Chakapangijihwa 11 - Bhaibheri Rakachena muChindau

Zvapupu Zviiri

¹ Zvino ndakapuwa chipimiso cherutsanga rwakadai ngomudondoro, kukazwi kwendiri, “Miruka, upime temperi raMwari nearita naavo vanodiramwo,

² asi usapima ruwanze ruri kubanze kwetemperi; usarupima, ngokuti rwakapuwa kunevemadzinza, navo vanozotsikatsika pashi ngetsoka dzavo padera pedhorobha rakachena mwedzi makumi marongomuna namiiri (42).

³ Ndinozopa simba kuzvapupu zvangu zviiri kuti zviprofete mazuva gumi remazana nemazana mairi nemakumi matanhatu (1,260), zvakapfeka machira emasaka.”

⁴ Ava vari miti miiri yemaorivhi nezvigadzikiro zviiri zvezvibani zvinoema pamberi paMambo wenyika.

⁵ Kuti aripo munhu unoda kuvaremadza, muriro unobuda kumiromo yavo wechiuraya magaa avo; kuti aripo munhu unoda kuvaremadza, ngeiyi njira kunosisira kuti aurawe.

⁶ Vane simba rokukonya denga, kuti isazonaya mvura ngamazuva okuprofeta kwavo, navo vane simba padera pemvura kuitsandudza kuti iite ngazi, nokuita kuti nyika igumirwe ngemadambudziko eshe, panguva dzeshe dzevanoda.

⁷ Naapo vapedza uchapupu hwavo, chikara chinokwira kubva mumugodhi usina magumo chinozoambana navo nokuvanyisa nokuvauraya,

⁸ nemiiri yavo yakafa inozorashwa mupato redhorobha guru rinozwi ngokuedzanisa Sodhoma neEgipite, paakakohomerwa Mambo wavo.

⁹ Navo vanobva kuvanhu, kumarusinga, kundimi nokumadzinza, vanozoringira miiri yavo yakafa mazuva matatu nehafu, vasikatenderi kuti miiri yavo yakafa iikwe mumaiba;

¹⁰ naavo vanogara munyika vanodakara ndivo nokupembera; vanozoashidzana zvipo umwe kunoumweni, ngokuti ava vaprofeti vairi vakatambudza avo vanogara munyika.

¹¹ Ngesure kwemazuva matatu nehafu mweya wokupona unobva kuna Mwari wakapotera mukati mwavo, vakaema ngetsoka dzavo, nokutya kukurutu kwakagumira avo vakavaona.

¹² Zvino vakazwa izwi guru rechibva mudenga rechiti kwavari, “Kwirai uno!” Vakakwira mudenga vari mugore, magaa avo akavaringira.

¹³ Ngeiro awa kwaiyapo kuzungunyika kukurutu kwenyika norupande rwegumi rwedhorobha rwakawa; vakaurawa vanhu vari makumi emazana manomwe mukuzungunyika kwenyika, nevamweni vakatya, vakakudza Mwari womudenga.

¹⁴ Dambudziko rechipiri rapinda. Wona, dambudziko rechitatu rinokasira kuuya.

Hwama yeChinomwe

¹⁵ Zvino ngirosi yechinomwe yakaridza hwama yayo, kwakazwika mazwi makuru mudenga echiti, “Umambo hwenyika hwaita umambo hwaMambo wedu nohwaKristu wake, naye unozotonga mhera nariini nariini.”

¹⁶ Nevakuru vari makumi mairi navarongomuna, vanogara pazvigaro zvavo zvoumambo pamberi paMwari, vakawa ngehope dzavo, vakadira Mwari

¹⁷ vechiti, “Tinomubonga, imwimwi Mambo Mwari, Munesimbareshe, uwo uripo nowaiyapo, ngokuti mwakadzitorera simba renyu guru, mukatonga.

¹⁸ Madzinza akatseneka, noushungu hwenyu hwakauya, nomukuwo wevakafa kuti vatongwe, nomukuwo wokupa musharo kunevaranda venyu vaprofeti nevakacheneswa nokwavari vanotya zina renyu, vadoko nevakuru, nokuparadza avo vanoparadza nyika.”

¹⁹ Zvino temperi raMwari rakabeurwa mudenga, mwakaoneka mutemperi rake bhokisi rechitenderano chake; kwakaapo kupenya kwemheni nemazwi okutinhira nokuzungunyika kwenyika nematsanza makurutu.