Amo. 5 - Bhaibheri Rakachena muChindau

Kudaidzirwa Kutenderuka

¹ Izwai izwi iri rendinodaidzira kumuchemera, O mhatso yaIsuraeri.

² Mhandwe yaIsuraeri yakawa; aichazomiruki; yakasiiwa munyika yayo, pasina wokuimirudza.

³ Ngokuti izvi ndizvo zvinoronza Mambo Mwari, Mwari: “Dhorobha raibuda gumi remazana rinozosara nezana, neiro raibuda zana rinozosara negumi, kumhatso yaIsuraeri.”

⁴ Ngokuti izvi ndizvo zvinoronza Mambo Mwari kumhatso yaIsuraeri: “Nditsvakenyi, mupone.

⁵ Asi musatsvaka Bhetheri, nokuti kupotera muGirigari, zve, musaparura kuenda Bheerishebha; ngokuti Girigari ngegwinyiso rinozoenda muusungwa, neBhetheri rinozoita risina shwiro.”

⁶ Tsvakai Mambo Mwari, mupone, kuti asazoambura kuparadza kudai ngomuriro mumhatso yaJosefa, nokuparadza Bhetheri pasina naumwe unoudzima.

⁷ A, imwimwi munotsandura kunaka kuita kuvava, nokuunza kururama pashi.

⁸ Umwe uwo wakasika Zvinyarutanhatu neOrioni, echitsandura bvute rokufa kuita kuedza, nokuita kuti zuva riite chidima usiku; uwo unodaidza mvura yoruandhle, echiidurura padera pehope yenyika, Mambo Mwari ndiro zina rake;

⁹ uwo unounza kuparadzwa kunobaka padera pevakagwinya, kuti kuparadzwa kuuye padera pengome.

¹⁰ Vanomunyenya uwo unokaraidza pamusiwo, vanonyangadzwa ndiye unoereketa gwinyiso.

¹¹ Ndizvo ngokuti munotsikatsika murombo, nokutora mihengo yekoroni kubva kwaari, mwaaka mhatso dzemapuwe akatsetswa, asi amuzogari mukati mwadzo; mwakasima minda inodakadza yemivhini, asi amuzomwi vhini rayo.

¹² Ngokuti ndinozia uwandu hwokupauka kwenyu, nokukura kwezvishaishi zvenyu, imwimwi munotambudza vakarurama, munotora chitengero, munopaukisa varombo pamusiwo.

¹³ Ndizvo uwo unokuzia unozonyarara ngomukuwowo, ngokuti mukuwo wakashata.

¹⁴ Tsvakai zvakanaka, haiwa zvakashata, kuti mupone; ngokudaro Mambo Mwari, Mwari wehondo, unozoapo nemwi, kudai ngezvemwaronza.

¹⁵ Nyenyai zvakashata, mude zvakanaka, muemese kutonga kwakanaka pamusiwo; pamweni Mambo Mwari, Mwari wehondo, unozoitira nyasha avo vanosara vaJosefa.

¹⁶ Ndizvo izvi ndizvo zvinoronza Mambo Mwari, Mwari wehondo, Mambo: “Mumakhona eshe kunozoamwo kuchema; nomumapato mweshe vanozoti, ‘Ihehe! Ihehe!’ Vanozodaidza varimi koobonda, naavo ngwazi dzokuchema kuti vacheme.

¹⁷ Muminda yeshe yemivhini kunozoapo kuchema, ngokuti ndinozohamba ngepakati penyu,” unoronza Mambo Mwari.

¹⁸ Ihehe kwomuri munodisisa zuva raMambo Mwari! Ngenyi mwechidisisa zuva raMambo Mwari? Chidima, haiwa kujeka;

¹⁹ kudai ngomunhu watiza kubva kumhondoro, nouwo wakashongana nebheya; nokuti apotera mumhatso akatsamira nyara yake parukumbati, nenyoka yoroyomuruma.

²⁰ Zuva raMambo Mwari ariiti chidima here, haiwa kujeka, nechidima kakurutu, chisina kun'anikira mukati mwacho?

²¹ “Ndinonyenya, ndinoshoora mishongano yenyu yemadhiri, andidakariri mishongano yenyu yokudira.

²² Kunyazwi munondipira midiro yenyu inopishwa nemidiro yenyu yezviyo, andizoiashiri; andizopinimidzi ngemidiro yokubonga yezvifuyo zvenyu zvakakora.

²³ Bvisai kwendiri bope rendwiyo dzenyu; andizozwi kuridzwa kwembira dzenyu.

²⁴ Asi kutonga kwakanaka ngakuerere kudai ngemvura, nokururama kudai ngorwizi runesimba.

²⁵ Mwakandiunzira mibairo nemidiro mushango makore makumi marongomuna here, O mhatso yaIsuraeri?

²⁶ Munozotora kukwira naSakuthi mambo wenyu, naKaiwani, chimwari chenyu chenyeredzi, miedzaniso yenyu yemwakadziitira.

²⁷ Ndizvo ndinozoita kuti muende muusungwa mberi kweDhamasekusi,” unoronza Mambo Mwari, uwo zina rake ndiMwari wehondo.