Chakapangijihwa 13 - Bhaibheri Rakachena muChindau

¹ Zvino ndakaona chikara chechibuda kubva muruandhle, chine nyanga gumi nemasoro manomwe; nepadera penyanga dzacho paiya nemadzungudza gumi, nepadera pemasoro acho paiya nemazina okutuka Mwari.

² Nechikara chendakaona chaiya chakadai ngekhamba, netsoka dzacho dzaiya dzakadai ngebheya, nomuromo wacho waiya wakadai ngowemhondoro. Kwechiri dragoni rakapa simba raro, chigaro choumambo hwaro nesimba rokutonga gurutu.

³ Ndakaona rimwe remasoro acho rairingirika rakadai ngerakakuwara yaamho, asi bonje rokufa kwacho raiya rapora, nenyika yeshe yakateera chikara yechishamiswa.

⁴ Vanhu vakadira dragoni, ngokuti ndiro rakapa chikara simba raro, navo vakadira chikara vechiti, “Ndiani ungaedzaniswa nechikara nounesimba rokurwa nacho?”

⁵ Chakapuwa muromo wokuereketa mazwi akakura nokutuka, chakapuwazve simba rokuti chiite mishando yacho mwedzi makumi marongomuna namiiri (42).

⁶ Nacho chakabeura muromo wacho kutuka Mwari nokutuka zina rake nougaro hwake, navo vanogara mudenga.

⁷ Chakapuwazve simba rokurwa nevakacheneswa nokuvanyisa. Chakapuwazve simba padera pedzinza reshe, pomunhu weshe, padera pendimi yeshe nembeu yeshe yomunhu.

⁸ Veshe vanogara padera penyika vanozochidira, weshe unezina risikazi kunyorwa mubhuku rokupona reGwai rakaurawa kubvira mukuemeswa kwenyika.

⁹ Kuti aripo unenzee ngaazwe:

¹⁰ Kuti aripo wakaemeserwa kusungwa, unozosungwa muusungwa; kuti aripo wakaemeserwa kuurawa ngeshoti, ngegwinyiso unozourawa ngeshoti. Pano ndipo panokusengerera nokugonda kwevakacheneswa.

Chikara cheChipiri

¹¹ Ndakaona chikara chimweni chechikwira kubuda chechibva munyika; chaiya nenyanga mbiri dzakadai ngedzegwai, chakaereketa kudai ngedragoni.

¹² Chinoshandisa simba rechikara chokutanga mukuona kwacho, chinoita kuti nyika navo vanogaramwo vadire chikara chokutanga, chaiya nebonje rokufa rakapora.

¹³ Chinoita mioniso mikuru, kunyazwi kuita kuti muriro udzake padera penyika wechibva mudenga mukuona kwevanhu;

¹⁴ ngemioniso yechinotenderwa kuita pamberi pechikara, chinochengedzera avo vanogara munyika, chechironza kwavari kuti vaite muedzaniso wechikara chakabaiwa ngeshoti asi chikapona.

¹⁵ Chakapuwa simba rokupa mweya kumuedzaniso wechikara, kuti muedzaniso wechikara ukone kuereketa nokuita kuti veshe vasikadiri muedzaniso wechikara vaurawe.

¹⁶ Chinoitazve kuti veshe, vadoko nevakuru, vapfumi nevarombo, vakasunhurika nehloko, vaiswe chioniso panyara yavo yokumudyo nokuti pahuma yavo,

¹⁷ kuitira kuti pasazoita munhu naumwe ungazokona kutenga nokuti kutengesa, asi uwo unechioniso, ndikwo kuti, zina rechikara nokuti namba yezina racho.

¹⁸ Pano ndipo panodiwa ungwaru; iye unozwisisa ngaaerenge namba yechikara, ngokuti ndiyo namba yomunhu. Namba yake ndiyo mazana matanhatu nemakumi matanhatu nematanhatu (666).