Chakapangijihwa 4 - Bhaibheri Rakachena muChindau

Kudira kwomuDenga

¹ Ngesure kweizvi ndakaringira, wona, musiwo wakabeurwa mudenga! Neizwi rokutanga rendakazwa rechiereketa kwendiri rakadai ngokurira kwehwama rakati, “Kwira pano, ndinozokupangidzira izvo zvinosisira kuitika sure kweizvi.”

² Paripo ndakabatwa ndiMweya; wona, mudengamwo ndakaona chigaro choumambo, nepadera pacho paigara umwe.

³ Nouwo waigarapo kuringirika kwake kwaiya kwakadai ngebuwe rejasipa nerekarneriani, kwaiyapozve utahwadande hwechitendenedza chigaro choumambo, hwairingirika hwakadai ngebuwe reemeraridhi.

⁴ Kutendenedza chigaro choumambo zvaiyapo zvigaro zvoumambo makumi mairi nemarongomuna, nepadera pezvigaro zvoumambo paigara vakuru makumi mairi nevarongomuna, vakapfeka zvokufuka zvakachena nemadzungudza omukore pamasoro avo.

⁵ Pachigaro choumambo pakabuda kupenya kwemheni nemazwi nokutinhira. Pamberi pechigaro choumambo paibaka zvibani zvinomwe zvomuriro zviri mweya minomwe yaMwari;

⁶ nepamberi pechigaro choumambo pane ruandhle rwakadai ngebuwe regirazi. Nepakati pechigaro choumambo nokuchitendenedza zvaiyapo zvisikwa zvinopona zvirongomuna, zvakazara ngemadziso mberi nesure.

⁷ Chisikwa chinopona chokutanga chaiya chakadai ngemhondoro, nechisikwa chinopona chechipiri chaiya chakadai ngomukono wen'ombe, nechisikwa chinopona chechitatu chaiya chine hope yakadai ngeyomunhu, nechisikwa chinopona chechirongomuna chaiya chakadai ngegodzi rinombururuka.

⁸ Nezvisikwa zvinopona zvirongomuna chimwe ngachimwe chazvo chaiya nemaphaphiro matanhatu, zvakazara madziso kutenderera kubanze nomukati; nazvo azvizi kuzorora kuemba masikati nousiku zvechiti, “Wakachena, Wakachena, Wakachena, Mambo Mwari Unesimbareshe, waiyapo, uripo nounouya!”

⁹ Naapo zvisikwa zvinopona zvakudza, zvaremeredza nokubonga kwaari unogara pachigaro choumambo, unopona mhera nariini nariini,

¹⁰ vakuru makumi mairi navarongomuna vanozowa pashi pamberi pouwo unogara pachigaro choumambo, nokumudira uwo unopona mhera nariini nariini, navo vanozokandira madzungudza avo vechiemba pamberi pechigaro choumambo vechiti,

¹¹ “Munosisira, imwimwi Mambo wedu naMwari wedu, kuashira kukudzwa nokuremeredzwa nesimba, ngokuti mwakasika zviro zveshe, ngokuda kwenyu zvakaapo nazvo zvakasikwa.”