2 VaK. 5 - Bhaibheri Rakachena muChindau

¹ Ngokuti tinozia kuti dai mhatso yetinogara yomunyika muno yanyaputsika, iri muchacha, tinayo mhatso inobva kunaMwari, isikazi kuakwa ngenyara, yemhera nariini iri mudenga.

² Ngokuti tiri muneuyu muchacha tinogomera, techidisisa kufukidzwa ngemhatso yedu inobva mudenga,

³ kudai ngegwinyiso techipfekedzwa kudaro tisazooneka tiri mititinini.

⁴ Ngokuti isusu tichiri mumuchacha uyu, tinogomera, techidzimbirwa; haiwa kuti tikumurwe, asi kuti tipfekedzwe, kuti uwo unofa amedzwe ngokupona.

⁵ Zvino uwo wakatiitira chiro chakadaro ndiMwari, uwo wakatipa chibatiso choMweya.

⁶ Ndizvo tinotsunga mwoyo nguva dzeshe, techizia kuti tichapona ngomuiri uyu, tiri kuretu kubva kunaMambo,

⁷ ngokuti tinohamba ngokugonda, haiwa ngokuona.

⁸ Tinotsunga mwoyo, nesu tinotenda kusiya muiri wedu, tiite vaa kanyi naMambo.

⁹ Ngeiyi ndaa tinechidisiso chedu chokuti tinyari pakanyi nokuti tisipo, tiite vanodakadza kwaari.

¹⁰ Ngokuti isusu teshe tinozooneka pamberi pechigaro chokutonga chaKristu, kuti umwe ngaumwe aashire kudai ngezvaakaita mumuiri, zvakanaka nokuti zvakashata.

Ukama naMwari kubudikidza ndiKristu

¹¹ Ndizvo techizia kutya Mambo, tinoonga vanhu, asi tiri vanoziikanwa kunaMwari; neni ndinogondazve kuti tiri vanoziikanwa mumhumba dzenyu.

¹² Atidziganzisizve kwomuri, asi tinomupa nguva yokuganza tisu, kuti mukone kupingura kuneavo vanoganza ngezvinooneka, haiwa ngezvomumwoyo.

¹³ Ngokuti tinyari vanopenga, tinodaro ngendaa yaMwari, nokuti tinyari vakaterama, tinodaro ngendaa yenyu.

¹⁴ Ngokuti rudo rwaKristu runotionga; ngokuti tinozia kuti umwe wakafira veshe; ndizvo veshe vakatofa.

¹⁵ Naye wakafira veshe kuti avo vanopona vasachadziponera pachavo, asi kuti vaponere kunouwo wakafa ngendaa yavo, akamuswazve.

¹⁶ Ndizvo isusu kubvira zvino atichazii munhu naumwe ngokwenyama. Kunyazwi takamuzia Kristu ngokwenyama, asi zvino atichamuzii ngokwakadaro.

¹⁷ Ndizvo kudai munhu ari munaKristu, waa chisikwa chitsva; zviro zvekaretu zvapinda, wonai zvaitwa zvitsva!

¹⁸ Zveshe izvi zvinobva kunaMwari, uwo wakatiiyanisa kwaari kubudikidza ndiKristu, naye wakapa kwetiri mushando wokuiyanisa;

¹⁹ ndikwo kuti, Mwari waiya munaKristu, echiiyanisa nyika kwaari, asikaerengeri kwavari kupauka kwavo, naye wakapa kwetiri izwi rokuiyanisa.

²⁰ Ndizvo tinoita vaemereri vaKristu, zvechiita ingatei Mwari wainyengerera vanhu kubudikidza tisu. Tinomupota ngendaa yaKristu, itai vanoiyaniswa munaMwari.

²¹ Iye wakamuita kushaisha ngendaa yedu, uwo waiya asikazi kuzia kushaisha, kuti mwaari isusu tiite kururama kwaMwari.