Chakapangijihwa 18 - Bhaibheri Rakachena muChindau

Kuwa kweBhabhuroni

¹ Ngesure kweizvi ndakaona ngirosi imweni yechidzaka kubva mudenga, inesimba guru; nenyika yakajekiswa ngouthende hwayo.

² Yakadaidzira ngeizwi rine simba yechiti, “Rawa, rawa, Bhabhuroni guru! Raita ugaro hwamadhimoni, nendau yemweya yeshe inetsvina, neyeshiri dzeshe dzinetsvina, dzinonyenyiwa.

³ Ngokuti madzinza eshe akamwa vhini roushungu hwokuomba kwake, nemadzimambo enyika akaomba naye, nevatengisi vomunyika vakapfuma ngesimba rouwandu hwepfuma yokuangira kwake kuemura.”

⁴ Ndakazwa izwi rimweni rechibva mudenga rechiti, “Budai kubva kwaari, vanhu vangu, kuti musakoanisana naye muzvishaishi zvake, zve, kuti musazoashidzana naye madambudziko ake;

⁵ ngokuti zvishaishi zvake zvakaita murwi zvinoguma mudenga, naMwari wakakarakadza ngezvakashata zvake.

⁶ Mupei musharo kudai ngezvaakamupa pachake, mumuhwirinzire kairi kakapetwa kudai ngemishando yake; mutsani iyo yaakazadza, mumudzadzire kairi.

⁷ Ndizvo mupenyi kutambudzika nokusvipa mwoyo kukurutu, kudai ngouwandu hwaakadzikudza ndihwo nokupona mukudzidakadzisa pachake, ngokuti unoti mumwoyo mwake, ‘Inini ndakagara pano, ndini mambokadzi, andiri shirikadzi akadi, andizombooni dambudziko.’

⁸ Ndizvo madambudziko ake anozomugumira ngezuva rimwe, rufu, kubonda, nzara, naye unozopishwa ngomuriro; ngokuti Mambo Mwari, uwo unomutonga, unesimba.”

⁹ Madzimambo enyika, awo akaomba nokupona echidzidakadzisa pamwepo naye, anozochema nokubonda ngendaa yake, apo paanozoringira chiushi chokutsva kwake.

¹⁰ Vanozoema vari kuretu, ngokutya kutambudzwa kwake vechiti, “Kutyisanyi uku! Kutyisanyi uku! Newe dhorobha guru, dhorobha rakagwinya Bhabhironi! Ngokuti ngeawa rimwe kutongwa kwako kwakugumira.”

¹¹ Nevatengisi venyika vanochema nokubonda ngendaa yake ngokuti apana munhu uchatenga zviro zvavo,

¹² mukore, sirivha, mapuwe anemutengo mukuru, mapherere, nemachira akanaka orukangaza neakatsvukuruka, neesirika yakatsvuka; nembeu dzeshe dzemiti inonuhwira, nembeu dzeshe dzezvidziyo zvenyanga dzenzou, mbeu dzeshe dzezvidziyo zvakaitwa ngemiti inemutengo mukuru, zvethusi, zvesimbi, mapuwe akachena,

¹³ sinamoni, mutombo unonuhwira, mutombo wokupisha unegwema rakanaka, mafuta okudzora, makha, vhini, mafuta, ufu hwakamotseka, koroni, n'ombe, makwai, mahachi, ngoro, hloko, kunyazwi nemweya yevanhu.

¹⁴ “Michero yaidisiswa ngomweya wako yakabva kwouri, nezviro zveshe zvainakisisa nezvaipenya zvakaparadzwa kwouri, auchazozvionizve!”

¹⁵ Vatengesi veizvi zviro, avo vakaita makurudza ndiye, vanozoema kuretu ngokutya dambudziko rake, vechichema nokubonda

¹⁶ vechiti, “Kutyisanyi uku! Kutyisanyi uku, dhorobha guru! Raipfeka machira akanaka orukangaza akatsvukuruka, akatsvuka, rakanemeswa ngomukore namapuwe anemutengo mukuru nemapherere!

¹⁷ Ngokuti upfumi hwakakura kudaro hwaparadzwa ngeawa rimwe!” Nenduna dzeshe dzengarava, navo veshe vahambisi vengarava, navo veshe vairarama ngokushanda muruandhle, vakaema vari kuretu,

¹⁸ vakadaidzira vechiona chiushi chokutsva kwake vechiti, “Ngeriri dhorobha ringaedzaniswa neiri dhorobha guru?”

¹⁹ Navo vakakandira bukuta padera pemasoro avo, vechichema nokubonda vechiti, “Kutyisanyi uku! Kutyisanyi uku, dhorobha guru umwo veshe vaiya nengarava dzavo muruandhle vakaitwa makurudza ngezvinokosha zvake! Ngokuti ngeawa rimwe rakaparadzwa.

²⁰ Dakarai ngendaa yake, iwewe denga, nemwi vakacheneswa, nemwi vapostori, nemwi vaprofeti! Ngokuti Mwari wakamutonga ngendaa yeizvo zvaakaita kwomuri.”

²¹ Nengirosi inesimba yakamirudza buwe rakadai ngeguyo rakakura, ikarikandira muruandhle yechiti, “Ngokuwa kwakakura kudaro Bhabhuroni, dhorobha guru, rinozokandirwa pashi, arichazooneki nepadoodoko.

²² Neizwi revaridzi vezvimadangari nerevaembi, revanoridza minanzi, revaridzi vehwama arichazozwiki mukati mwako; mbeu dzemishando yeshe kunyazwi ngouri adzichazoapo nepadoodoko mukati mwako; neizwi rokukuya arichazozwiki nepadoodoko mukati mwako.

²³ Kujeka kwechibani akuchazojeki nepadoodoko mukati mwako; neizwi romukwambo neromuroorwa arichazozwiki mukati mwako; ngokuti vatengesi vako vaiya vanhu vakuru venyika, ngokuti madzinza eshe akachengedzerwa ngokurowa kwako.

²⁴ Mukati mwake mwakaoneka ngazi yevaprofeti neyevakacheneswa neyeavo veshe vakaurawa munyika.”