2 VaK. 1 - Bhaibheri Rakachena muChindau

Kuchingamidza

¹ Phauri, mupostori waKristu Jesu ngokuda kwaMwari, naThimothi hama yedu, kuchiara chaMwari chiri muKhorinte, pamwepo nevakacheneswa veshe vari munyika yeshe yeAkhaiya;

² nyasha ngadzigare kwomuri nokunyarara kunobva kunaMwari Baba edu naMambo Jesu Kristu.

Phauri Unobonga Mwari

³ Ngaakudzwe Mwari naBaba aMambo wedu Jesu Kristu, Baba wenyasha, Mwari wokuembedzera kweshe,

⁴ uwo unotiembedzera mukutambudzika kwedu kweshe, kuti isusuwo tikone kuembedzera avo vari mukutambudzika kunyazwi kwakaitawani, ngoukwo kuembedzerwa kwetinoembedzerwa ndikwo pachedu ndiMwari.

⁵ Ngokuti kudai ngokutambudzika kwaKristu kunowanzwa kwetiri, ndizvo kuembedzerwa kwedu kunowanzwawo kubudikidza ndiKristu.

⁶ Kudai techitambudzwa, kunoitirwa kuembedzerwa noruponeso rwenyu; kunyazwi techiembedzerwa, kunoitirwa kuembedzerwa kwenyu, kunoshanda mukushingirira nomukusengerera paawo madambudziko etinotambudzikawo ndiwo.

⁷ Gonda redu ndimwi rakagwinya; techizia izvi, kuti kudai ngezvomunokoanisirana madambudziko edu, ndizvo munokoanisirana kuembedzerwa kwedu.

⁸ Ngokuti atidi, hama, kuti muite vasikazii ngokutambudzika kwedu kwakatigumira tiri muAsia; kuti takaremerwa kakurutu kupinda simba redu, ngokudaro negonda reshe rokuti tinopona rakapera.

⁹ Ngegwinyiso isusu pachedu takazwa mumwoyo yedu kuti taiya taashira kutongerwa rufu, kuti tisadzigonda pachedu, asi kuti tigonde kuna Mwari unomusa vakafa.

¹⁰ Uwo wakatinunura kubva mukufa kwakakura kudaro, unozoangira kutinunura; mwaari tinogonda kuti uchazotinunura.

¹¹ Imwimwiwo mwechitidetsera ngemikumbiro yenyu, kuti vazhinji vatibongere ngendaa yezvifumiso zvenyasha zvakapuwa kwetiri ngendaa yemikumbiro mizhinji.

Phauri Unotsandura Urongwa hwake

¹² Ngegwinyiso uku ndikwo kudziganzisa kwedu, kuri chapupuzve chemhumba yedu, kuti takadzibata munyika mukucheneswa nomugwinyiso raMwari, kakurutu takaita kudaro kwomuri, haiwa ngoungwaru hwenyama akadi, asi ngenyasha dzaMwari.

¹³ Ngokuti atinyori zviro zvimweni kwomuri, asi zvomunofunda nokuzwisisa, neni ndinogonda kuti munozozvizwisisa metsa kumagumo,

¹⁴ kudai ngezvemwakatizwisisa ngezvimweni, kuti ngezuva raMambo wedu Jesu isusu tiri kuganza kwenyu, kunyazwi imwimwiwo muri kuganza kwedu.

¹⁵ Mukugonda uku ndaipinimidza kuti nditange kuuya kwomuri, kuti mufumiswe kwechipiri.

¹⁶ Nokupinda ngokwomuri ndechienda Masedhonia, ndoobva Masedhonia ndipetuke kwomuri, ndiendiswe mberi ndimwi murwendo rwangu rweJudhia.

¹⁷ Ndizvo apo ndaipinimidza kudaro, ndakaonisa kushanduka kwomwoyo here? Nokuti izvo zviro zvendinoemesa kuti ndiite, ndinozozviemesa here ngokwenyama, kuti kungaapo kwendiri kuronza kuti, “Eya, eya,” nokuti, “Haiwa, haiwa?”

¹⁸ Asi kudai ndiMwari unogondeka, izwi redu kwomuri andiropi rokuti, “Eya naHaiwa.”

¹⁹ Ngokuti Mukororo waMwari, Jesu Kristu, uwo wetakachumaira pakati penyu inini, Sirivhanusi naThimothi, waiya asiri, “Eya” nokuti, “Haiwa,” asi mwaari unoramba ari, “Eya.”

²⁰ Ngokuti mwaari chimwe ngachimwe chezvigondiso zvaMwari kwaari zviri, “Eya.” Ngendaa iyi kubudikidza ndiye tinoti, “Ameni,” kuita kukudzwa kwaMwari tisu.

²¹ Asi ndiMwari uwo unotigwinyisa pamwepo nemwi munaKristu, nowakatidzodza,

²² ngokuisa ruphau rwake padera pedu, akatipazve chibatiso choMweya mumwoyo yedu.

²³ Asi ndinodaidza Mwari kuita chapupu kumwoyo wangu, kuti ngendaa yokusikada kumutambudza andizi kuuya Khorinte.

²⁴ Haiwa, kuti titonge padera pokugonda kwenyu; asi tinoshanda pamwepo kumudetsera kuti mudakare; ngokuti munoema mwakagwinya mukugonda.