2 VaK. 12 - Bhaibheri Rakachena muChindau

Phauri Unooniswa Zvioniso

¹ Ndinosisira kuti ndiganze, kunyazwi azvizi kunaka; asi ndaguma mukuereketa ngezvioniso nezvakaoniswa zvaMambo.

² Ndinozia munhu waiya munaKristu makore gumi namarongomuna apinda, wakakwidzwa mudenga rechitatu (kunyazwi waiya mumuiri kunyazwi waiya ngokubanze kwomuiri, andizii; ndiMwari unozia).

³ Neni ndinozia uwo munhu (kunyazwi waiya mumuiri nokuti waiya ngokubanze kwomuiri, andizii; ndiMwari unozia);

⁴ nenjira yaakakwidzwa ndiyo kuenda muPharadhaisi, naye wakazwa zviro zvisikabviri kuronzwa, zvisikatenderwi munhu kuti azvironze.

⁵ Ngendaa yewakadaro ndinozoganza; asi ngendaa yangu andizoganzi, kwega kuganza ngokurembedzeka kwangu.

⁶ Ngokuti kunyazwi ndechida kuganza, andizoiti benzi, ngokuti ndinozoereketa gwinyiso. Asi ndinorekera kuita kudaro, kuti kusazoapo naumwe ungapinimidza ndini, kupinda maonere aanondiita, nokuti kupinda mazwire aanoita ndini.

⁷ Ndizvo kuti inini ndirekere kuganza ngendaa yokukura kweizvo zvakaoniswa kwendiri, kwakapuwa kwendiri munzwa mumuiri, uri mutumwa waSathani, kuti unditambudze, kuti ndisazoganza kupinda binzo.

⁸ Ngendaa yeichi, ndakapota Mambo katatu, kuti ubviswe kwendiri,

⁹ asi wakati kwendiri, “Nyasha dzangu dzinokwana kwouri, ngokuti simba rinoitwa rakaperera mukurembedzeka.” Ndizvo ndinozopinda kuganza ngokudakara mukurembedzeka kwangu, kuti simba raKristu rigare padera pangu.

¹⁰ Ndizvo ndinodakara mukurembedzeka, mukuremadzwa, mukutamikirwa, mukutambudzwa, mumadambudziko, ngendaa yaKristu; ngokuti apo ndiri wakarembedzeka, naapo ndinesimba.

Phauri Unotambudzika ngendaa yeVaKhorinte

¹¹ Ndaa benzi! Imwimwi mwakandiangiridza kuti ndidaro. Ngokuti inini ndaisisira kuti nditendwe ndimwi, ngokuti andiri mudokopi kunevapostori vepadera, kunyazwi andiri chiropi.

¹² Ngegwinyiso zvioniso zvoupostori zvakaitwa pakati penyu mukusengerera kweshe, ngezvioniso nemishamiso nemishando inesimba.

¹³ Ngokuti chiinyi chemwakapindwa ndicho kuita vari pashi kune zviara zvimweni, kwega kuti inini pachangu andizi kuita mutwaro kwomuri? Ndikungurirenyi ngouku kusikarurama!

¹⁴ Ringirai, inguva yechitatu yendanasirira kuti ndiuye kwomuri. Neni andizoiti mutwaro, ngokuti anditsvaki zvenyu, asi ndinotsvaka imwimwi; ngokuti akusisiri kuti vana vaunganidzire vabari, asi kuti vabari vaunganidzire vana vavo.

¹⁵ Inini ndinozopedza zveshe zvangu nokupedzwa ngokudakara, ngendaa yomweya yenyu. Kudai ndechimuda kakurutu, kudiwa kwangu ndimwi kunozopinda kutsonga here?

¹⁶ Asi zvakanyadaro, inini pachangu andizi kuita mutwaro kwomuri; asi ndiri wakangwara, ndakamubata ngourimbwi!

¹⁷ Ndakauyirwa here ndimwi kubudikidza ngoumwe weavo vendakatuma kwomuri?

¹⁸ Ndakapota Thithusi kuti ndimutume, ndikamutuma pamwepo nehama. Thithusi unacho chaakauyirwa ndicho here kwomuri? Atizi kuhamba here ngomweya unotodzana? Atizi kuhamba here muzvitsiko zvakatodzana?

¹⁹ Munopinimidza kuti nguva iyi yeshe tinodzipembedza pamberi penyu here? Mukuona kwaMwari tinoereketa munaKristu. Asi zviro zveshe, vanodikanwa, zviri zvokuakiwa kwenyu.

²⁰ Ngokuti ndinotya, kuti kunyazwi ngeiri njira, apo ndouyeyo, ndingazomuona musiri avo vendingada kuti muite vakadaro, neni ndemene ndioneke kwomuri ndiri womusikadi kuti ndiite wakadaro; kuti pamweni kunyazwi ngeiri njira kungazoapo hasha, ndurumwa, ushungu, kusikazwanana, kureyana, makuhwa, kudzikudza nehohoho.

²¹ Ndinotya kuti apo ndogumeyozve, Mwari wangu unozondipfaisa pamberi penyu, neni ndingazotsumba ngendaa yevazhinji vakashaisha ngepamberi, vasikazi kutenderuka kubva mukusikasukika, kuomba nezvinotsverudza zvevakaita.