2 VaK. 13 - Bhaibheri Rakachena muChindau

Kupanga kwoKugumisira noKuvhaisa kwaPhauri

¹ Iyi inguva yechitatu yendinouya kwomuri. “Ngemiromo yezvapupu zviiri nokuti zvitatu mazwi eshe anozogwinyiswa.”

² Ndakavaronzera avo vakashaisha karetu nevamweni veshe ndinovaronzerazve, zvino ndisipo navo, kudai ngezvendaiyapo ngomukuwo wechipiri, kuti ndouyeyozve, andizovakunguriri;

³ mwechitsvaka chioniso chaKristu unoereketa kwendiri. Aazi kurembedzeka kwomuri, asi unesimba mukati mwenyu.

⁴ Ngokuti wakakohomerwa pamuchinjiko ngendaa yokurembedzeka, asi unopona ngesimba raMwari. Ngokuti nesuwo tiri vakarembedzeka mwaari, asi techishanda pamwepo nemwi tinozopona pamwepo naye ngesimba raMwari.

⁵ Dziringisisenyi imwimwi pachenyu, muone kuti muri mukutenda here. Dziedzenyi pachenyu. Amuzii here pachenyu, kuti Kristu uri mukati mwenyu? Asi kuti muri vakarashwa!

⁶ Asi ndinogonda kuti imwimwi munozozia kuti isusu atizi kurashwa akadi.

⁷ Asi tinokumbira kunaMwari kuti imwimwi musaita chiro chakashata nachimwe; andikwopi kuti isusu tioneke tiri vakagondeka, asi kuti muite zvinoremeredzeka, kunyazwi isusu tinoerengwa tiri varashwa.

⁸ Ngokuti apana chetingaita chinorwisana negwinyiso, asi zvinoemererana negwinyiso.

⁹ Ngokuti tinodakara apo isusu tiri vakarembedzeka, imwimwi mwakagwinya. Ndizvo zve, tinokumbirira ichi kuti muite vakaperera.

¹⁰ Ngeiyi ndaa ndinonyora kwomuri izvi zviro ndisipo pomuri, kuti apo ndaapo ndisazofemurika mukushandisa simba rendakapuwa ndiMambo rokuaka, haiwa rokuputsira pashi.

Mazwi noMukumbiro woKupedzisira

¹¹ Pakupedzisira, hama, chisarai. Itai vakaperera, purutanai kupanga kwangu; itai vano mupinimidzo umwewo, mugare mukunyarara; naMwari worudo nowokunyarara unozogara nemwi.

¹² Chingamidzanai ngomuromo ngokucheneswa. Veshe vakacheneswa vanomutambisa.

¹³ Nyasha dzaMambo Jesu Kristu norudo rwaMwari nokuiyana kwoMweya Wakachena ngazvigare nemwi mweshe.