Amo. 2 - Bhaibheri Rakachena muChindau

Moabhi

¹ Izvi ndizvo zvinoronza Mambo Mwari: “Ngezvipauko zvitatu zveMoabhi nezvirongomuna, andizopetudzi kuororwa; ngokuti wakapisha magodo amambo weEdhomu kuita dota.

² Ndizvo ndinozotumira muriro padera peMoabhi, nawo unozopedza ngome dzeKeriothi; Moabhi rinozofa mubope, mukudaidzira, mukurira kwegwama.

³ Ndinozogura mutongi kubva pakati payo, ndinozouraya vatongi veshe vayo pamwepo naye,” unoronza Mambo Mwari.

Judha

⁴ Izvi ndizvo zvinoronza Mambo Mwari: “Ngezvipauko zvitatu zvaJudha nezvirongomuna, andizopetudzi kuororwa; ngokuti vakaramba mipango yaMambo Mwari, navo avazi kungwarira zviemeso zvake, asi vakapauswa ngemanyepo amwewo, awo akateerwa ngemadzibaba avo.

⁵ Ndizvo ndinozotumira muriro padera paJudha, nawo unozopedza ngome dzeJerusarema.”

Kutonga kwaMwari padera paIsuraeri

⁶ Izvi ndizvo zvinoronza Mambo Mwari: “Ngezvipauko zvitatu zvaIsuraeri nezvirongomuna, andizopetudzi kuororwa; ngokuti vanotengesa vakarurama ngesirivha, nevarombo ngemagwada mairi,

⁷ avo vanotsikatsika soro romurombo mubukuta remavhu nokusukumidza vakapfaa kubva munjira; baba nomukororo vanoenda mumhandwe imweyo, kuti zina rangu rakachena risvipiswe.

⁸ Vanodziradzika pashi pasinde pemaarita eshe padera pemachira akatorwa kuita chibatiso, nomumhatso yaMwari wavo vanomwa vhini raavo vakaripiswa.

⁹ Asi ndakaparadza muAmori pamberi pavo, uwo kureba kwake kwaiya kwakadai ngourebu hwemisidhari, uwo waiya akagwinya kudai ngemiokhi; ndakaparadza michero yake padera, nenzinde dzake pashi.

¹⁰ Zve ndakamukwidzazve kubva munyika yeEgipite, ndikamutungamirira makore makumi marongomuna mushango, kutora nyika yevaAmori.

¹¹ Ndakamirudza vamweni vevakororo venyu kuita vaprofeti, nevamweni vemajaha enyu kuita vaNaziriti. Andizvopi here, O vanhu vaIsuraeri? unoronza Mambo Mwari.

¹² Asi mwakaita kuti vaNaziriti vamwe vhini; mwakapanga vaprofeti mwechiti, ‘Musazoprofeta.’

¹³ Ndizvo ndinozokutsikirira pashi mundau yako, kudai ngengoro inotsikirirwa apo yakazara ngemwanda yezviyo.

¹⁴ Ndizvo kutiza kwavanokasira kunozopera, nouwo wakagwinya aazokoni kugwinyisa simba rake, nengwazi aizokoni kudziponesa;

¹⁵ nouwo unobata uta aazoemi, nouwo unokona kukasira kurumba aazodziponesi, nouwo unogadha hachi aazodziponesi,

¹⁶ nouwo unomwoyo mukuru pakati pengwazi unozotiza ari mutitinini ngezuva iro,” unoronza Mambo Mwari.