Dha. 12 - Bhaibheri Rakachena muChindau

Nguva yoKugumisira

¹ Pamukuwo uwo Mikhaeri, mutongi mukuru, uwo unoema kungwarira vanhu vako unozomiruka.Unozoapo mukuwo wokutambudzika, usikazi kumboapo kubvira apo pakatanga kuuya madzinza munyika. Asi pamukuwo uwo vanhu vako vanozonunurwa, weshe unozooneka akanyorwa mubhuku.

² Vazhinji veavo vanoata mubukuta renyika vanozomuka, vamweni mukupona kusikaperi, nevamweni mukutsveruka nokushoorwa kusikaperi.

³ Naavo vakangwara vanozojeka kudai ngokun'anikira kwomudenga; naavo vanotenderudzira vazhinji mukururama vanozojeka kudai ngenyeredzi mhera nariini.

⁴ “Asi iwewe, Dhanieri, ngwarira mazwi akafishika, ukonye bhuku ngokunamira metsa kumukuwo wokupera.Vazhinji vanozorumba apa naapo nokuzia kunozowanzwa.”

⁵ Zvino inini Dhanieri ndakaringira, ringira, kwakaema vamweni vairi, umwe pamhiri porwizi ngouno, noumweni pamhiri porwizi ngeiyo.

⁶ Umweni wavo wakati kumunhu waisimira machira orukangaza waiya padera pemvura yorwizi, “Unozoita mukuwo wakaitawani metsa kupera kweiyi mishamiso?”

⁷ Neni ndakazwa munhu uwo waiya akasimira machira orukangaza, uwo waiya padera pemvura yorwizi, amirudza nyara yake yokumudyo nenyara yake yokumuoshwe mudenga, echipika ndiye unopona mhera nariini kuti unozoita mukuwo, nemikuwo miiri, norupande rwomukuwo; naapo apedza kuparadza simba revanhu vakacheneswa, zveshe izvi zvinozopera.

⁸ Ndakazwa, asi andizi kuzwisisa; ndizvo ndakati, “O mambo wangu, anozoita magumonyi ezviro izvi?”

⁹ Wakati, “Enda hako, Dhanieri, ngokuti mazwi akonyiwa nokunamirwa metsa kumukuwo wokugumisira.

¹⁰ Vazhinji vanozosukisiswa, nokucheneswa, nokuedzwa, asi vakashata vanozoita zvakashata. Akuna naumwe wevakashata unozozwisisa, asi avo vakangwara vanozozwisisa.

¹¹ Kubvira pamukuwo wokuduswa kwomubairo wokupishwa wezuva rimwe ngarimwe, nechinyangadzo chinoparadza chechiemeswa, kunozoapo gumi remazana rimwe nemazana mairi nemakumi mapfumbamwe emazuva (1,290).

¹² Unomuchena uwo unoemera nokuguma kumazuva gumi rimwe remazana nemazana matatu nemakumi matatu nemashanu (1,335).

¹³ Asi iwewe, enda hako kumagumo, uzorore, nokuema muchikoaniswa chako pakupera kwemazuva.”