2 VaTes. 1 - Bhaibheri Rakachena muChindau

Kuchingamidza

¹ Phauri, Sirivhanusi naThimothi, ndinonyorera kuchiara chevaThesaronika chiri munaMwari Baba edu naMambo Jesu Kristu.

² Nyasha ngadzigare nemwi nokunyarara zvinobva kunaMwari Baba edu naMambo Jesu Kristu.

Kubonga

³ Tinosisira kubonga Mwari nguva dzeshe ndimwi, hama, kudai ngezvinosisira, ngokuti kugonda kwenyu kunokura kakurutu, norudo rwenyu umwe kunoumweni runowanzwa.

⁴ Ndizvo isusu temene tinoganza ndimwi pakati pezviara zvaMwari ngendaa yokusengerera kwenyu nokugonda kwenyu mukutambudzika kweshe nomumadambudziko omunoshingirira.

Kutongwa paKuuya kwaKristu

⁵ Izvi zvinoonisa kururama kwokutonga kwaMwari, kuti muerengwe muri vanosisira umambo hwaMwari, uhwo hwomunotambudzikirawo.

⁶ Ngokuti ngegwinyiso chiri chiro chakarurama kunaMwari kuti aunzidzire kutambudzika kwavari vanomutambudza,

⁷ nokupa kuzorora kwomuri vanotambudzika pamwepo nesu, apo Mambo Jesu paanooniswa echibva mudenga pamwepo nengirosi dzake dzine simba,

⁸ mumurazvu womuriro unobaka, echiunzidzira kwavari vasikamuzii Mwari nokwavari vasikapurutani vhangeri raMambo wedu Jesu.

⁹ Avo vanozoororwa ngokuparadzwa kusikaperi, vanozopaurwa kubva kuhope yaMambo nokubva kuuthende hwesimba rake,

¹⁰ apo paanouya kooirikidzwa ngevakacheneswa vake nokushamiswa pakati pavo veshe vanotenda, ngeiro zuva, ngokuti uchapupu hwedu kwomuri hwakatendwa.

¹¹ Ngeiyi ndaa isusu tinomukumbirira nguva dzeshe, techikumbira kuti Mwari wedu amuite vanosisira mukudaidza kwake nokuzadza ngesimba rake rokudisisa kweshe kuita zvakanaka nomushando wokugonda,

¹² kuti zina raMambo wedu Jesu riirikidzwe mwomuri, nemwi muirikidzwe mwaari, kudai ngezvakaita nyasha dzaMwari wedu naMambo Jesu Kristu.