2 VaK. 3 - Bhaibheri Rakachena muChindau

Varanda veChitenderano Chitsva

¹ Tinotangazve kudziganzisa pachedu here? Ngegwinyiso tinotama here kudai ngezvevanotama vamweni, tsamba dzokutendwa ndidzo dzinonyorerwa kwomuri, nokuti dzinobva kwomuri?

² Imwimwi pachenyu muri tsamba yedu, yakanyorwa pamwoyo yedu, inoziikanwa nokudzidzwa ngevanhu veshe;

³ nemwi munoonisa kuti muri tsamba yaKristu, yakashandwa tisu, isikazi kunyorwa ngeinki, asi ndiMweya waMwari unopona, isikazi kunyorwa pamarusamba emapuwe, asi pamarusamba omwoyo yenyama.

⁴ Nesu tinakwo kugonda kwakadaro kunaMwari kubudikidza ndiKristu.

⁵ Haiwa kuti isusu pachedu tagutswa, kuti tironze chiro kuti chinobva kwetiri, asi kugutswa kwedu kunobva kunaMwari,

⁶ uwo wakatiita vanokona kuita vashandiri vechitenderano chitsva, haiwa chetsamba yakanyorwa, asi choMweya; ngokuti zvakanyorwa zvinouraya, asi Mweya unopa kupona.

⁷ Zvino kudai mazwi emishando yorufu, akanyorwa nokunangurwa pamapuwe kwakauya nouthende, kwakaita kuti vana vaIsuraeri vasakona kuringisisa hope yaMosi ngendaa yokun'anikira kwayo, uhwo uthende hwaipinda,

⁸ kunozopinda kwakaitawani kupenya kwouthende kwemishando yoMweya?

⁹ Ngokuti kudai mishando yokurashwa yaiya nouthende, uthende hwemishando yokururama hunopinda kwakaitawani kupenya!

¹⁰ Ngegwinyiso icho chaiya nouthende hwapera, uthende hwacho, ngendaa youthende hwakapindisisa kukura.

¹¹ Ngokuti kudai icho chaipinda chakauya kubudikidza ngouthende, kakurutu icho chinogara chinouthende hunopinda.

¹² Ndizvo zvino tinakwo kugonda kwakadaro, tinoereketa ngokutsunga kukurutu.

¹³ Atizi kudai ndiMosi, uwo wakafukidzira hope yake ngejira, kuti vana vaIsuraeri vasazoringisisa magumo ezvaipinda.

¹⁴ Asi mipinimidzo yavo yakakonzeswa. Ngegwinyiso metsa nyamashi naapo pevanozwa kudzidzwa kwechitenderano chekaretu, jira rimwero rindoripo risikazi kufukurwa, iro jira rinoduswa munaKristu mwega.

¹⁵ Asi metsa nyamashi, apo zvinyorwa zvaMosi zvechidzidzwa, jira iro rindoripo padera pemwoyo yavo;

¹⁶ asi apo munhu echizotenderukira kunaMambo, jira iro rinoduswa.

¹⁷ Zvino Mambo ndiMweya; naapo panoMweya waMambo, kuripo kusunhurika.

¹⁸ Isusu teshe tinehope dzisikazi kufukidzwa, techiringira uthende hwaMambo, kudai ngomuchiboniboni, tinotsandudzwa techitodzana nomuedzaniso umwewo kubva kuuthende humweni kuenda kuuthende humweni; ngokuti zvinobva kunaMambo, Mweya.