2 Tim. 1 - Bhaibheri Rakachena muChindau

Kuchingamidza

¹ Phauri, mupostori waKristu Jesu ngokuda kwaMwari, kubudikidza ngechigondiso chokupona chiri munaKristu Jesu,

² ndinonyorera kunaThimothi, mwana wangu unodikanwa. Nyasha nokukungurirwa nokunyarara zvinobva kunaMwari Baba naKristu Jesu Mambo wedu ngazvigare newe.

Mukumbiro woKubonga noKugwinyisa

³ Ndinobonga Mwari, uwo wendinoshandira ngemhumba yakacheneswa, kudai ngezvaakaita madzibaba angu, apo pendinomukarakadza nguva dzeshe mumikumbiro yangu usiku nemasikati.

⁴ Apo ndechikarakadza masodzi ako, ndinozwa chishuwo chokuda kukuona kuti ndizadzwe ngokudakara.

⁵ Ndinokarakadziswa ngokugonda kwako kwegwinyiso, kugonda ukwo kwakagara kutanga munambuya ako Roisi nokunamai ako Yunisi, kwendinogonda kuti kunogarawo mwouri.

⁶ Ngeiyi ndaa ndinokukarakadzisa kuti ukunhidzire chipo chaMwari chiri mukati mwako kubudikidza ngokuiswa kwenyara dzangu padera pako;

⁷ ngokuti Mwari aazi kutipa mweya wokutya, asi mweya wesimba, worudo nowokudzibata.

⁸ Ndizvo usatsveruka kuita chapupu ndiMambo wedu nokuti ndini bhanditi rake, asi gwinyira zvakakonza ngendaa yevhangeri, mwechigonda simba raMwari,

⁹ uwo wakatiponesa nokutidaidza ngokudaidzwa kwakacheneswa, haiwa kubudikidza ngemishando yedu asi kubudikidza ngokuemesa kwake emene nenyasha. Nyasha idzi dzakapuwa kwetiri kubudikidza ndiKristu Jesu nguva dzisati dzaapo,

¹⁰ asi zvino zvakaoniswa kubudikidza ngokuoneka kwoMuponesi wedu Kristu Jesu, uwo wakanyisa rufu, akaunza kupona nokusikaora mukujeka kubudikidza ngevhangeri.

¹¹ Ngokuti ngeiri vhangeri ndakaemeswa kuita muchumairi, mupostori nomudzidzisi kweriri.

¹² Ngeiyi ndaa ndinotambudzwawo ngeizvi. Asi anditsveruki, ngokuti ndinomuzia uwo wendakatenda, ndinogonda kuti unokona kungwarira icho chendakapa kwaari metsa pazuva iro.

¹³ Batisisa chionero chemazwi akagwinyisisa ewakazwa kubva kwendiri, mukugonda nomurudo zviri munaKristu Jesu.

¹⁴ Ngwarira icho chakanaka chakapuwa kwouri, ngokudetserwa ndiye Mweya Wakachena unogara mukati mwedu.

¹⁵ Unozia kuti veshe vari muAsia vakandiramba, pakati pavo ndiFigerusi naHermogenesi.

¹⁶ Mambo ngaaitire nyasha kunevemhatso yaOnesiforusi, ngokuti waindigwinyisa nguva zhinji; aazi kutsveruka ngeketani dzangu,

¹⁷ asi apo paakaguma muRoma, wakanditsvaka kakurutu naye wakandiona.

¹⁸ Mambo ngaaite kuti aone nyasha kubva kunaMambo ngeiro zuva! Newe unonasa kuzia kuwanda kweizvo zvaakandishandira muEfesu.