Amo. 9 - Bhaibheri Rakachena muChindau

Kutonga kwaMambo Mwari

¹ Ndakaona Mambo Mwari akaema pasinde pearita, naye wakati, “Chaya sika dzepamusiwo, kuti madimba azungunyike, uzviputsire pamasoro avo veshe; naavo vanosara ndinozouraya ngeshoti; akuna naumwe wavo unozotiza, haiwa naumwe wavo unozotiza kupokonyoka.

² Kunyazwi vechitsa muSheori, kubva apo nyara yangu inozovatora; kunyazwi vanokwira mudenga, kubva apo ndinozovadzasa pashi.

³ Kunyazwi vanohwara padera peKharmeri, kubvapo ndinozovatsvaka nokuvabvisa; kunyazwi vanodzifisha kubva kumadziso angu pashi poruandhle, kubvapo ndinozopanga nyoka yomuruandhle, nayo inozovaruma.

⁴ Kunyazwi vanoenda muusungwa pamberi pemagaa avo, kubvapo ndinozopanga shoti, nayo inozovauraya; neni ndinozoisa madziso angu padera pavo kuvaitira zvakashata, haiwa zvakanaka.”

⁵ Mambo Mwari, Mwari wehondo, uwo unogwama nyika, nayo inonyunguruka, navo veshe vanogaramwo vanobonda, nayo yeshe inokwira kudai ngeRwizi Naire, nokupwa kudai ngeNdwizi Naire yeEgipite,

⁶ ndiye unoaka makamera ake mudenga, nokuemesa matsikiro ake padera penyika; uwo unodaidza mvura yoruandhle echiidurura padera penyika, Mambo Mwari ndiro zina rake.

⁷ “Amuzi kudai ngevaEthiopia kwendiri here, O vanhu vaIsuraeri? Unoronza Mambo Mwari. Andizi kukwidza Isuraeri here kubva kunyika yeEgipite, nevaFiristia kubva Kafithori, nevaAramu kubva Kiri?

⁸ Ringira, madziso aMambo Mwari, Mwari ari padera poumambo hunokushaisha, ndinozohuparadza kubva padera penyika; kwega kuti andizoparadzi yeshe mhatso yaJakobe, unoronza Mambo Mwari.

⁹ Ngokuti, ringira, ndinozopanga, nokuzungunyisa mhatso yaIsuraeri pakati pemadzinza eshe, kudai ngounopepeta zviyo ngorutsero, asi akuna naimwe yembeu inozowa pashi pamavhu.

¹⁰ Veshe vashaishi vevanhu vangu vanozofa ngeshoti, avo vanoti, ‘Kushata akuzotinyisi, nokuti kushongana nesu.’ ”

Kupetudzwa kwaIsuraeri Kuchauya

¹¹ Pairo zuva ndinozomirudza tende raDhavhidha iro rakawa, ndinozotsiira ndau dzaro dzakapwanyika; ndinozoakisa matongo ake, ndechizoriakisa kudai ngemazuva ekare,

¹² kuti vatore vakasara veEdhomu, nevemadzinza eshe avo vanodaidzwa ngezina rangu, unoronza Mambo Mwari uwo unoita ichi,

¹³ “Ringira, nguva iri kuuya ngegwinyiso,” unoronza Mambo Mwari, “Apo murimi unozopinda mucheki, nouwo unokamura mavhini unozopinda unokusha mbeu; mitunhu inozodonhesa vhini idzva, nezvimitunhu zveshe zvinozoerera ndiro.

¹⁴ Ndinozopetudza ubatwa hwevanhu vangu Isuraeri, navo vanozoakisa madhorobha akaputsika nokuagara; vanozosima minda yemivhini nokumwa vhini rayo; vanozorima minda nokudya michero yayo.

¹⁵ Ndinozovasima munyika yavo, navo avachazobvitwizve kubva munyika yavo yendakavapa,” unoronza Mambo Mwari, Mwari wako.