Dha. 11 - Bhaibheri Rakachena muChindau

¹ “Asi inini, mugore rokutanga raDhariusi muMedhe, inini ndemene ndakaema kumudetsera nokumugwinyisa.

² Zvino ndinozokuonisa gwinyiso. “Ringira, achazomiruka madzimambo matatu muPhesia; nowechirongomuna unozopinda kakurutu kuita gurudza kuneavo veshe; naapo agwinya ngoupfumi hwake, unozomusa veshe kurwisa umambo hweGirisi.

Umambo hweEgipite neSiria

³ Zvino mambo unesimba unozomiruka, uwo unozotonga ngokutonga kukuru nokuita kudai ngokuda kwake.

⁴ Naapo achakwira musimba, umambo hwake hunozogurwa, nahwo hunozokoaniswa kumadutu marongomuna omudenga; asi andikwo kwevanobarwa ndiwe akadi, nokuti kudai ngokutonga kwaakatonga; ngokuti umambo hwake hunozobvitwa, huite hwevamweni kubanze kweava.

⁵ “Zvino mambo wokubani unozokura akagwinya, asi umweni wevatongi vake unozomupinda kugwinya, unozotonga umambo hwakapinda kukura kunehwake.

⁶ Ngesure kwemakore akatikuti vanozodzishonganisa pamwepo; nemwanasikana wamambo wokubani unozouya kunamambo wedera kuemesa chitenderano. Asi aazosari nesimba romuoko wake nemibarirwana yake aizogari. Unozopirwa, iye nevaranda vake nemwana wake, nouwo wakamudetsera ngemikuwo iyi.

⁷ Asi nhai inobva kunzinde dzake umwe unozotora pandau yake, uwo unozouya koorwisana nehondo, naye unozopotera mumasvingo amambo wedera, echirwa navo; unozonyisa.

⁸ Kunyazwi nezvimwari zvavo nemiedzaniso yavo, nezvidziyo zvavo zvinodikanwa zvesirivha nezvomukore, unozozvichakata kuenda nazvo Egipite; naye unozogara makore akawanda asikarwisi mambo wedera.

⁹ Zvino mambo wedera unozorwisa umambo hwokubani, asi unozohwirira munyika mwake.

¹⁰ “Vakororo vake vacharwa hondo, vanozounganidza hondo dzakawanda, iyo inozoenda mberi kudai ngendambi yechipinda kuenda mberi, nokuhamba ndimwo nokutwara hondo, metsa pamasvingo ake.

¹¹ Namambo wokubani unozonyangadzwa, unozobuda koorwa hondo namambo wedera, unozotungamirira chikwata chikuru; asi chikwata chinozopuwa munyara mwake.

¹² Naapo chikwata chatorwa kuenda, mwoyo wake unozodzikudza; unozoriga pashi makumi egumi remazana, asi aazonyisi.

¹³ Ngokuti mambo wedera unozomirudzazve chikwata chakapinda kukura kuneicho chokutanga, ngesure kwemakore unozomiruka nehondo huru noupfumi hwakawanda.

¹⁴ Mumikuwo iyo vazhinji vanozomukira mambo wokubani. Madzongoni anogebenga pakati pevanhu vako vanozodzimirudza kugwinyisa chioniso, asi vanozowa.

¹⁵ Zvino mambo wedera unozouya, unozotsa rukumbati, unozotora dhorobha rakanasa kushosherwa; nezvokurwa zvokubani azvizoemi, nokuti vanhu vake vakatsanangurwa, zve, arizoapo simba rokuema.

¹⁶ Asi uwo unouya koorwa naye unozoita kudai ngokuda kwake, akuna naumwe unozoemesedzana naye.Unozotora nhaka yendau yakanaka munyika yeshe inowa pashi pesimba rake.

¹⁷ “Unozoemesa hope yake kupotera, anesimba roumambo hwake hweshe, unozounza chitenderano chokunyarara nokuchiita. Kuitira kuti aparadze umambo, unozomupa mukadzi mukuroora; asi achizobudiriri, nokuti kuuyirwa kwake.

¹⁸ Ngesure kweizvi unozopetuka kuzviwi, unozotora zvakawanda. Asi nduna huru inozoita kuti kushoorwa ukwo kwakaapo ndiyo kupere; eya, unozoita kuti kushoorwa kwake kumupetukire.

¹⁹ Zvino unozoemesa hope yake kumasvingo enyika yake, asi unozopumhunwa nokuwa, aazooneki.

²⁰ Zvino umwe unozotonga pandau yake unozopinza mubharisi muuthende hwoumambo; asi pakati pemazuva mashomani unozourawa, pasina kutseneka nokuti hondo.

Mambo Wakashata weSiria

²¹ “Pandau yake panozotonga munhu unoshooreka, uwo wevasikazopi kwaari kuremeredzwa kwoumambo; asi unozouya ngokunyarara, nokuona umambo ngokunyengerera kwokuchengedzera.

²² Hondo dzinozokhukhuzwa yaamho nokugurwa pamberi pake, nomutongi wechitenderano naye.

²³ Apedza kuita chitenderano naye, unozoshanda ngokuchengedzera; ngokuti unozokwira, nokuita wakagwinya ngechikwata chidoko.

²⁴ Unozopinda ngokunyarara, nokundau dzinendimo dzakapindisisa kunaka dzenyika iyi; naye unozoita izvo zvevasikazi kuita madzibaba ake; unozoparadzira pakati pavo zvakapambwa nezvakachakatwa, noupfumi padera pavo. Unozoita mazano ake kurwisa mundau dzakagwinya kwomukuwo mudoko.

²⁵ “Unozomusa simba rake nokushinga kwake kurwisa mambo wokubani, anehondo huru; namambo wokubani unozomusa hondo anehondo yakapinda kukura nokugwinya. Asi aazobudiriri, ngokuti vanozomuitira mazano.

²⁶ Avo vanodya chikoaniswa chokudya kwake vanozomuuraya, nehondo yake inozokukuza, nevazhinji vanozowa pashi ngokuurawa.

²⁷ Madzimambo mairi, mwoyo yavo inokotamira kuita zvakashata, vanozogara patafura vechiereketa manyepo. Asi akuzobudiriri, ngokuti kupera kunozoapo ngomukuwo wakaemeswa.

²⁸ Unozohwirira kunyika yake, anoupfumi hwakawanda; nomwoyo wake unozotsvatsvana nechitenderano chakacheneswa. Unozoshanda kudai ngezveanoda, nokuhwirira kunyika yake.

²⁹ “Pamukuwo wakaemeswa unozohwirira, nokuenda kubani; asi panguva iyi azvidai ngomukuwo wokutanga.

³⁰ Ngokuti ngarava dzeKitimu dzinozouya kurwa naye, unozosvipidzwa mwoyo, unozohwirira. Unozonyangadzwa nokuparadza chitenderano chakacheneswa. Unozohwirira nokuzwana naavo vanosiya chitenderano chakachena.

³¹ Hondo inotumwa ndiye inozogara nokuzosvipisa ndau yakacheneswa norusvingo. Vanozodusa mibairo yokupishwa yezuva rimwe ngarimwe, vanozoemesa chinyangadzo chinoparadzanisa.

³² Naavo vakadai ndivo vanoshaishira chitenderano unozovapaukisa ngokunyengerera kwokuchengedzera; asi vanhu vanozia Mwari wavo vanozogwinya, nokuita mishando yakakura.

³³ Vakangwara pakati pevanhu vanozopa kuzwisisa kuvazhinji; vanozowa ngeshoti, nomurazvu womuriro, ngouhloko, nokuchakatwa, mazuva akawanda.

³⁴ Naapo vanozowa, vanozodetserwa ngokudetserwa kudodoko, asi vazhinji vanozonamatira kwevari ngokunyengerera kwokuchengedzera.

³⁵ Nevamweni vavo vanokuzwisisa vanozowa, kuvaedza, nokuvasukisisa, nokuvachenesa, metsa kumukuwo wokupera, ngokuti chichiri chomukuwo wakaemeswa.

³⁶ “Mambo unozoita kudai ngokuda kwake. Unozodzikudza, nokudzipinimidza pachake kuita mukuru kupinda zvimwari zveshe, unozoereketa zvinoshamisa zvokurwisa Mwari wezvimwari. Unozobudirira metsa panguva youshungu yazarisika, ngokuti icho chakaemeswa chinozoitika.

³⁷ Aazoremeredzi zvimwari zvemadzibaba ake, nokuti kudisisa vakadzi, nokuti kupinimidzazve ngechimwari nokuti ngechiri, ngokuti unozodzikurisa padera pazveshe.

³⁸ Asi pandau peizvo unozoremeredza chimwari chemarusvingo; chimwari chevasikazi kuzia madzibaba ake unozochiremeredza ngomukore nesirivha, nemapuwe anomutengo mukuru, nezvinodakadza.

³⁹ Unozoita izvi mumarusvingo akapindisisa kugwinya echidetserwa ngechimwari chisikaziikanwi. Avo vanomutenda unozovaremeredza kakurutu; unozovaemesa kuita vatongi padera pevazhinji, unozokoanisa nyika kuti aone kuuyirwa.

⁴⁰ “Ngomukuwo wokupedzisira mambo wokubani unozomurwisa. Asi mambo wedera unozokasira kurwa naye, unozouya kudai ngechipupuri, anengoro nevagadhi vemahachi, nengarava dzakawanda. Unozopotera munyika idzi, nokurwa nadzo nokuenda ndimwo kudai ngendambi.

⁴¹ Unozopotera munyika inouthende, nemakumi emakumi emazana anozoparadzwa; asi idzi dzinozopona kubva kunyara yake, Edhomu, Moabhi, norupande rukuru rwevaAmoni.

⁴² Unozotambanudza nyara yakezve padera penyika idzi, nenyika yeEgipite aizopokonyoki.

⁴³ Unozoita mutongi padera poupfumi hwomukore nohwesirivha, nepadera pezviro zveshe zvinomutengo mukuru zveEgipite; nevaRibhia nevaEthiopia vanozoapo patsoka dzake.

⁴⁴ Asi mashoko anobva kumabvazuva nedera anozomukarudza, naye unozobuda anoushungu hukurutu kuparadza nokupedza kakurutu vazhinji.

⁴⁵ Unozoemesa matende engome yake panyika iri pakati poruandhle nomutunhu unouthende, wakacheneswa. Asi uchaguma pamagumo ake, pasina naumwe unozomudetsera.”