2 VaTes. 3 - Bhaibheri Rakachena muChindau

Tikumbirireiwo

¹ Pakugumisira, hama, tikumbirirei kuti izwi raMambo rihambiswe nokukudzwa, kudai ngezverinoita pakati penyu,

² zve, kuti tinunurwe kubva kuvanhu vasikazi kururama nevakashata; ngokuti andivopi veshe vanokugonda.

³ Asi Mambo unogondeka; unozomugwinyisa nokumungwarira kubva kuno uwo wakashata.

⁴ Nesu tine gonda munaMambo ndimwi, kuti munoita munozoitazve zviro zvetinomupanga.

⁵ Mambo ngaatungamirire mwoyo yenyu kurudo rwaMwari nomukusengerera kwaKristu.

Munosisira Kushanda

⁶ Zvino tinomupanga, hama, muzina raMambo wedu Jesu Kristu, kuti mupauke kubva kunehama yeshe inenungo, isikahambi kudai ngemipango yevakaashira kubva kwetiri.

⁷ Ngokuti imwimwi mwemene munozia njira yokutiedzerera ndiyo isusu; ngokuti atizi kuita nungo pakati penyu,

⁸ atizi kudya chingwa chomunhu nokuti ngouri tisikazi kuchitenga, asi takashanda techitambudzika usiku nemasikati kuti tisazoita mutwaro kunoumwe wenyu;

⁹ haiwa ngokuti taiya tisina simba, asi kuti tidziite chionero kwomuri, kuti imwimwi mutiedzerere.

¹⁰ Ngokuti apo kunyazwi tichinemwi takamupanga kuti, “Kudai aripo munhu usikadi kushanda, asazodya.”

¹¹ Ngokuti tinozwa kuti vamweni vanoita nungo pakati penyu, vasikashandi, asi vanokangaidza vanhu.

¹² Zvino avo vakadaro tinovapanga nokuvapota munaMambo Jesu Kristu kuti vashande mishando yavo ngokunyarara, vadye chingwa chavo.

¹³ Hama, musaremba kuita zvakanaka.

¹⁴ Kudai aripo munhu usikapurutani izwi redu reiyi tsamba, muringisisei munhuwo, kuti musazwanana naye, kuti iye atsveruke.

¹⁵ Musazomuerenga kuti igaa, asi mumupange kudai ngehama.

Mazwi oKugumisira

¹⁶ Zvino Mambo wokunyarara emene ngaamupe kunyarara nguva dzeshe nenjira dzeshe. Mambo ngaagare nemwi mweshe.

¹⁷ Inini Phauri ndanyora kutambisa uku ngenyara yangu yemene. Ichi chioniso chiri mutsamba yangu yeshe; ndiyo njira yendinonyora ndiyo.

¹⁸ Nyasha dzaMambo wedu Jesu Kristu ngadzigare nemwi mweshe.