Chakapangijihwa 21 - Bhaibheri Rakachena muChindau

Denga Idzva neNyika Itsva

¹ Zvino ndakaona denga idzva nenyika itsva; ngokuti denga rokutanga nenyika yokutanga zvakapinda, noruandhle paiya pasisina.

² Neni ndakaona dhorobha rakachena, Jerusarema idzva, rechidzaka kubva mudenga kunaMwari, rakanasirirwa kudai ngomuroorwa wakanemeserwa mwamuna wake.

³ Neni ndakazwa izwi guru rechibva pachigaro choumambo rechiti, “Ringira, ugaro hwaMwari huri pakati pevanhu. Unozogara navo; navo vanozoita vanhu vake, naMwari emene unozoa navo, echiita Mwari wavo.

⁴ Naye unozopukuta masodzi eshe kubva pamadziso avo. Rufu aruchazoapo; akuchina kubonda nokuti kuchema zve, nokuti kurwadziwa, ngokuti zviro zvokutanga zvapinda.”

⁵ Nouwo wakagara pachigaro choumambo wakati, “Ringira, ndinoita zviro zveshe kuti zviite zvitsva.” Wakatizve, “Nyora izvi, ngokuti aya mazwi anogondeka, anegwinyiso.”

⁶ Zvino wakati kwendiri, “Zvaitwa! Ndini Arfa naOmega, wokutanga nowokugumisira. Kwavari vane nyota ndinozovapa mvura isina mutengo, mvura inobva pachinyuka chokupona.

⁷ Iye unonyisa unozogara nhaka yezviro izvi, neni ndinozoita Mwari wake, naye unozoita mukororo wangu.

⁸ Asi ngendaa yevanotya, vasikagondi, vanonyangadza, vaurayi, vaombi, varoyi, vadiri vemiedzaniso, navo veshe vanyepi vanozoa nechikoaniswa chavo mugandwa rinobaka ngomuriro nesurufa, ndirwo rufu rwechipiri.”

Chioniso cheJerusarema Idzva

⁹ Zvino yakauya imwe yengirosi nomwe yeidzo dzaiya nemikheyo minomwe yakazara ngemadambudziko manomwe okugumisira, yakaereketa kwendiri yechiti, “Uya pano, ndinozokuonisa muroorwa, mukadzi weGwai.”

¹⁰ Yakanditora ndakabatwa ndiMweya kuenda kumutunhu mukuru wakareba, ikandionisa dhorobha rakachena Jerusarema, rechidzaka kubva mudenga kunaMwari,

¹¹ rine uthende hwaMwari; kujeka kwaro kwaiya kwakadai ngebuwe rino mutengo mukuru rakadai ngebuwe rejasipa, rakaera kudai ngegirazi.

¹² Raiya rine rukumbati rukuru, rwakareba kuenda mudenga, rine misiwo gumi namiiri, nepamisiwo pane ngirosi gumi nambiri; nemazina akanyorwa padera payo, mazina evakororo gumi navairi vaIsuraeri.

¹³ Kumabvazuva kwaiya nemisiwo mitatu, dera kwaiya nemisiwo mitatu, kubani kwaiya nemisiwo mitatu, kumabirirazuva kwaiya nemisiwo mitatu.

¹⁴ Norukumbati rwedhorobha rwaiya nemadzeyo gumi namairi, nepadera pawo paiya nemazina gumi namairi evapostori gumi navairi veGwai.

¹⁵ Iyo yakaereketa neni yaiya nendonga yomukore yokupima dhorobha nemisiwo yaro norukumbati rwaro.

¹⁶ Nedhorobha raiya nemarupande marongomuna akaedzana, nokureba kwaro kwakandodai ngokupamhama kwaro; nayo yakapima dhorobha ngendonga, rakaita makhiromitha mazana makumi mairi nemazana marongomuna (2,400) kureba kwaro; nokupamhama nokukwira kwaro mudenga kwaiya kwakaedzana.

¹⁷ Nayo yakapima rukumbati rwaro, rwaiya mamitha matanhatu kureba kuenda mudenga, kudai ngokupima kwomunhu, kunoti, kwengirosi.

¹⁸ Norukumbati rwaro rwakaakiwa ngejasipa, nedhorobha raiya romukore wakaera, wakadai ngegirazi rakaera.

¹⁹ Madzeyo orukumbati rwedhorobha akanemeswa ngembeu dzeshe dzemapuwe anemutengo mukuru. Dzeyo rokutanga raiya rejasipa, rechipiri raiya resafire, rechitatu raiya reagate, rechirongomuna raiya reemeraridhi,

²⁰ rechishanu raiya reonikisi, rechitanhatu raiya rekhaneriani, rechinomwe raiya rekrusoriti, rechisere raiya rebheruri, rechipfumbamwe raiya retopazi, rechigumi raiya rekrusoprasi, rechigumi narimwe raiya rejakiniti nerechigumi namairi raiya reametisiti.

²¹ Nemisiwo gumi namiiri yaiya nemapherere gumi namairi, umwe ngaumwe wemisiwo waiya nepherere rimwe, nepato redhorobha raiya romukore wakaera, wakadai ngegirazi rakaera.

²² Neni andizi kuona temperi mudhorobha, ngokuti Mambo Mwari Unesimbareshe neGwai ndivo temperi raro.

²³ Nedhorobha aritsvaki zuva nokuti mwedzi kurijekisa, ngokuti uthende hwaMwari ndikwo kujeka kwaro, neGwai ndicho chibani charo.

²⁴ Nemadzinza anozohamba ngokujeka kwaro, nemadzimambo enyika anozounza uthende hwawo mukati mwaro.

²⁵ Nemisiwo yaro aizokonyiwi masikati, ngokuti ahuzoapo usiku.

²⁶ Vanozounzamwo mukati mwaro uthende nokuremeredzwa kwemadzinza.

²⁷ Asi akuna nachimwe chakasvipiswa chinozopoteramwo nokuti uwo unoita chinonyangadza nemanyepo, asi avo vega vakanyorwa mubhuku rokupona reGwai.