Amo. 4 - Bhaibheri Rakachena muChindau

¹ Izwai izwi iri, imwimwi n'ombe dzeBhashani, muri padera poMutunhu weSamaria, avo vanotambudza varombo, vanopwanya vanotama, vanoti kuvamuna vavo, “Unzai chiro, timwe!”

² Mambo Mwari, Mwari wapika ngokuchena kwake, “Ringira, mazuva anouya padera penyu, apo vanozomudusa ngehoko, nevanosara venyu ngezviyedzo.

³ Kubudikidza ngemaburi erukumbati munozobuda ngepakapwanyiwa, mweshe umwe ngaumwe ngeapo paari pamberi pake, nemwi munozokandirwa muHarmoni,” unoronza Mambo Mwari.

Kukorera kwaIsuraeri Kudzidza

⁴ “Uyai Bhetheri, mupauke; kuGirigari, muwanze zvipauko; unzai mibairo yenyu mangwanani eshe, nechimwe chegumi chenyu mikuwo yeshe yemazuva matatu.

⁵ Mupishe mudiro wokubonga wechingwa chinomumera, nokuteketesa minikero yokuda kwenyu nokuiziisa; ngokuti munoda kuita, O vanhu vaIsuraeri, unoronza Mambo Mwari, Mwari.

⁶ Ndakamupa kusukika kwemazino mumadhorobha enyu eshe, nokutamika kwechingwa kundau dzenyu dzeshe, asi amuzi kupetuka kwendiri, unoronza Mambo Mwari.

⁷ Neni ndakabata mvura kubva kwemuri, apo kuchine mwedzi mitatu yokucheka; ndakaita kuti inaye padera pedhorobha rimwe, ndikaita kuti isanaya padera pedhorobha rimweni; yakanaya padera pemunda umwe, nepamunda apo peisikazi kunaya wakazeketera.

⁸ Ndizvo madhorobha mairi nokuti matatu akahamba kuenda kudhorobha rimwe koomwa mvura, nawo aazi kuguta; asi amuzi kupetuka kwendiri, unoronza Mambo Mwari.

⁹ Ndakamuchaya ngokufota nechirotarota: apo minda yenyu neminda yenyu yemivhini, nemionde yenyu, nemiorivhi yenyu yakabereka kakurutu, machonja akaidya; asi amuzi kupetuka kwendiri, unoronza Mambo Mwari.

¹⁰ “Ndakatumira nhenda pakati penyu kudai ngezvakaitika muEgipite; majaha enyu ndakaauraya ngeshoti, ndikamutorera mahachi enyu; ndakaita kuti kunuhwa kwemakamba enyu kugume kumiro dzenyu; asi amuzi kupetuka kwendiri, unoronza Mambo Mwari.

¹¹ Ndakariga pashi vamweni venyu, kudai ngeapo Mwari paakarigira pashi Sodhoma neGomora, nemwi mwaiya mwakadai ngechitsa chinobviswa pachoto chomuriro; asi amuzi kupetuka kwendiri, unoronza Mambo Mwari.

¹² Ndizvo izvi zvendinozoita kwouri, O Isuraeri; ngokuti ndinozoita ichi kwouri, nasirira kushongana naMwari wako, O Isuraeri!”

¹³ Ngokuti, ringira, uwo unoumba mitunhu, unosika dutu, unoonisa kupinimidza kwake kuvakororo vevanhu, uwo unoita kuti mangwanani aite chidima, nokutsikatsika padera pendau dzakakwirira dzenyika, Mambo Mwari, Mwari wehondo, ndiro zina rake.