Chakapangijihwa 6 - Bhaibheri Rakachena muChindau

Zvinamiro Zvinomwe

¹ Zvino ndakaona Gwai rabeura chimwe chezvinamiro zvinomwe, ndakazwa chimwe chezvisikwa zvinopona zvirongomuna chechiti ngeizwi raizwika rakadai ngomutinhiro rechiti, “Uya!”

² Ndakaringira, ndikaona hachi rakachena! Nomugadhi waro waiya nouta; wakapuwa dzungudza, naye wakabuda echinyisa nokuti anyise.

³ Naapo abeura chinamiro chechipiri, ndakazwa chisikwa chinopona chechipiri chechiti, “Uya!”

⁴ Nehachi rimweni rakabuda shava; nomugadhi waro wakapuwa simba rokudusa kunyarara kubva munyika, kuti vanhu vaurayane; naye wakapuwa shoti huru.

⁵ Naapo abeura chinamiro chechitatu, ndakazwa chisikwa chinopona chechitatu chechiti, “Uya!” Ndakaringira, ndikaona hachi rakasvipa! Nomugadhi waro waiya nechipimo munyara yake.

⁶ Ndakazwa chakarira chakadai ngeizwi chaibva pakati pezvisikwa zvinopona zvirongomuna chechiti, “Chipimo chekoroni chinotengwa ngedhenario, nezvipimo zvitatu zvebhare zvinotengwa ngedhenario, usashaishira mafuta nevhini!”

⁷ Naapo abeura chinamiro chechirongomuna, ndakazwa izwi rechisikwa chinopona chechirongomuna chechiti, “Uya!”

⁸ Ndakaringira, ndikaona hachi rakacheneruka! Nomugadhi waro zina rake ndiRufu, neHaidhesi zvakamuteera; nazvo zvakapuwa simba padera perupande rwechirongomuna rwenyika, rokuuraya ngeshoti, ngenzara, ngenhenda nezvikara zvomunyika.

⁹ Naapo abeura chinamiro chechishanu, ndakaona ngepashi pearita mwoyo yaavo vakaurawa ngendaa yeizwi raMwari nendaa youchapupu hwavakapupura.

¹⁰ Vakadaidzira ngeizwi gurutu vechiti, “Mambo Mwari Unesimbareshe, iwewe wakachena nounegwinyiso, munozogarira kwomukuwo wakadini kureba musati mwatonga nokuunzidzira ngazi yedu padera paavo vanogara munyika?”

¹¹ Vakapuwa umwe ngaumwe zvokufuka zvakachena, navo vakaronzerwa kuti vazorore mukuwo mudoko, metsa uwandu hwevamweni vavo varanda nehama dzavo hwaperera, avo vaisisira kuurawa kudai ndivo pachavo.

¹² Naapo abeura chinamiro chechitanhatu, ndakaringira, ndikaona kuzungunyika kukurutu kwenyika; nezuva rakasvipiswa kudai ngejira rokusvipa remamviri, nomwedzi weshe wakatsvuka kudai ngengazi,

¹³ nenyeredzi dzomudenga dzakawira pashi panyika, kudai ngomuonde unoriga maonde awo pachando asikazi kuibva, apo wazungunyiswa ngedutu guru.

¹⁴ Denga rakabviswa kudai ngebhuku apo rechipetwa, nomutunhu weshe nechiwi cheshe chakabviswa kubva pandau yacho.

¹⁵ Zvino madzimambo enyika nevanhu vakuru, nduna huru dzehondo, makurudza nevakagwinya, veshe hloko nevakasunhurika, vakahwara mumapako nomumapuwe emitunhu,

¹⁶ vechidaidzira kumitunhu nokumapuwe vechiti, “Tiwirenyi, mutifishe kubva kuhope youwo unogara pachigaro choumambo nokubva kuushungu hweGwai;

¹⁷ ngokuti raguma zuva guru roushungu hwavo, ndiani ungakona kuema?”