Chakapangijihwa 20 - Bhaibheri Rakachena muChindau

Makore Gumi reMazana

¹ Zvino ndakaona ngirosi yechidzaka kubva mudenga, yakabata munyara yayo kiyi romugodhi usina magumo neketani huru.

² Yakabata dragoni, nyoka yekare, ndiyo Dhiabhorosi naSathani, ikamusunga makore gumi remazana.

³ Yakamukandira mumugodhi usina magumo, ikaukonya ikaisa chinamiro padera pake, kuti asachazochengedzerazve madzinza, metsa makore gumi remazana apera. Ngesure kweizvi kunosisira kuti ambosunhurwa mukuwo mudoko.

⁴ Ndakaona zvigaro zvoumambo, naavo vakagara padera pazvo, vakapuwa simba rokutonga. Ndakaona mweya yeavo vakagurwa masoro ngendaa youchapupu hwaJesu neizwi raMwari. Avazi kudira chikara nokuti muedzaniso wacho vasikazi kuashira chioniso pahuma dzavo nepanyara dzavo. Vakararama, vakatonga vari pamwepo naKristu makore gumi remazana (1,000).

⁵ Vamweni vevakafa avazi kurarama metsa makore gumi remazana apera. Uku ndikwo kumuka kwokutanga.

⁶ Vanomuchena nokucheneswa avo vane chikoaniswa mukumuka kwokutanga. Padera peava kufa kwechipiri akuchina simba, asi vanozoita vapristi vaMwari nevaKristu, navo vanozotonga naye makore gumi remazana.

Kunyiswa kwaSathani

⁷ Naapo makore gumi ramazana apera, Sathani unozosunhurwa kubva mutirongo rake.

⁸ Unozobuda nokuenda koochengedzera madzinza kumarupande marongomuna enyika, Gogi naMagogi. Unozovaunganidza pamwepo kurwa hondo; uwandu hwavo hwakadai ngejecha roruandhle.

⁹ Vakakwira pakupamhama kwenyika, vakatendenedza matumba evakacheneswa nedhorobha rinodikanwa. Naapo wakadzaka muriro wechibva mudenga, ukavapedza.

¹⁰ NaDhiabhorosi uwo wakavachengedzera wakakandirwa mugandwa romuriro nesurufa, munechikara nomuprofeti wokunyepa navo vanozotambudzwa masikati nousiku mhera nariini nariini.

Kutonga kwoKugumisira

¹¹ Ndakaona chigaro chikuru choumambo chakachena, nouwo wakagara padera pacho; ngokuapo kwake nyika nedenga zvakamutiza, akuzi kuchazooneka ndau yazvo.

¹² Ndakaona vakafa, vakuru nevadoko, vakaema pamberi pechigaro choumambo, nemabhuku akabeurwa. Bhuku rimwenizve rakabeurwa, bhuku rokupona. Nevakafa vakatongwa kudai ngemishando yavo, kudai ngezvakanyorwa mumabhuku.

¹³ Noruandhle rwakabudisa vakafa vaiya mukati mwarwo, rufu neHaidhesi zvakabudisa vakafa vaiya mukati mwazvo, navo veshe vakatongwa umwe ngaumwe ngendaa yezvaakaita.

¹⁴ Zvino rufu neHaidhesi zvakakandirwa mugandwa romuriro. Uku ndikwo kufa kwechipiri, gandwa romuriro.

¹⁵ Kudai aripo wakaoneka zina rake risikazi kunyorwa mubhuku rokupona, wakakandirwa mugandwa romuriro.