2 VaK. 7 - Bhaibheri Rakachena muChindau

¹ Ndizvo vanodikanwa, kudai ngezvetinazvo izvi zvigondiso, ngatidzichenese pachedu kubva kunezvinosvipisa zveshe zvenyama nezvomweya, techiperera mukucheneswa mukutya Mwari.

Kudakara kwaPhauri

² Tibeurirei ndau mumwoyo yenyu; atizi kushaishira munhu, atizi kusvipisa munhu, atizi kubira munhu.

³ Andironzi izvi kumuitira ndaa, ngokuti ndakamboronza kuti muri vepamwoyo yedu, kuti tife pamwepo nokupona pamwepo.

⁴ Ndakaganza ndimwi nguva dzeshe; ndinodzikudza ndimwi kakurutu; ndakazara ngokuembedzerwa, ndinodakara kakurutu mukutambudzika kwedu kweshe.

⁵ Ngokuti kunyazwi taguma Masedhonia, miiri yedu aizi kuzorora, asi takatambudzwa kumarupande eshe; ngokubanze kwaiyayo kuambana, ngomukati kwaiyamwo kutya.

⁶ Asi Mwari uwo unoembedzera vakasvipa mwoyo, iye wakatiembedzera ngokuguma kwaThithusi,

⁷ haiwa ngokuguma kwake kwega, asizve ngokuembedzerwa kwaakaembedzerwa ndikwo ndimwi, echitironzera ngechishuwo chenyu nokuchema kwenyu nokushingirira kwenyu ngendaa yangu; ndizvo ndakapindisisa kudakara.

⁸ Ngokuti kunyazwi ndakamuchemedza ngetsamba yangu, andisvipi mwoyo ndizvo, kunyazwi ndakanyasvipa mwoyo ndizvo; ngokuti ndinoona kuti iyo tsamba yakamuchemedza, asi kwega kwomukuwo mufupi.

⁹ Zvino ndinodakara, haiwa ngokuti mwakachemedzwa, asi kuti mwakachemedzwa kuti mutenderuke. Ngokuti mwakachemedzwa ngendaa yokuda kwaMwari, kuti musarashikirwa ngechiro ngendaa yedu.

¹⁰ Ngokuti kuchemedzwa kunobva kunaMwari kunounza kutenderuka kworuponeso, kuri kutenderuka kusina kuchema. Asi kuchema kwomunyika kunopara rufu.

¹¹ Ngokuti wonai kutsamwirira kwokuchemedzwa ngenjira yaMwari kwakaunza kutsamwirira kwakaitawani kukura mukati mwenyu! Eya, kudzirwira, kunyangadzwa, kutya, chishuwo, kushingirira nokuunzidzira! Ngezviro zveshe mwakadzipangidzira kuti muri vasina ndaa kuneizvi.

¹² Ndizvo kunyazwi ndakanyora kwomuri, andizi kunyora ngendaa youwo wakaita kushata ukwo, nokuti ngendaa youwo wakashaishirwa, asi kuti kutsamwirira kwenyu ngendaa yedu kuoniswe kwomuri pamberi paMwari.

¹³ Ndizvo takaembedzerwa. Kututsira mukuembedzerwa kwedu takadakara kakurutu ngendaa yokudakara kwaThithusi, ngokuti mweya wake wakagwinyiswa ndimwi mweshe.

¹⁴ Ngokuti kudai chainyaiapo chiro chendakaganza kwaari ndimwi, andizi kutsverudziswa; asi kudai ngezvetakaereketa zviro zveshe kwomuri zvaiya gwinyiso, kwakadarozve nokuganza kwedu, kwendakaita pamberi paThithusi, kwakaoneka kuti kunegwinyiso.

¹⁵ Norudo rwake rwomwoyo runopinda kuwanzwa kwomuri, apo ookarakadza nokupurutana kwenyu mweshe, kuti mwakamuashira ngokutya nokuhuta.

¹⁶ Ndinodakara kuti ngezviro zveshe ndinogonda ndimwi.