2 VaK. 6 - Bhaibheri Rakachena muChindau

¹ Mukushanda pamwepo naye, tinomupota kuti musaashira nyasha dzaMwari pasina shwiro.

² Ngokuti iye unoti, “Ndakamuzwa ngenguva inoashirika, nepazuva rokuponeswa ndakakudetsera”; penyai, zvino ndiyo nguva inoashirika; penyai, zvino zuva roruponeso.

³ Isusu atiisi chipumhuniso munjira youmweni kuti kushandira kwedu kusazoshoorwa,

⁴ asi ngezviro zveshe tiite vanotendwa kudai ngezvinosisira vashandi vaMwari, kubudikidza ngokusengerera kukurutu, mukutambudzika, mukutama, mukuhahairwa,

⁵ mukurohwa, mukukonyerwa mutirongo, muhohoho, mukushanda ngesimba, mukurinda, munzara,

⁶ mukucheneswa, mukuzia, murubambazira, mukuitirwa nyasha, muMweya Wakachena, ngorudo rusikadziitisi,

⁷ ngeizwi regwinyiso, ngesimba raMwari; ngezvokurwa ndizvo zvokururama ngokumudyo nokumuoshwe;

⁸ mukukudzwa nomukusikakudzwa, mukureyiwa nomumbiri yakanaka; tinobatwa kudai ngevachengedzi, asi tiri vegwinyiso;

⁹ kudai ngevasikaziikanwi, asi tiri vanonasa kuziikanwa; kudai ngevanofa, asi wonai tinopona; kudai ngevanoororwa, asi atiurawi;

¹⁰ kudai ngevanosvipa mwoyo, asi tinogara techidakara; kudai ngevarombo, asi tinofumisa vazhinji, kudai ngevasina chevanacho, asi tinazvo zveshe.

¹¹ Muromo wedu wakaereketa zvakaperera kwomuri, imwimwi vaKhorinte; mwoyo yedu yakabeuka yaamho.

¹² Amumanikidzwi tisu, asi munodzimanikidza murudo rwenyu.

¹³ Zvino ngokuunzidzira kwakatodzana, ndinoereketa kudai ngounoereketa kwendinoita kuvana vangu, mwoyo yenyu ngaibeuke yaamho.

Temperi raMwari Unopona

¹⁴ Musaita vanosungirwa ngokusikasisirani pamwepo nevasikatendi. Ngokuti kuri pari kuzwanana kwokururama nokushata? Nokuti kuri pari kuiyana kwokujeka nechidima?

¹⁵ Nokuti kuri pari kutenderana kwaKristu naBheriari? Nokuti mutendi unechikoaniswa chenyi nousikatendi?

¹⁶ Kuri pari kutenderana kwetemperi raMwari nemiedzaniso yokudira? Ngokuti isusu tiri temperi raMwari unopona; kudai ngezvaakaronza Mwari kuti, “Ndinozogara pakati pavo, nokuhamba pakati pavo; neni ndinozoita Mwari wavo, navo vanozoita vanhu vangu.

¹⁷ Ndizvo budai kubva pakati pavo, mudziparadzanise kubva kwavari, unoronza Mambo Mwari, musagwama chiro chakasvipiswa; naapo ndinozomuashira

¹⁸ neni ndinozoita Baba enyu, nemwi munozoita vakororo vangu nevasikana vangu, unoronza Mambo Mwari Unesimbareshe.”