Chakapangijihwa 10 - Bhaibheri Rakachena muChindau

Ngirosi neBhuku Doko

¹ Zvino ndakaona ngirosi imweni yakagwinya yechidzaka kubva mudenga, yakafuka gore, noutahwadande hwaiya padera pesoro rayo; nehope yayo yakadai ngezuva, netsoka dzayo dzaiya dzakadai ngesika dzomuriro.

² Yaiya yakabata munyara yayo kabhuku kakabeuka. Yakatsika rutsoka rwayo rwokumudyo padera poruandhle norwomuoshwe padera penyika.

³ Yakadaidzira ngeizwi guru, kudai ngokurira kwemhondoro; naapo yadaidzira, kutinhira kunomwe kwakatinhira.

⁴ Naapo kutinhira kunomwe kwaiya kwatinhira, ndaiya ndooda kunyora, ndakazwa izwi rechibva mudenga rechiti, “Namira izvo zvakaronzwa ngokutinhira kunomwe, usazvinyora.”

⁵ Zvino ngirosi iya yendakaona yakaema padera poruandhle nepenyika, yakamirudza nyara yayo yokumudyo mudenga,

⁶ ikapika ndiye unopona mhera nariini nariini, uwo wakasika denga neizvo zvirimwo, nenyika neizvo zvirimwo, noruandhle neizvo zvirimwo kuti, “Kusachazoapo mukuwo wokunonoka,

⁷ asi mumazuva apo ngirosi yechinomwe yooridza hwama yayo, ngouwo mukuwo chakafishika chaMwari chinozozadziswa, kudai ngezvaakaronza kuvaranda vake vaprofeti.”

⁸ Zvino izwi rendakazwa rechibva mudenga rakaereketazve kwendiri, rikati, “Enda, utore kabhuku kakabeuka kari munyara yengirosi yakaema padera poruandhle nepadera penyika.”

⁹ Ndizvo ndakaenda kunengirosi ndikaironzera kuti indipe kabhuku, nayo yakati kwendiri, “Katore, ukadye; kanozovava mundani yako, asi mumuromo wako kanozotapira kudai ngouchi.”

¹⁰ Ndakatora kabhuku kubva munyara yengirosi, ndakakadya, kaitapira kudai ngouchi mumuromo wangu; asi apo ndakadya, ndani yangu yakaitwa kuti ivave.

¹¹ Dzakati kwendiri, “Kunosisira kuti uprofetezve ngendaa yevanhu vazhinji, madzinza, ndimi nemadzimambo.”