Chakapangijihwa 19 - Bhaibheri Rakachena muChindau

Kudakara muDenga

¹ Ngesure kweizvi ndakazwa bope guru rakadai ngerevanhu vazhinji mudenga rechiti, “Haleluya! Ruponeso nouthende nesimba ngezvaMwari wedu,

² ngokuti kutonga kwake kunegwinyiso nekwakarurama; wakatonga muombi mukuru wakashaishira nyika ngokuomba kwake, naye wakaunzidzira kwaari ngazi yevaranda vake padera pake.”

³ Naapo vakadaidzirazve vechiti, “Haleluya! Chiushi chake chinopwititika kukwira mudenga mhera nariini nariini.”

⁴ Nevakuru makumi mairi nevarongomuna nezvisikwa zvinopona zvirongomuna vakawa pashi, vakadira Mwari unogara pachigaro choumambo vechiti, “Ameni. Haleluya!”

⁵ Izwi rakazwika rechibva pachigaro choumambo rechiti, “Kudzai Mwari wedu, imwimwi mweshe varanda vake, imwimwi munomutya, vadoko nevakuru.”

Dhiri roMuchadho reGwai

⁶ Apapo ndakazwa chakadai ngeizwi rechiunga chakakura kudai ngebope remvura yakawanda nokudai ngeizwi romutinhiro unesimba rechiti, “Haleluya! Ngokuti Mambo Mwari wedu Unesimbareshe unotonga.

⁷ Ngatidakare nokudakara kukurutu, ngatimupe mbiri; ngokuti muchadho weGwai waguma nomuroorwa waro wakadzinasirira.

⁸ Wakatenderwa kuti adzisimidze ngemachira akanaka orukangaza, anojeka neakaperera.” Ngokuti machira akanaka orukangaza ndizvo zviito zvakarurama zvevakacheneswa.

⁹ Ngirosi yakati kwendiri, “Nyora izvi: Vanomuchena vakakokwa kudhiri romuchadho weGwai.” Nayo yakati kwendiri, “Aya ndiwo mazwi egwinyiso aMwari.”

¹⁰ Ndakawa pashi patsoka dzayo kuidira, asi yakati kwendiri, “Ausisiri kuita kudaro! Inini ndiri muranda pamwepo newe nevangani vako, vanobatirira kuuchapupu hwaJesu. Dira Mwari! Ngokuti uchapupu hwaJesu huri mweya wokuprofeta.”

Mugadhi weHachi Rakachena

¹¹ Ndakaona denga rakabeuka, ndikaona hachi rakachena! Mugadhi waro waizwi Unogondeka neUnegwinyiso, naye mukururama unotonga nokuita hondo.

¹² Madziso ake akadai ngomurazvu womuriro, nepadera pesoro rake pane madzungudza akawanda. Waiya nezina rakanyorwa, risina kuziikanwa ngevanhu, asi iye ega.

¹³ Naye wakasimira zvokusimira zvakanyikwa mungazi: nezina rake rinozwi, Izwi raMwari.

¹⁴ Nehondo dzomudenga dzakasimira machira akanaka, akachena neakaperera, dzaimuteera dzakagadha mahachi akachena.

¹⁵ Neshoti yakapinza inobuda kubva pamuromo wake, kuti atemere pashi ndiyo madzinza, naye unozoatonga ngendonga yesimbi; unotsikatsika chikamuriro chevhini rokutyisa kwoushungu hwaMwari Unesimbareshe.

¹⁶ Naye unezina rakanyorwa padera pechokufuka chake nepachizva chake kuti, “MAMBO WEMADZIMAMBO NOMUTONGI WEVATONGI.”

¹⁷ Ndakaona ngirosi yakaema muzuva, yakadaidzira ngeizwi guru, yechiti kuneshiri dzeshe dzinombururuka mudenga, “Uyai, muungane padhiri guru raMwari,

¹⁸ kuti mudye nyama yemadzimambo, nyama yenduna huru, nyama yevanhu vane simba, nyama yemahachi nevagadhi vawo, nyama yevanhu veshe, vakasunhurika nevakasungwa, yevadoko nevakuru.”

¹⁹ Ndakaona chikara nemadzimambo enyika nehondo dzawo dzakaungana pamwepo kuti varwe hondo nouwo wakagadha hachi nehondo yake.

²⁰ Nechikara chakabatwa nomuprofeti wokunyepa uwo wakashanda zvioniso mukuona kwacho, zvaakachengedzera ndizvo avo vaiya vaashira chioniso chechikara, naavo vakadira muedzaniso wacho. Ava vairi vakakandirwa vechizwa mugandwa romuriro raibaka ngesurufa.

²¹ Nevamweni vakaurawa ngeshoti youwo waigadha hachi, shoti iyo yakabuda kubva mumuromo wake; neshiri dzeshe dzakaguta ngenyama yavo.