2 VaK. 2 - Bhaibheri Rakachena muChindau

¹ Asi ndakadziemesera pachangu, kuti andizoitizve kwomuri rwendo rumweni runomutambudza.

² Ngokuti kudai ndechimutambudza imwimwi, ndizvo ndiani ungazondidakarira, kwega uwo wakatambudzwa ndini?

³ Neni ndakanyora ichi kwomuri kuti ndoogumeyo, ndisazotambudzika ngaavo vendinosisira kudakara ndivo; ndechigonda kwomuri mweshe kuti kudakara kwangu ndikwo kudakara kwenyu mweshe.

⁴ Ngokuti ngokutambudzika kukurutu nokurwadziwa kwomwoyo ndakanyora kwomuri, ndinemisodzi mizhinji; haiwa kuti mutambudzike, asi kuti muzie rudo rukuru rwendinarwo kwomuri.

Kukungurirwa kwoMunhu Mushaishi

⁵ Asi kudai aripo wakaita dambudziko, iye aazi kutambudza inini, asi kuti wakatambudza imwimwi, andidi kuti ndinyanye kumutambudza imwimwi mweshe.

⁶ Kuororwa kwavanhu vazhinji kunokwana kumunhu wakadaro;

⁷ ndizvo zvino kwaisisira kuti imwimwi mumukungurire nokumuembedzera, kuti asazomedzwa ngokutambudzika kwakapinda kukura.

⁸ Ndizvo ndinomupota kuti mugwinyise rudo rwenyu kwaari.

⁹ Ngeiyi ndaa ndakanyora kwomuri kuti ndimuedze ndimuzie, kuti munopurutana here muzviro zveshe.

¹⁰ Asi kunouwo womunokungurira chiro, neniwo ndinomukungurira; ngokuti izvo zvendakungurira, kudai ndakukungurira zviro, ndakazvikungurira ngendaa yenyu mukuona kwaKristu.

¹¹ Tinoita izvi kuti Sathani asazoona chokutinyisa ndicho; ngokuti atiri vasikazii mazano ake.

Kudembatemba kwaPhauri muTroasi

¹² Zvino apo ndaguma Troasi koochumaira vhangeri raKristu, musiwo wakabeurirwa kwendiri ndiMambo;

¹³ asi ndaiya ndisina kuzorora mumweya wangu, ngokuti andizi kuonapo Thithusi hama yangu; asi ndechivavhaisa, ndakaenda Masedhonia.

Kunyisa Kubudikidza ndiKristu

¹⁴ Asi ngaabongwe Mwari, uwo munaKristu unotitungamirira kudai ngemabhanditi mukufora kwokunyisa kwaKristu. Mwari unotishandisa kuti ruziyo ngendaa yaKristu rugume kundau dzeshe kudai ngegwema rakanaka.

¹⁵ Ngokuti isusu tiri gwema rakanaka raKristu kunaMwari, pakati paavo vanoponeswa nepakati paavo vanoparadzwa.

¹⁶ Kuneavo tiri gwema rinobva murufu kuenda murufu; nokune vamweni tiri gwema rinobva mukupona kuenda mukupona. Ndiani ungakona kuita mushando wakadai?

¹⁷ Ngokuti isusu atizi kudai ngevazhinji vamweni, vanoshaishira izwi raMwari; asi munaKristu tinoereketa kudai ngevanhu vegwinyiso, kudai ngevanhu vakatumwa kubva pamberi paMwari.