Amo. 8 - Bhaibheri Rakachena muChindau

Chioniso cheChitundu cheMichero

¹ Izvi ndizvo zvaakandionisa Mambo Mwari, Mwari: Ringira, chitundu chemichero yepazienza.

² Wakati, “Amosi, unoonenyi?” Neni ndakati, “Chitundu chemichero yepazienza.” Zvino Mambo Mwari wakati kwendiri, “Kupera kwaguma padera pevanhu vangu Isuraeri; andichazovapindizve.

³ Ndwiyo dzetemperi dzinozoita kuboorera ngeiro zuva, unoronza Mambo Mwari, Mwari; miiri mizhinji yakafa inozokandirwa kundau dzeshe. Nyarara.”

Magumo aIsuraeri

⁴ Izwai ichi, imwimwi munotsikatsika mutami, mwechiunza mukuparadzwa varombo venyika

⁵ mwechiti, “Mwedzi mutsva unotawa unozopera riini, kuti titengese zviyo, neSabatha, kuti tipire koroni yokutengesa? Tinoita kuti efa riite doko nechipimo chikuru, nokubira ngezvipimo zvokuchengedzera,

⁶ kuti titenganisane varombo ngesirivha, nomutami ngemagwada mairi, kutengesa makoto ekoroni?”

⁷ Mambo Mwari wakapika ngokudzikudza kwaJakobe, “Ngegwinyiso anditongozoriyarwi nachimwe chezviito zvavo.

⁸ Nyika aizohuti here ngendaa iyi, weshe unozochema unogaramwo, nayo inozokwira yeshe kudai ngendambi Naire, inozorashwa nokunzvaidzwa, kudai ngoRwizi Naire rweEgipite?

⁹ Pazuva iro, unoronza Mambo Mwari, Mwari, ndinozoita kuti zuva ripote masikati, ndinozosvipisa nyika masikati zuva rakaara.

¹⁰ Ndinozotsandura madhiri enyu kuita kubonda, nendwiyo dzenyu dzeshe kuita kuchema; ndinozounza machira emasaka pazviunu zveshe, nemhanza padera pesoro reshe; ndinozozviita kuti zvidai ngokubonda ngendaa yomukororo umwe ega, nokupera kwazvo kudai ngezuva rinovava.

¹¹ “Ngegwinyiso nguva iri kuuya, unoronza Mambo Mwari, Mwari, apo pendinozounza nzara panyika, haiwa nzara yokudya, nokuti nyota yokuda mvura, asi yokuzwa mazwi aMambo Mwari.

¹² Vanozonzerereka kubva kuruandhle kuenda kuruandhle, nokubva dera kuenda kumabvazuva; vanozorumba kuenda mberi nesure, kootsvaka izwi raMambo Mwari, asi avazorioni.

¹³ Muzuva iro mhandwe dzakanaka nemajaha vanozodemera ngenyota.

¹⁴ Avo vanopika ngechishaishi cheSamaria vechiti, ‘Kudai ngezvechinopona chimwari chako, O Dhani;’ ‘Kudai ngezveinopona njira yeBheerishebha;’ vanozowa, navo avazomirukizve.”