Chakapangijihwa 3 - Bhaibheri Rakachena muChindau

Tsamba Inoenda kuChiara cheSardhisi

¹ “Nyorera ngirosi yechiara chiri muSardhisi wechiti: ‘Aya ndiwo mazwi ouwo unemweya minomwe yaMwari nenyeredzi nomwe.’ “Ndinozia mishando yako; unezina rokuti unopona, asi wakafa.

² Muka, ugwinyise izvo zvasara zvodo kufa, ngokuti andizi kuona mishando yako yakaperera pamberi paMwari wangu.

³ Zvino karakadza maashirire nokuzwa kwowakaita, uzvingwarire nokutenderuka. Kudai usikamuki, ndinozouya kudai ngembavha, newe auzozii awa rendinozouya ndiro kwouri.

⁴ Asi unemazina mashomani muSardhisi eavo vasikazi kusvipisa zvokufuka zvavo; navo vanozohamba neni, vakasimira zvakachena, ngokuti vanosisira.

⁵ Iye unonyisa unozopfekedzwa kudai ndivo ngezvokufuka zvakachena, neni andizodzimi zina rake mubhuku rokupona; ndinozopupura ngezina rake pamberi paBaba angu nepamberi pengirosi dzake.

⁶ Iye unenzee ngaazwe zvinoereketwa ndiMweya kuzviara.

Tsamba Inoenda kuChiara cheFiradherifia

⁷ “Nyorera ngirosi yechiara chiri muFiradherifia wechiti: “Aya ndiwo mazwi ouwo wakachena, unegwinyiso, unekiyi raDhavhidha, uwo unobeura akuna unozokonya, naye akonya akunazve unobeura.

⁸ “Ndinozia mishando yako. Wona, ndakaisa pamberi pako musiwo wakabeurwa, akuna munhu ungakona kuukonya. Ndinozia kuti iwewe une simba doko, asi wakangwarira izwi rangu, auzi kuramba zina rangu.

⁹ Wona, ndinokupa vamweni vemhatso yokudira yaSathani avo vanodziti vaJudha vasivopi, asi vanonyepa; wona, ndinozoita kuti vauye vagwadame pamberi petsoka dzako, navo vanozozia kuti inini ndakakuda.

¹⁰ Ngokuti wakangwarira izwi rangu rokusengerera, neni ndinozokungwarira kubva kuawa rokutambudzika rinouya padera penyika yeshe, kuedza avo vanogara munyika.

¹¹ Ndinokasira kuuya; batisisa chounacho, kuti asazoapo naumwe unozokutorera dzungudza rako.

¹² Iye unonyisa ndinozomuita sika mutemperi raMwari wangu; aachazobudimwo. Ndinozonyora padera pake zina raMwari wangu nezina redhorobha raMwari wangu, Jerusarema idzva rinodzaka kubva mudenga kunaMwari wangu, nezina rangu idzva.

¹³ Iye unenzee ngaazwe zvinoereketwa ndiMweya kuzviara.

Tsamba Inoenda kuChiara cheRaodhisia

¹⁴ “Nyorera ngirosi yechiara chiri muRaodhisia wechiti: ‘Aya ndiwo mazwi ouwo uri Ameni, chapupu chakagondeka chine gwinyiso, maambo ezvisikwa zvaMwari.’

¹⁵ “Ndinozia mishando yako, kuti autonhori nokuti kupisha. Ndinoda kuti utonhore nokuti upishe!

¹⁶ Ndizvo, ngokuti unodzia, usikapishi nokuti kutonhora, ndinozokurutsa mumuromo wangu.

¹⁷ Ngokuti unoti, ‘Ndiri gurudza, ndakapfuma, anditami chiro;’ usikazii kuti unenhamo nounotambudzika, uri murombo, bofu nomutitinini.

¹⁸ Ndinokupanga kuti utenge kubva kwendiri mukore wakanyunguruswa ngomuriro kuti uite gurudza; nezvokufuka zvakachena kuti udzifukidze, kuti kutsveruka kwoutitinini hwako husazooneka; nomutombo wokudzodza madziso kuti uone.

¹⁹ Avo veshe vendinoda, ndinovaganyira nokuvaorora; ndizvo tsamwirira utenderuke.

²⁰ Wona, ndinoema pamusiwo nokudododza; kudai aripo munhu unorizwa izwi rangu nokubeura musiwo, ndinozopotera mwaari, ndidye naye, naye adye neni.

²¹ Iye unonyisa, ndinozomuita kuti agare neni padendemaro rangu, kudai ndini ndakanyisawo, ndikagara naBaba angu padendemaro ravo.

²² Iye unenzee ngaazwe zvinoereketwa ndiMweya kuzviara.”