Amo. 7 - Bhaibheri Rakachena muChindau

Chioniso cheNdongwe

¹ Izvi ndizvo zvaakandionisa Mambo Mwari, Mwari: Ringira, waiita ndongwe mukutanga kwokumera kwemwenje unokura; ringira, waiya mwenje waitseneneka ngesure kwokucheka kwamambo.

² Naapo dzakapedza kudya mwenje wenyika, ndakati, “O Mambo Mwari, Mwari, rekerera, ndapota! Jakobe ungaita maemerenyi? Mudoko yaamho.”

³ Mambo Mwari wakakungurira ngendaa iyi; “Achizoitiki,” wakaronza Mambo Mwari.

Chioniso choMuriro

⁴ Izvi ndizvo zvaakandionisa Mambo Mwari, Mwari: Mambo Mwari, Mwari wakadaidzira kutonga kwomuriro; nawo wakaomisa ruandhle, nawo waipedza nyika.

⁵ Zvino ndakati, “O Mambo Mwari, Mwari, rekera, ndapota! Jakobe ungaita maemerenyi? Mudoko yaamho.”

⁶ Mambo Mwari wakakungurira ngendaa iyi; “Ichiwo achizoitiki,” wakaronza Mambo Mwari, Mwari.

Chioniso cheBote roKururamisa

⁷ Izvi ndizvo zvaakandionisa: Ringira, Mambo Mwari waiya akaema pasinde porukumbati rwakaitwa panebote rokururamisa, anebote rokururamisa munyara mwake.

⁸ NaMambo Mwari wakati kwendiri, “Amosi, unoonenyi?” Neni ndakati, “Bote rokururamisa.” Zvino Mambo Mwari wakati, “Ringira, ndinoemesa bote rokururamisa ndiro pakati pevanhu vangu Isuraeri; andichazovapindizve.

⁹ Ndau dzakakwirira dzaIsaka dzinozoita shango, nendau dzakacheneswa dzaIsuraeri dzinozoparadzwa; neni ndinozomiruka kurwa nemhatso yaJerobhoamu ngeshoti.”

Amosi naAmazia

¹⁰ Zvino Amazia mupristi weBhetheri wakatumira kunaJerobhoamu mambo waIsuraeri echiti, “Amosi wakaita bangano ndiwe pakati pemhatso yaIsuraeri; nyika aikoni kutwara mazwi ake eshe.

¹¹ Izvi ndizvo zvinoronza Amosi, ‘Jerobhoamu unozofa ngeshoti, naIsuraeri unosisira kupinda kuita hloko kuretu kubva kunyika yake.’ ”

¹² Amazia wakati kunaAmosi, “O muoni, enda, utizire kuretu kunyika yaJudha, udye chingwa chakoyo, uprofetepo.

¹³ Asi usaprofetazve muBhetheri; ngokuti indau yamambo yakacheneswa, nayo itemperi roumambo.”

¹⁴ Zvino Amosi wakapingura Amazia, “Inini ndaiya ndisiri muprofeti, nokuti mukororo womuprofeti; asi ndaiya muushi nomukayi wamaonde.

¹⁵ NaMambo Mwari wakanditora apo pendaiteera zvifuyo, Mambo Mwari wakati kwendiri, ‘Enda, uprofete kuvanhu vangu Isuraeri.’

¹⁶ Ndizvo zvino izwa izwi raMambo Mwari: Iwewe unoti, ‘Usaprofeta kurwisa Isuraeri, usachumaira kurwisa mhatso yaIsaka.’

¹⁷ Ndizvo izvi ndizvo zvinoronza Mambo Mwari: ‘Mukadzi wako unozoita hure mudhorobha, vakororo vako nevanasikana vako vanozourawa ngeshoti, nenyika yako inozokoaniswa ngebote, newe wemene unozofira munyika isikazi kusukika, naIsuraeri ngegwinyiso unozopinda muusungwa kuretu kubva kunyika yake.’ ”