2 VaK. 8 - Bhaibheri Rakachena muChindau

Kupa kwemaKristu

¹ Ndizvo, hama, tinoda kuti muzie ngenyasha dzaMwari dzakapuwa kuzviara zviri muMasedhonia;

² ngokuti, mukuedzwa kukuru kwokutambudzika, nouwandu hwokudakara kwavo, noudzamu hwourombo hwavo, zvakawandisa upfumi hwokupa kwavo.

³ Ngokuti ndinoita chapupu ndivo, kuti kudai ngezvevaikona, eya, nokupinda zvevaikona, vakapa ngokuda kwavo,

⁴ vechitipota ngokunyengerera kakurutu kuti tiashire ichi chipo noukama mukushandira vakacheneswa.

⁵ Navo vakaita ichi, chisicho chetaikarira; asi kutanga vakadzipira ngokwavo kunaMambo nokwetirizve ngokuda kwaMwari.

⁶ Ngokudaro kudai ngezvetakakumbira Thithusi, kuti iye kudai ngezvaiya aamba, ngokudaro apedzisewo pakati penyu mushando wenyasha.

⁷ Ndizvo kudai ngezvomunowanza munezviro zveshe, mukugonda, mukuereketa, mukuzia, mukutsamwirira kweshe, nomurudo rwenyu kwetiri, wonai kuti muwanzewo muneuyu mushando wenyasha.

⁸ Andiereketi ngokumupanga, asi ngokutsamwirira kwevamweni kuti ndiedze gwinyiso rorudo rwenyuwo.

⁹ Ngokuti imwimwi munozia nyasha dzaMambo wedu Jesu Kristu, kuti kunyazwi iye waiya mupfumi, asi ngendaa yenyu wakaita murombo, kuti imwimwi ngourombo hwake muite vapfumi.

¹⁰ Muneiyi ndaa ndinoronza kupinimidza kwangu, ngokuti izvi zvakamunakira imwimwi, mwakatangira vamweni gore rakapera, musikateri kuita kwega, asi mwechidisisa kuita.

¹¹ Asi zvino pedzisai kuzviita, kuti kudai ngezvemwaidisisa kuita, pedzisai pomunokona ndipo.

¹² Ngokuti kudai kuripo kuda, nechipo chinoashirika kudai ngezvaanazvo munhu, haiwa kudai ngezvaasina.

¹³ Ngokuti andironzi izvi kuti vamweni varerukirwe, nemwi mwechitambudzika, asi kuti mutodzane;

¹⁴ kuti kuwandirwa kwenyu ngenguva iyi kudetsere kutama kwavo, kuti kuwandirwa kwavozve kudetsere kutama kwenyu; kuti kuapo kutodzana.

¹⁵ Kudai ngezvakanyorwa, “Aye wakaunganidza zvakawanda aazi kusara nechiro; nouwo wakaunganidza zvishomani aazi kutama chiro.”

Thithusi neVamweni vake

¹⁶ Asi ngaabongwe Mwari uwo wakaisa mumwoyo mwaThithusi ukwo kutsamwirira kwendaiya nakwo pachangu ndimwi.

¹⁷ Ngokuti ngegwinyiso iye wakazwa kupota kwedu; asi iye emene, echitsungirira kakurutu, wakabuda kuuya kwomuri ngokuda kwake.

¹⁸ Nesu tinotumira pamwepo naye hama iyo inembiri yakanaka kuzviara zveshe;

¹⁹ andizvopi zvega, asi wakaemeswazve ngezviara kuti ahambe nesu ngendaa yeizvi zvipo zvinoshandwa tisu, kuita kuti Mambo airikidzwe, nokuonisa kutendera kwedu.

²⁰ Techingwarira kuti munhu asatiitira ndaa ngouwandu hweizvo zvinoshandwa tisu,

²¹ ngokuti tinongwarira kuti zviite zvinoremeredzeka, haiwa kwega mukuona kwaMambo, asi nomukuona kwevanhuwo.

²² Nesu takatuma pamwepo navo hama yedu, yetakaedza nguva zhinji tikaona kuti inotsungirira zviro zvizhinji, asi zvino iri inopindisisa kutsungirira, ngendaa yegonda guru reinaro kwomuri.

²³ Kudai ndiThithusi, mudetseri wangu nomungani wangu mumushando unoitwa kwomuri; ngendaa yehama dzedu, ndidzo nhumwa dzechiara, uthende hwaKristu.

²⁴ Ndizvo wonesai kwavari chioniso chorudo rwenyu, nechokuganza kwedu ndimwi, mukuona kwezviara.