Dha. 10 - Bhaibheri Rakachena muChindau

Chioniso chaDhanieri paRwizi Thigrisi

¹ Mugore rechitatu raSairusi mambo wePhesia, izwi rakaoniswa kunaDhanieri, uwo zina rake rakadudzwa kuti Bheriteshaza. Izwi rayia negwinyiso, raiya rokurwa kukuru. Wakarizwisisa, akaa nokuzwisisa muchioniso.

² Panguva iyo inini Dhanieri ndaiya ndechibonda mavhiki matatu eshe.

³ Andizi kudya chingwa chakanaka, nokuti nyama, nokuti kumwa vhini, zve, andizi kudzora mafuta nepadoodoko, metsa mavhiki matatu eshe apera.

⁴ Ngezuva remakumi mairi nemarongomuna emazuva omwedzi wokutanga, ndichi pamhiri porwizi rukuru, urwo runozwi Thigrisi,

⁵ ndakaringira mudenga, ringira, munhu wakasimira jira rorukangaza, chiunu chake chakasungwa ngebhande romukore wakaera waibva Ufazi.

⁶ Muiri wake waiya wakadai ngebheriri, nehope yake yakadai ngokuoneka kwemheni, madziso ake akadai ngezviveneko zvomuriro, mioko yake netsoka dzake zvakadai ngethusi rakapukutwa, neizwi rake rakadai ngerembungano.

⁷ Inini Dhanieri ndega ndakaona chioniso; vanhu vaiya neni avazi kuona chioniso; kunyazwi kuhuta kukurutu kwakavagumira, navo vakatiza koohwara.

⁸ Ndizvo ndakasara ndega, kuti ndione ichi chioniso chikuru. Simba rangu rakabuda kubva mukati mwangu, kuringirika kwangu kwakashanduka kuita kudai ngokuora, neni andizi kusara nesimba.

⁹ Zvino ndakazwa bope remazwi ake; naapo ndazwa bope remazwi ake, ndakabatwa ngehope dzemadzikirira, nehope yangu iri pamavhu yakatiduma.

¹⁰ Asi zvino nyara yakandigwama, yakandiemesa ngenyara nemabvi angu.

¹¹ Wakati kwendiri, “O Dhanieri, iwewe munhu unodikanwa kakurutu, zwisisa mazwi endinoereketa kwouri. Ema ngetsoka dzako, ngokuti ndatumwa zvino kwouri.” Naapo achaereketa izwi iri kwendiri, ndakaema ndechihuta.

¹² Wakati kwendiri, “Usatya, Dhanieri; ngokuti kubvira pazuva rokutanga rowakaemesa mwoyo wako kutsvaka kuzwisisa, nokudzipfaisa pamberi paMwari wako, mazwi ako akazwika, neni ndauya ngendaa yemazwi ako.

¹³ Asi mutongi woumambo hwePhesia wakandiphikisa mumazuva makumi mairi narimwe. Ndizvo Mikhaeri, umwe wevatongi vakuru, wakauya koondidetsera, neni ndakamusiyapo nomutongi woumambo hwePhesia.

¹⁴ Zvino ndauyira kukudetsera kuti uzwisise zvinozoitika kuvanhu vako ngamazuva okugumisira. Ngokuti chiripo ngepamberi chioniso chemazuva awo.”

¹⁵ Naapo echiereketa mazwi aya kwendiri, ndakatsikitsira hope yangu pamavhu ndisikachakoni kuereketa.

¹⁶ Zvino umwe wakadai ngomuemo womunhu wakagwama miromo yangu; naapo ndakashama muromo wangu, kuti ndierekete, ndikati kwaari uwo wakaema pamberi pangu, “O mambo wangu, ngendaa yechioniso kurwadziwa kwakadaro kwandigumira, neni andichina simba.

¹⁷ Muranda wamambo wangu ungaita maereketerenyi namambo wangu? Ngokuti inini ndinohuta, apana simba rasara mwendiri, nomweya wokufema auzi kusara mukati mwangu.”

¹⁸ Zve wakauyazve akandigwama umwe unechiemo chakadai ngechomunhu, wakandigwama akandigwinyisa.

¹⁹ Wakati, “O munhu unodikanwa kakurutu, usatya; kunyarara ngakua kwouri. Ita wakagwinya nounesimba.” Naapo aereketa kwendiri, ndakagwinyiswa, ndikati, “Mambo wangu ngaaerekete; ngokuti wandigwinyisa.”

²⁰ Zvino wakati, “Unozia here chendauyira kwouri? Zvino ndinosisira kuhwirira koorwa nomutongi wePhesia, naapo ndapedza, ringira, mutongi weGirisi unozouya.

²¹ Asi ndinozokuronzera icho chakanyorwa mukati mwebhuku regwinyiso. Akunazve unobatirana neni ngeizvi, asi Mikhaeri ega mutongi wenyu.