Chakapangijihwa 12 - Bhaibheri Rakachena muChindau

Mukadzi neDragoni

¹ Chioniso chikuru chinoshamisa chakaoneka mudenga: mukadzi akapfeka zuva, nomwedzi pashi petsoka dzake, nepadera pesoro rake paiya nedzungudza renyeredzi gumi nembiri.

² Waiya nemimba naye wakachema echirwadziwa ngokubara, nokurwadziwa ngokusununguka.

³ Nechioniso chimweni chinoshamisa chakaoneka mudenga; wona, dragoni guru rakatsvuka rine masoro manomwe nenyanga gumi, nepadera pemasoro aro paiya nemadzungudza manomwe.

⁴ Muswe waro unokweya rupande rwechitatu rwenyeredzi dzomudenga nokudzikandira panyika. Nedragoni rakaema pamberi pomukadzi waiya ooda kubara mwana, kuti ridye mwana wake apo abarwa.

⁵ Naye wakabara mukororo, unozotonga madzinza eshe ngendonga yesimbi. Asi mwana wake wakabvukwa, akakwidzwa kunaMwari nokuchigaro chake choumambo,

⁶ nomukadzi wakatizira mushango, apo paiya nendau yaakanasirirwa ndiMwari, kuti vamurere apo mazuva gumi remazana nemazana mairi nemakumi matanhatu (1,260).

Mikhaeri Unonyisa Dragoni

⁷ Zvino kwakaapo kurwa mudenga; Mikhaeri pamwepo nengirosi dzake dzakarwisa dragoni. Nedragoni rakarwisa pamwepo nengirosi dzaro,

⁸ asi dzakanyiswa nendau yadzo aizi kuchazoapo mudenga.

⁹ Dragoni guru rakakandirwa pashi, iyo nyoka sharuka, inozwi ndiDhiabhorosi naSathani, muchengedzeri wenyika yeshe, wakakandirwa pashi munyika, nengirosi dzake dzakakandirwa pashi pamwepo naye.

¹⁰ Neni ndakazwa izwi guru rechibva mudenga rechiti, “Zvino rwaguma ruponeso, simba noumambo zvaMwari wedu nesimba raKristu wake, ngokuti mupumhi wehama dzedu wakandirwa pashi, uwo unovaitira ndaa pamberi paMwari wedu masikati nousiku.

¹¹ Navo vakamunyisa ngengazi yeGwai neizwi rouchapupu hwavo, navo avazi kuda kupona kwavo metsa murufu.

¹² Ndizvo dakarai, imwimwi matenga neavo vanogara mukati mwawo! Asi kushatanyi kwezvinoita kunyika nokuruandhle, ngokuti Dhiabhorosi wakadzaka pashi kwomuri anoushungu hukurutu, ngokuti unozia kuti nguva yake yafupika!”

Dragoni Rinorwisazve paNyika

¹³ Naapo dragoni raona kuti rakakandirwa pashi panyika, rakatambudza mukadzi uwo wakabara mukororo.

¹⁴ Asi mukadzi wakapuwa maphaphiro mairi egodzi guru, kuti ambururuke kuenda mushango kundau yake, paanorerwa mukuwo nemikuwo nehafu yomukuwo kubva kuhope yenyoka.

¹⁵ Zvino nyoka yakabudisa mvura mumuromo wayo kudai ngorwizi sure kwomukadzi, kuti atorwe ngorwizi.

¹⁶ Nenyika yakadetsera mukadzi, ikabeura muromo wayo nokumedza rwizi urwo rwakabudiswa ngedragoni kubva mumuromo waro.

¹⁷ Zvino dragoni rakatsenekera mukadzi, rikaenda, rikaambana nevamweni vana vake, avo vanongwarira mipango yaMwari vechibata uchapupu hwaJesu.

Zvikara zviiri

¹⁸ Dragoni rakaema padera pejecha roruandhle.