Amo. 6 - Bhaibheri Rakachena muChindau

Kuparadzwa kwaIsuraeri

¹ Ihehe kwevari vanogarisika muZioni, neavo vanozwa kungwaririka paMutunhu weSamaria, vakuru vokutanga vemadzinza avo kwevari vanoenda vemhatso yaIsuraeri!

² Ambukai kuenda Kharine, muone; kubvapo endai Hamathi gurutu; zvino mworomwodzaka kuGathi revaFiristia. Vakapinda kunaka here kuno uhwu umambo? Nenyika yavo yakapinda kukura here kunenyika yenyu,

³ O imwimwi munoisa kuretu zuva rakashata, nokuunza pasinde kutonga kwokugebenga?

⁴ Ihehe vanoata pamibhedhi yenyanga dzenzou, nokutambarara pamisheyareya yavo, vechidya vana vemakwai nemakonyana kubva muzvibaya;

⁵ avo vanoemba ndwiyo dzisina shwiro pamwepo nokurira kwembira; vanodziitira zviro zvokuridza, kudai ndiDhavhidha;

⁶ avo vanomwa vhini ngemajomeya, nokudzidzodza ngezvokuzora zvakapinda kunaka, asi avasvipi mwoyo ngokutambudzika kwaJosefa!

⁷ Ndizvo zvino vanozoita vokutanga kuenda muusungwa pamwepo naavo vanotanga kusungwa, nokushadaya kwavo vaitambarara kunozopera.

⁸ Mambo Mwari, Mwari wapika ngokwake, unoronza Mambo Mwari, Mwari wehondo: “Ndinonyangadzwa ngodzikudza kwaJakobe, ndinonyenya ngome dzake; ndizvo ndinozopira dhorobha nezveshe zvirimwo.”

⁹ Kudai vanhu gumi vechisara mumhatso imwe, vanozofa.

¹⁰ Kudai hama imwe iyo inozopisha vakafa, inozotora muiri kuunza kubanze kwemhatso, naye unozoti kwaari, uwo uri mumarupande omukatikati emhatso, “Uchipo umweni newe here?” Naye unozoti, “Haiwa;” zvino hama inozoti, “Nyarara! Ngokuti atisisiri kuereketa ngezina raMambo Mwari.”

¹¹ Ringira, Mambo Mwari unopanga, mhatso huru inozoondomoka, nemhatso doko kuita maondo.

¹² Mahachi anorumba here padera poruware? Uripo here ungarima ruandhle ngen'ombe? Asi mwatsandura kutonga kwakanaka kuita chanduru, nomuchero wokururama kuita kuvava.

¹³ Imwimwi munodakara ngechiro chisina shwiro, vanoti, “Atizi kudzitorera nyanga ngesimba redu here?”

¹⁴ “Ngegwinyiso, ndinozomumirudzira dzinza kurwa nemwi, O mhatso yaIsuraeri, unoronza Mambo Mwari, Mwari wehondo; vanozomutambudza kubvira Rebhohamathi kuguma kumukova weArabha.”