2 VaK. 9 - Bhaibheri Rakachena muChindau

Rudetso kuVaKristu Vamweni

¹ Ngokuti azvisisiri kuti ndinyore kwomuri ngendaa yokushandira vakacheneswa,

² ngokuti ndinozia kudisisa kwenyu, kwendinoganza ndikwo ndimwi kwavari vanhu veMasedhonia, kuti veAkhaiya vakapedza kunasirira gore rakapera; nokutsamwirira kwenyu kwakamusa vazhinji vavo.

³ Asi ndakatumira hama kuti kuganza kwedu ndimwi kusazoita kusina shwiro ngeiyi ndaa, kuti muite vakanasirira, kudai ngezvendakamuronzera;

⁴ kuti kusazoitika, kuti kunyazwi ngeiri njira, kudai vechiuya neni vamweni veMasedhonia, vamuone musikazi kunasirira, isusu, (ndisikaronzi imwimwi), tingazotsverudzwa ngokugonda uku.

⁵ Ndizvo ndaipinimidza kuti zvaisisira kunyengerera hama kuti dzitange pamberi pangu kuuya kwomuri, vanasirire zvipo izvi nguva isati yaguma zvemwakagondisa, kuti zvipo zviite zvakanasirirwa ngokuda kubonga kuti zvisaita zvakapambwa.

⁶ Asi ndinoronza izvi, kuti iye unokusha ngokutsonzedza, unozovhunazve ngokutsongesesa, nouwo unokusha ngokuwanza, unozovhunazve ngokuwanzisisa.

⁷ Umwe ngaumwe ngaape kudai ngezvaakaemesa mumwoyo mwake; haiwa zimupira nokuti ngokuangiridzwa; ngokuti Mwari unoda unopa ngokudakara.

⁸ NaMwari unesimba rokuwanza zvipo zveshe, kuti imwimwi mugutswe ngezviro zveshe ngenguva dzeshe, muwanze kuita mishando yeshe yakanaka.

⁹ Kudai ngezvakanyorwa, “Iye wakakusha ngokuwanza, wakapa varombo; kururama kwake kunogara mhera nariini.”

¹⁰ Uwo unopa mukushi mbeu nechingwa chokudya, uwo unozomupa nokudziwanza mbeu dzenyu dzokukusha, nokuwanza michero yokururama kwenyu.

¹¹ Imwimwi munozofumiswa ngezviro zveshe, mupe ngokusunhurika kweshe, nokushanda kubudikidza tisu, kuti Mwari abongwe;

¹² ngokuti mushando uyu wokukoanisa, auteri kukwanisa kutama kweshe kwevakacheneswa vega, asi kunowandisazve kubonga kuzhinji kunaMwari.

¹³ Kwechioneka kuti ngokuedzwa kwenyu ngouyu mushando, munozoirikidza Mwari ngendaa yokupurutana nokupupura kwenyu vhangeri raKristu, nendaa yokuwanda kwezvipo zvenyu kwavari, nokwavari veshe,

¹⁴ naapo ivo vemene vanomushuwira nokumukumbirira ngendaa yenyasha huru dzaMwari dziri mukati mwenyu.

¹⁵ Ngaabongwe Mwari ngechipo chake chisikabviri kuronzwa!