2 VaTes. 2 - Bhaibheri Rakachena muChindau

Uwo Wakashata

¹ Zvino tinomupota, hama, ngendaa yokuuya kwaMambo wedu Jesu Kristu nokuunganidzwa kwedu kwaari,

² kuti musazokasira kuzungunyiswa mumipinimidzo nokuti kushamiswa, kunyazwi ngomweya nokuti ngeizwi nokuti ngetsamba, yakadai ngeinobva kwetiri, yechiti zuva raMambo raguma.

³ Musazochengedzerwa ngomunhu kunyazwi ngeiri njira; ngokuti zuva iro arizogumi kusati kwaapo kupauka kutanga, nomunhu wokushaisha asati aoniswa, mukororo wokurashwa,

⁴ uwo unorwisa nokudzitunhumadza padera pazvo zveshe zvinozwi zvimwari nepadera pezvinodirwa, ndizvo unogara pachigaro chake mutemperi raMwari, echidziita Mwari.

⁵ Amuchakarakadzi here kuti apo ndichipo nemwi ndakamuronzera izvi zviro?

⁶ Nazvino munozia icho chinomurambidza, kuti uwo aoniswe ngomukuwo wake waguma.

⁷ Ngokuti chakafishika chisikazi kururama choshanda; asi zvichaitika metsa uwo unorambidza zvino abviswa.

⁸ Apapo wakashata unozooniswa, uwo unozoparadzwa ndiMambo Jesu ngomweya womuromo wake, nokumuparadza ngokuoneka kwokuuya kwake.

⁹ Kuuya kwouwo usikazi kururama kwakadai ngokushanda kwaSathani, unoshandisa simba reshe, zvioniso, mishamiso yemanyepo,

¹⁰ ngembeu yeshe yokuchengedzera kweshe kwokusikarurama kwavari vanorashika, ngokuti vanoramba kuda gwinyiso kuti vaponeswe.

¹¹ Ngeiyi ndaa Mwari unovatumira simba guru rokuvapausa, kuti vatende manyepo,

¹² kuti veshe vasikatendi gwinyiso, asi vechidakadzwa ngokusikarurama vatongwe.

Mwakatsanangurirwa Ruponeso

¹³ Asi kunodikanwa kuti tibonge Mwari nguva dzeshe ngendaa yenyu, hama dzinodikanwa munaMambo, ngokuti Mwari wakamutsanangura kuita michero yokutanga yoruponeso kubudikidza ngokucheneswa kwoMweya nokubudikidza ngokutenda gwinyiso.

¹⁴ Ngokuti izvi ndizvo zvaakamudaidzira kubudikidza ngevhangeri redu, kuti muashire uthende hwaMambo wedu Jesu Kristu.

¹⁵ Ndizvo zvino, hama, emai mwakagwinya, mubate mipango yemwakadzidziswa tisu, kunyazwi ngeizwi nokuti ngetsamba yedu.

¹⁶ Zvino Mambo wedu Jesu Kristu emene naMwari Baba edu, uwo wakatida nokubudikidza ngenyasha wakatipa kuembedzerwa kusikaperi negonda rakanaka,

¹⁷ ngaaembedzere mwoyo yenyu nokuigwinyisa kumishando yeshe nokumazwi eshe akanaka.