Chakapangijihwa 14 - Bhaibheri Rakachena muChindau

Gwai neVanhu varo 144,000

¹ Zvino ndakaringira, ndakaona Gwai rakaema pamutunhu weZioni! Vaiyapo naye zana nemakumi marongomuna namarongomuna emakumi emazana (144,000) vane zina rake nezina raBaba ake rakanyorwa pahuma dzavo.

² Ndakazwa izwi rakabva mudenga rakadai ngechaungira chemvura zhinji nokudai ngokutinhira kukurutu; neizwi rendakazwa raiya rakadai ngerevaridzi vechiridza zvimadangari zvavo,

³ navo vanoemba nduyo itsva pamberi pechigaro choumambo nepamberi pezvisikwa zvinopona zvirongomuna nepamberi pevakuru. Apana munhu waikona kudzidza nduyo iyo kwega avo vari zana nemakumi marongomuna nemarongomuna emakumi emazana (144,000) vakatengwa kubva munyika.

⁴ Ava ndivo vasikazi kudzisvipisa ngavakadzi, ngokuti vakadai ngemhandwe; ndivo vanoteera Gwai kweshe kwerinoenda. Vakatengwa kubva pakati pevanhu kuti vaite mitanguro kunaMwari nokuGwai,

⁵ nomumiromo yavo amuzi kuoneka kunyepa; avana ndaa.

Ngirosi Nhatu

⁶ Neni ndakaona ngirosi imweni yechimbururuka pakati pedenga, ine vhangeri remhera nariini koochumaira kwavari avo vanogara munyika, kumadzinza eshe, marusinga eshe, kundimi dzeshe nokuvanhu veshe;

⁷ yechiti ngeizwi guru, “Ityai Mwari mumukudze, ngokuti awa rokutonga kwake raguma; mumudire uwo wakaita denga nenyika noruandhle nezvinyuka zvemvura.”

⁸ Ngirosi imweni yechipiri yakateera yechiti, “Rawa, rawa, Bhabhuroni gurutu! Rakaita kuti madzinza eshe amwe vhini roushungu hwokuomba kwaro.”

⁹ Zvino ngirosi imweni yechitatu yakadziteera yechiti ngeizwi gurutu, “Kuti aripo munhu unodira chikara nomuedzaniso wacho, nokuashira chioniso pahuma yake nokuti panyara yake,

¹⁰ iye unozomwa vhini roushungu hwaMwari, rinodururwa risikazi kubvengedzwa mutsani youshungu hwake, naye unozotambudzwa ngomuriro nesurufa pamberi pengirosi dzakachena nepamberi peGwai.

¹¹ Nechiushi chokutambudzwa kwavo chinopwititika mhera nariini nariini. Navo avana zororo masikati nousiku, avo vanodira chikara nomuedzaniso wacho, kunyazwi ndiani unoashira chioniso chezina racho.”

¹² Pano ndipo panodiwa kusengerera kwevakacheneswa, vanongwarira mipango yaMwari nokugonda kunaJesu.

¹³ Ndakazwa izwi rechibva mudenga rechiti, “Nyora izvi: vanomuchena vakafa vanofira munaMambo kubvira zvinopano.” “Eya,” unoronza Mweya, “Kuti vazorore kubva kumishando yavo, ngokuti mishando yavo inovateera!”

Kukukura kwepaNyika

¹⁴ Ndakaringira, ndikaona gore rakachena, nepadera pegore pane umwe wakadai ngoMukororo woMunhu echigarapo, anedzungudza romukore pasoro rake, nomunyara mwake anesikeyo inopinza.

¹⁵ Nengirosi imweni yakabuda kubva mutemperi, yechidaidzira ngeizwi guru kwaari uwo wakagara padera pegore yechiti, “Shandisa sikeyo yako, ucheke, ngokuti awa rokucheka raguma; ngokuti zvokukukura zvenyika zvaibva.”

¹⁶ Ndizvo uwo wakagara padera pegore wakakandira sikeyo yake munyika, nenyika yakachekwa.

¹⁷ Zvino ngirosi imweni yakabuda kubva mutemperi riri mudenga, nayo yaiya nesikeyo inopinza.

¹⁸ Ngirosi imweni yakabuda kubva paarita, inesimba padera pomuriro, yakadaidzira ngeizwi gurutu kuneiyo inesikeyo inopinza yechiti, “Shandisa sikeyo yako inopinza, uunganidze zvikore zvemavhini enyika, ngokuti mavhini ayo aibva.”

¹⁹ Ndizvo ngirosi yakakandira sikeyo yayo munyika ikaunganidza mavhini enyika, ikaakandira muchisviniro chikurutu chevhini choushungu hwaMwari.

²⁰ Nechisviniro chevhini chakatsikwatsikwa kubanze kwedhorobha, kwakabuda ngazi kubva muchisviniro chevhini, ikagumira pamatomu emahachi, nokureba kwayo kwaiita makhiromitha mazana matatu (300), yechiita mamitha mairi kudzama.