Chakapangijihwa 2 - Bhaibheri Rakachena muChindau

Tsamba Inoenda kuChiara cheEfesu

¹ “Nyorera ngirosi yechiara chiri muEfesu wechiti: ‘Aya ndiwo mazwi ouwo unobata nyeredzi nomwe munyara yake yokumudyo, unohamba pakati pezvigadzikiro zvezvibani zvinomwe zvomukore.’

² “Ndinozia mishando yako nokutambudzika kwako nokusengerera kwako. Ndinozia kuti autenderi vaiti vezvakashata; newe wakavaedza vanodzidaidza kuti vapostori, asi andivopi, wakavaona kuti vanyepi.

³ Ndinoziazve kuti iwewe unotsamwirira mukusengerera ngendaa yezina rangu, newe auzi kupera simba.

⁴ Asi ndinokushoora ngeichi, kuti wakasiya rudo rwako rwokutanga.

⁵ Ndizvo karakadza apo powakawa; utenderuke, uite mishando yowakaita kutanga. Kuti usikaiti kudaro, ndinozouya kwouri ndiduse chigadzikiro chechibani chako kubva pandau pacho, asi kuti ukatenderuka.

⁶ Asi ichi unacho, chokuti unonyenya mishando yevaNikoraitisi, yendinonyenyawo.

⁷ Iye unenzee ngaazwe zvinoereketwa ndiMweya kuzviara. Kwaari unonyisa, ndinozomutendera kuti adye kumuti wokupona uri muPharadhaisi raMwari.

Tsamba Inoenda kuChiara cheSimirna

⁸ “Nyorera ngirosi yechiara chiri muSimirna wechiti: ‘Aya ndiwo mazwi ouwo wokuamba nowokugumisira, uwo wakafa, akamukazve.’

⁹ “Ndinozia dambudziko rako nourombo hwako, (asi uri gurudza,) nokutuka kwaavo vanoti vari vaJudha, asi andivopi, asi ngevemhatso yokudira yaSathani.

¹⁰ Usatya izvo zvounozotambudzika ndizvo. Wona, Sathani woda kubata nokupotedza vamweni venyu mutirongo, kuti muedzwe, nemwi munozoa nedambudziko pamazuva gumi. Ita unogondeka metsa mukufa, neni ndinozokupa dzungudza rokupona.

¹¹ Iye unenzee ngaazwe zvinoereketwa ndiMweya kuzviara. Iye unonyisa aazoremadzwi ngokufa kwechipiri.

Tsamba Inoenda kuChiara chePhergamumu

¹² “Nyorera ngirosi yechiara chiri muPhergamumu wechiti: ‘Aya ndiwo mazwi ouwo uneshoti inopinza inoupanga huiri.’

¹³ “Ndinozia pounogara, ndipo pane dendemaro raSathani; newe unobatisisa zina rangu, auzi kuramba kutenda kwako mwendiri, kunyazwi kumazuva aAntiphasi chapupu changu, wakagondeka wangu, wakaurawa pakati penyu, paanogara Sathani.

¹⁴ Asi ndinokushoora ngezviro zvishomani: ngokuti unavo vamweni vanobatisisa zvidzidziso zvaBharamu, uwo wakadzidzisa Bharaki kuisa chipumhuniso pamberi pevana vaIsuraeri kuti vadye zvakadirwa zvimwari nokuita vanoomba.

¹⁵ Ngokudarozve unavo vamweni vanobatisisa zvidzidziso zvevaNikoraitisi.

¹⁶ Zvinopano tenderuka. Kuti usikaiti kudaro, ndinozouya kwouri ngokukasira, ndirwe navo ngeshoti yomuromo wangu.

¹⁷ Iye unenzee ngaazwe zvinoereketwa ndiMweya kuzviara. Kwaari unonyisa ndinozomupa imweni yemana yakafishika, ndinozomupazve buwe rakachena, nepadera pebuwe pakanyorwa zina idzva, risikaziikanwi ngoumweni kwega ngouwo unoriashira.

Tsamba Inoenda kuChiara cheThiatira

¹⁸ “Nyorera ngirosi yechiara chiri muThiatira wechiti: ‘Aya ndiwo mazwi ouwo Mukororo waMwari, uwo unemadziso akadai ngomurazvu womuriro, netsoka dzake dzakadai ngethusi rapukutwa rinon'anikira.’

¹⁹ “Ndinozia mishando yako, rudo rwako, kutenda kwako, kushandira kwako nokusengerera kwako, nokuti mishando yako yokugumisira yakakura kupinda yokutanga.

²⁰ Asi ndinokushoora ngeichi, kuti unotendera mukadzi Jezebheri, uwo unoti uri muprofeti wechikadzi pachake, naye unodzidzisa nokupausa varanda vangu kuti vaombe nokudya zvakadirwa miedzaniso yokudira.

²¹ Neni ndakamupa nguva yokuti atenderuke, asi unoramba kutenderuka kubva mukuomba kwake.

²² Wona, ndinozomukandira mumubhedhi, naavo vanoomba naye mudambudziko gurutu, kuti vasikatenderuki kumishando yake.

²³ Neni ndinozouraya vana vake vafe. Nezviara zveshe zvinozozia kuti inini ndini ndinotsvakisisa mupinimidzo nomwoyo, neni ndinozomupa umwe ngaumwe kudai ngemishando yake.

²⁴ Asi ndinoti kwomuri, imwimwi mwakasara muThiatira, avo vasina uku kudzidziswa, vasikazi kuzia izvo zvinodaidzwa ngevamweni kuti udzamu hwaSathani, ‘Andizomutwarisi mutwaro umweni.’

²⁵ Asi batisisai izvo zvomunazvo metsa ndauya.

²⁶ Nouwo unonyisa nokuangira kuita mishando yangu metsa pakugumisira, “Ndinozomupa simba padera pemadzinza,

²⁷ naye unozoatonga ngendonga yesimbi, kudai ngehari dzomuumbi dzinoputswa kuita zviwenda;

²⁸ kunyazwi inini pachangu ndakaashira simba kubva kunaBaba angu. Neni ndinozomupa nyeredzi yemambakwedza.

²⁹ Iye unenzee ngaazwe zvinoereketwa ndiMweya kuzviara.