Amo. 3 - Bhaibheri Rakachena muChindau

¹ Izwai izwi iri raaereketa Mambo Mwari kurwisana nemwi, O vanhu vaIsuraeri, nemhuri yeshe yendakakwidza kubva kunyika yeEgipite:

² “Ndakazia imwimwi mwega pamhuri dzeshe dzenyika; ndizvo ndinozomuorora ngendaa yokushata kwenyu kweshe.”

Mushando weMuprofeti

³ Vairi vangahamba pamwepo, vasikazi kutenderana here?

⁴ Mhondoro ingarira here mugwasha, apo isina cheyaruma? Mhondoro itsva ingachema here mubako rayo, dai isikazi kubata chiro?

⁵ Shiri ingawa mumurau here pamavhu, apo peisikazi kuteyiwa? Murau ungabwizuka here usina chowabata?

⁶ Gwama ringaridzwa here mudhorobha, nevanhu vakarekera kutya? Zvakashata zvingagumira dhorobha here asi kuti Mambo Mwari azviita?

⁷ Ngegwinyiso Mambo Mwari, Mwari aaiti chiro, asikazi kuonisa chakafishika chake kuvaranda vake vaprofeti.

⁸ Mhondoro yarira, ndiani usikazotyi? Mambo Mwari, Mwari waereketa, ndiani ungareka kuprofeta?

Kuparadzwa kweSamaria

⁹ Teketesai mungome dzeAshidhodhi, nomungome dzomunyika yeEgipite mwechiti, “Unganai pachenyu padera pemitunhu yeSamaria, muringire nyongano huru irimwo mukati mwayo, kutambudzwanyi kuri mukati mwaro.

¹⁰ Avazii kuita zvakarurama, unoronza Mambo Mwari, avo vanounganidza kugebenga nokuba mungome dzavo.

¹¹ Ndizvo izvi ndizvo zvinoronza Mambo Mwari, Mwari: Gaa rinozotendenedza nyika, nokudzasa pashi simba rako, nengome dzako dzinozochakatwa.”

¹² Mambo Mwari unoti: “Kudai ngomuushi unobvuka mirenje miiri kubva kumuromo wemhondoro, nokuti chigurwa chenzee; ndizvo vanhu vaIsuraeri vanogara muSamaria vanozobvukwa pakhona repamusheyareya neparupande rwomubhedhi.”

¹³ Izwai, mupupure ngemhatso yaJakobe, unoronza Mambo Mwari, Mwari wehondo:

¹⁴ “Pazuva rendinoorora Isuraeri padera pokushaisha kwake, ndinozoorora maarita eBhetheri; nenyanga dzearita dzinozogurwa, dzechiwa pamavhu.

¹⁵ Ndinozoputsira pashi mhatso yepachando pamwepo nemhatso yepachirimo; nemhatso dzenyanga dzenzou dzinozoparadzwa, nemhatso dzakakura dzinozopera,” unoronza Mambo Mwari.