Chakapangijihwa 22 - Bhaibheri Rakachena muChindau

Rwizi rwoKupona

¹ Zvino ngirosi yakandionisa rwizi rwemvura yokupona, rwakaera kudai ngegirazi, rwechibuda muchigaro choumambo hwaMwari necheGwai.

² Pakati pepato redhorobha, nokumarutii eshe orwizi, waiyapo muti wokupona, wechibereka mbeu dziri gumi nambiri dzemichero, wechibereka michero yawo mwedzi umwe ngaumwe; nemashakani omuti aiya mutombo wokuponesa madzinza.

³ Akuchazoapozve nachimwe chiro chakatukwa; asi chigaro choumambo hwaMwari necheGwai zvinozoapo mukati mwaro, nevaranda vake vanozomudira.

⁴ Vanozoona hope yake, nezina rake rinozoapo pahuma dzavo.

⁵ Akuchazoapo usiku; navo avazotsvaki kujeka kwechibani nokuti kujeka kwezuva, ngokuti Mambo Mwari unozoita kujeka kwavo navo vanozotonga mhera nariini nariini.

Kuuya kwaJesu

⁶ Nayo yakati kwendiri, “Aya mazwi anogondeka, anegwinyiso, naMambo Mwari, Mwari womweya yevaprofeti, wakatuma ngirosi yake kuti ionise varanda vake zvinosisira kuitika ngokukasira.”

⁷ “Ringira, ndinokasira kuuya. Unomuchena uwo unongwarira mazwi okuprofeta kweiri bhuku.”

⁸ Inini, Johani, ndakazwa ndikaona zviro izvi. Naapo ndazwa nokuzviona, ndakawa pashi kuti ndidire pamberi petsoka dzengirosi yakandionisa izvi;

⁹ asi yakati kwendiri, “Ngwara kuti usaita kudaro! Ndiri muranda pamwepo newe nehama dzako vaprofeti, naavo vanongwarira mazwi okuprofeta kwebhuku iri. Dira Mwari!”

¹⁰ Nayo yakati kwendiri, “Usakonya mazwi okuprofeta kwebhuku iri, ngokuti mukuwo waapasinde.

¹¹ Iye usikazi kururama ngaagare asikazi kururama, nouwo unetsvina ngaagare anetsvina, nouwo wakarurama ngaagare kuita zvakarurama, nouwo wakacheneswa ngaagare kuita wakacheneswa.

¹² “Ringira, ndinokasira kuuya, ndinouya nomusharo wangu, kuti ndihwirinzire kuneweshe kudai ngezvaakaita.

¹³ Ndiri Arfa naOmega, wokutanga newokugumisira, muambi nowokupedzisira.”

¹⁴ Vanomuchena avo vanosuka zvokusimira zvavo, kuti vawe nesimba rokuuya kumuti wokupona nokupotera ngepamisiwo mudhorobha.

¹⁵ Ngokuti ngokubanze kunembwa, varoyi, vaombi, vaurayi, vadiri vemiedzaniso, navo veshe vanoda nokuita vanyepi.

¹⁶ “Inini, Jesu, ndakatuma ngirosi yangu kwomuri nouchapupu uhwu muzviara. Ndini runzinde nomubarirwana waDhavhidha, nyeredzi inojeka masase.”

¹⁷ Mweya nomuroorwa vanoti, “Uyai.” Nouwo unozwa ngaati, “Uyai.” Naye unozwa nyota ngaauye. Uwo unoda ngaatore mvura yokupona pasina mutengo.

Magumisiro

¹⁸ Inini ndinopupura kumunhu weshe unozwa mazwi okuprofeta kwebhuku iri, kuti kudai aripo munhu unozotutsira kwaari awo, Mwari unozotutsira kwaari madambudziko akanyorwa mubhuku iri.

¹⁹ Kudai aripo munhu unozodusa mazwi ebhuku rokuprofeta uku, Mwari unozodusa chikoaniswa chake kumuti wokupona nokudhorobha rakachena, izvo zvakanyorwa mubhuku iri.

²⁰ Iye unopupura izvi unoti, “Eya, ndinokasira kuuya.” Ameni. Uya, Mambo Jesu!

²¹ Nyasha dzaMambo Jesu ngadzigare nevakacheneswa veshe. Ameni.