2 Tim. 2 - Bhaibheri Rakachena muChindau

Soja Rakagondeka raKristu Jesu

¹ Iwewe zvino mwana wangu, ita wakagwinya munyasha dziri muna Kristu Jesu,

² neizvo zvewakazwa kubva kwendiri pamberi pezvapupu zvizhinji, upe iwewe kuvamuna vakagondeka, vanozokonawo kudzidzisa vamweni.

³ Tora chikoaniswa chako chokutambudzika kudai ngesoja rakanaka raKristu Jesu.

⁴ Apana soja rinoshanda muhondo rinodzikodyanisa kumishando yokupona uku, asi rinodisisa kumudakadza uwo wakarinyora kuti riite soja.

⁵ Mutambi wemijaho aapuwi dzungudza kuti asikazi kupurutana zvironzo.

⁶ Murimi unoshanda ndiye unosisira kuita wokutanga kuashira michero.

⁷ Pinimidza ngezvendinoronza, ngokuti Mambo unozokupa kuzwisisa muzviro zveshe.

⁸ Karakadzai ndiJesu Kristu, uwo wakamuswa kubva kwevakafa, mubarirwana waDhavhidha, ndiro vhangeri rangu,

⁹ iro rendinotambudzikira zvakakonza metsa mukusungwa, kudai ngomushandi wezvakashata. Asi izwi raMwari arizi kusungwa.

¹⁰ Ndizvo ndinotsungirira zveshe ngendaa yevakatsanangurwa, kuti vaonewo ruponeso ruri munaKristu Jesu, pamwepo nouthende husikaperi.

¹¹ Izwi iri ngeregwinyiso: Kudai takafa pamwepo naye, tinozoraramazve naye;

¹² kudai techitsungirira, tinozotongazve naye; kudai techimuramba, iye unozotirambawo;

¹³ kudai isusu tisikagondeki, iye unogara akagondeka, ngokuti aakoni kudziramba.

Muranda Wakanaka waKristu

¹⁴ Vakarakadzise ngeizvi, wechivapanga mukuona kwaMwari kuti vasaita hasha ngemazwi asikadetseri chiro, asi anoparadza avo vanozwa.

¹⁵ Gwinya kudzipira kunaMwari uri unotendeka kwaari, mushandi usikatami kutsveruka, unoruramisa kubata izwi regwinyiso.

¹⁶ Asi tiza kuereketa kusikakudzi Mwari, ngokuti kunozoangira kupausa vanhu kubva kunaMwari,

¹⁷ neizwi ravo rinozonyeketa kudai ngebandwa. Pakati pavo panaHimenaeusi naFiretusi,

¹⁸ avo vakapauka kubva mugwinyiso vechironza kuti kumuka kubva kwavakafa kwakatopinda. Vanorigira pashi kugonda kwevamweni.

¹⁹ Asi dzeyo rakagwinya raMwari rinondoema, rine chinyorwa ichi chinoti, “Mambo unozia avo vari vake,” zve, “Weshe unodaidza zina raMambo ngaabve kuneizvo zvisikazi kururama.”

²⁰ Zvino mumhatso huru amuna ndiro dzomukore nedzesirivha dzega asi dzirimwowo dzemiti nedzedongo, dzimweni dzinoremeredzeka nedzimweni dzisikaremeredzeki.

²¹ Ndizvo, kudai munhu echizodzisuka kubva kunezvakadaro, unozoita chidziyo chinoremeredzeka, chakacheneswa, chinosisira kushandiswa ngomunikazi wacho, chakanasirirwa kuita mishando yeshe yakanaka.

²² Asi tiza kubva mukuemura kwevatsva, uteere kururama, kugonda, rudo, kunyarara, pamwepo naavo vanokumbira kunaMambo ngomwoyo wakasukika.

²³ Asi ramba mibvunzo youpenzi neisina kuzia, wechizia kuti inopara hasha.

²⁴ Nomuranda waMambo aasisiri kuita hasha, asi kuita wakapfaa kwavari veshe, unozia kudzidzisa, echisengerera,

²⁵ uwo unodzidzisa ngokupfaa avo vanoramba, kuti pamweni Mwari ungavapa kutenderuka kuti vazie gwinyiso,

²⁶ zve, kuti vadzipokonyose kubva pamurau waDhiabhorosi, wevaiya vakabatwa ndiye kuti vaite kuda kwake.