

²⁶ Mambo wakati kunaDhanieri, uwo zina rake raizwi Bheriteshaza, akati, “Unokona here kundironzera hope dzendakarota, nodudziro yadzo?”

²⁷ Dhanieri wakapingura mambo akati, “Akuna munhu wakangwara, n'anga, mufemberi, unomukirwa ungakona kuonisa mambo zvakafishika zvaanobvunza mambo,

²⁸ asi uripo Mwari mudenga uwo unoonisa zvakafishika, naye wazvionisa kunamambo Nebhukhadhineza chinozoitika kumazuva okugumisira. Hope dzako, nezvioniso zvesoro rako pamubhedhi wako, ndizvo izvi.

²⁹ “Kweuri, O mambo, mipinimidzo yako yakauya uri pamubhedhi wako ngechaizoitika ngesure kwouku, nouwo unoonisa zvakafishika wakaziisa kwouri chinozoitika.

³⁰ Asi kudai ndini, ichi chakafishika achizi kuoniswa kwendiri ngoungwaru hwendinahwo kupinda veshe vanopona, asi kuti kududzirwa kuziikanwe kunamambo, nokuti uzwisise mipinimidzo yomwoyo wako.

³¹ “Iwewe wairingira, O mambo, ringira, muedzaniso mukuru. Uyu muedzaniso waiya wakakura, nokun'anikira kwawo kwaiya kwakanakisisa; wakaema pamberi pako, nokuringirika kwawo kwaityisa.

³² Soro rouyu muedzaniso raiya romukore wakaera, diti rawo nemioko yawo zvaiya zvesirivha, ndani yawo nezvizva zvawo zvaiya zvethusi,

³³ mirenje yawo yaiya yesimbi, tsoka dzawo rupande rumwe rwaiya rwesimbi, rumweni rwedongo.

³⁴ Apo wakaringira, buwe rakagurwa, haiwa ngenyara yomunhu, rakawira pamuedzaniso patsoka dzawo dzesimbi nedongo, rikadziputsa kuita zvigurwa.

³⁵ Zvino simbi, dongo, thusi, sirivha nomukore, zvakaputswa zveshe kuita zvigurwa, zvikadai ngemazungu embuwa yepachirimo; nedutu rakazvitora, nepezvakaenda azvizi kuoneka. Asi buwe iro rakawira muedzaniso rakakura kuita dunhu guru, rikazadza nyika yeshe.

³⁶ “Idzi ndidzo hope dzacho; zvino tinozoronza dudziro radzo pamberi pamambo.

³⁷ Iwewe, O mambo, mambo wemadzimambo, kwouri Mwari womudenga wakapa umambo, kugwinya, simba, nouthende;

³⁸ munyara yako wakapa vanhu kunyazwi ngepari pevanogara, zvikara zvomushango neshiri dzomudenga, nouwo waakaemesa kuita, mutongi padera pazvo zveshe; ndiwe soro romukore.

³⁹ Ngesure kwako hunozobuda umambo humweni huri pashi kunehwako; umambo humweni hwechitatu hwakadai ngethusi hunozotonga padera penyika yeshe.

⁴⁰ Hunozoapo umambo hwechirongomuna hunozogwinya kudai ngesimbi; kudai ngesimbi inopwanya nokukuya zveshe, hunozopwanya nokukuya zveshe izvi.

⁴¹ Kudai ngezvewakaona tsoka nezvikunwe, rupande rwazvo dongo romuumbi, norumweni simbi, unozoita umambo hwakaparadzana; asi kugwinya kumweni kwesimbi kunozoa mukati mwawo, kudai ngezvewakaona simbi yakakumanidzwa nedongo

⁴² Kudai ngezvikunwe zvetsoka zvaiya rupande rwesimbi, norupande rwedongo, ngokudaro umambohwo hunozoita rupande rwakagwinya, norumweni runokasa kuguka.

⁴³ Kudai ngezvewakaona simbi yakakumanidzwa nedongo, ndizvo vanozodzikumanidza umwe neumweni ngokuroodzana nevanhu vamweni; asi avazobatani pamwepo umwe neumweni, kudai ngesimbi risikakumanidziki nedongo.

⁴⁴ Nomumazuva emadzimambo awo, Mwari womudenga unozoemesa umambo husikazoparadzwi, noumambo uhwu ahuzosiirwi vanhu vamweni. Hunozopwanya hweshe uhu umambo, nokuunza kumagumo, nahwo hunozoema mhera nariini;

⁴⁵ kudai ngezvewakaona kuti buwe rakagurwa kubva kumutunhu haiwa ngenyara, naro rakapwanya simbi, thusi, dongo, sirivha nomukore. Mwari mukuru wakaziisa mambo chinozoitika ngesure kweizvi. Hope dzinegwinyiso, nokududzirwa kwadzo kunegwinyiso.”

Mambo Unopa Muthuso kunaDhanieri

⁴⁶ Zvino mambo Nebhukhadhineza wakawa ngehope, akadira Dhanieri, akapanga kuti mudiro wezviyo upirwe newezvinegwema rakanaka uitwe kwaari.

⁴⁷ Mambo wakati kunaDhanieri, “Ngegwinyiso Mwari wako ndiMwari wezvimwari, naMambo wemadzimambo, nomuonisi wezvakafishika, ngokuti wakona kududzira ichi chakafishika.”

⁴⁸ Zvino mambo wakakudza Dhanieri, wakamupa zvipo zvakawanda zvakakura, akaita kuti atonge padera penyika yeshe yeBhabhuroni, nokumuita mukuru wevatongi vaiya padera pevanhu veshe vakangwara veBhabhuroni.

⁴⁹ Dhanieri wakakumbira kunamambo, naye wakaemesa Shadhirakhi, Meshakhi naAbhedhinego, padera pendaa dzenyika yeBhabhuroni. Asi Dhanieri waiya padzimbahwe pamambo.