2 Tim. 3 - Bhaibheri Rakachena muChindau

Mazuva oKugumisira

¹ Asi zwisisa izvi, kuti kumazuva okugumisira nguva dzokutambudzika dzinozouya.

² Ngokuti vanhu vanozodzida pachavo, vechidisisa upfumi, vechiganza, vechidzikudza, vechituka, vasikapurutani vabari, vasikabongi, vasikazi kucheneswa,

³ vasina rudo kuhama, vasikaiyanisiki, vanoreya, vasikadzibati, vanotyisa, vanoshoora zvakanaka,

⁴ vachengedzeri, madzongoni, vanodzidingaringa, vanopinda kuda mitambe yakashata pane kuda Mwari,

⁵ vane chiemo chokudira kubanze, asi vechiramba simba rakwo. Ibva kwavari!

⁶ Ngokuti pakati pavo varipo vanozvonga kupotera mumhatso vechibata vakadzi vakarembedzeka, vanodzimbirwa ngezvishaishi, vechikweyiwa ngokuemura kwakaparadzana,

⁷ vanogara vechidzidziswa, vasikatongohaniri ruziyo rwegwinyiso.

⁸ Kudai ndiJanesi naJambresi vakarwisana naMosi, ndizvo navo vanorwisana negwinyiso, vanhu vakashaishirwa mumipinimidzo, vakarashikirwa ngokugonda kwavo.

⁹ Asi avazobudiriri kuende mberi, ngokuti upenzi hwavo hunozobuda pamhene kuvanhu veshe, kudai ngohwaavozve vanhu vairi hwakaita kudaro.

Kupanga kwaPhauri kwoKugumisira

¹⁰ Zvino iwewe wakateera kudzidzisa kwangu, kuhamba kwangu, kudisisa, kugonda, kugwinyisira, rudo nokusengerera,

¹¹ madambudziko nenhamo, izvo zvakandigumira muAntiokhi, muIkoniumu nomuRistria, kutambudzikanyi kwendakashingirira. Mambo wakandinunura kubva kwezviri zveshe.

¹² Ngegwinyiso naavo veshe vanoda kuhamba ngokururama muna Kristu Jesu vanozotambudzwa.

¹³ Asi vanhu vakashata nevanochengedzera vanozoangira kupinda kushata, vechichengedzera nokuchengedzerwa.

¹⁴ Asi iwewe, gara muizvo zvowakadzidza nokugwinyiswa ndizvo, wechizia avo vewakadzidziswa ndivo,

¹⁵ zve, kubvira paudoko hwako, wakazia zvinyorwa zvakachena zvine simba rokuita kuti ungware kuruponeso kubudikidza ngokugonda muna Kristu Jesu.

¹⁶ Zvinyorwa zveshe zvakafemerwa ndiMwari, zvinodetsera kudzidzisa, kurambidza, kupanga nokudzidzisa njira yokupona kwakarurama,

¹⁷ kuti munhu waMwari aite wakaperera, anazvo zveshe zvokuita mishando yeshe yakanaka.